Gumibo nin mga Desisyon na Nagtataong Onra sa Dios
Gumibo nin mga Desisyon na Nagtataong Onra sa Dios
“Ineestudyaran kan alisto an isip an saiyang mga lakad.”—TAL. 14:15.
1, 2. (a) Ano an maninigong magin pangenot sa sato sa gabos na desisyon na ginigibo niato? (b) Anong mga hapot an pag-oolayan niato?
POSIBLENG marhay na dakolon kaiyan an ginigibo niato sa kada aldaw. An dakol dian mayong nagdadanay na epekto. Pero an iba puedeng magkaigwa nin dakulang epekto sa satong buhay. Ano iyan? Mga desisyon. Sa gabos na ginigibo niatong desisyon, dakula o sadit, an pangenot sa sato iyo an pagtaong onra sa Dios.—Basahon an 1 Corinto 10:31.
2 Pasil daw sa saindo na gumibo nin mga desisyon, o depisil? Tanganing umoswag kita sa Kristianong pagkamaygurang, dapat manodan niato na mamidbid an tama asin sala dangan gumibo nin mga desisyon na kaoyon kan sato mismong marigon na mga tinutubod, bako kan sa iba. (Roma 12:1, 2; Heb. 5:14) Ano pa an nagkapirang mapuersang dahelan kun taano ta kaipuhan niatong manodan na gumibo nin marahay na mga desisyon? Taano ta kun beses depisilon na gibohon iyan? Asin anong mga lakdang an magigibo niato tanganing masierto na an satong mga desisyon nagtataong onra sa Dios?
Taano ta Kaipuhan na Gumibo nin mga Desisyon?
3. Ano an dai niato maninigong togotan na makaimpluwensia sa satong pagdesisyon?
3 Kun kita dai makadesisyon sa mga bagay na kalabot an mga pamantayan sa Biblia, tibaad magkongklusyon an satong mga kaeskuela o katrabaho na dai talaga kita kombensido sa satong mga tinutubod asin kun siring madaling maimpluwensiahan. Tibaad magputik sinda, mandaya, o manghabon dangan probaran kitang agdahon na “magsunod sa kadaklan” paagi sa pag-ayon sa sainda o dawa paagi sa pagtahob sana sa ginigibo ninda. (Ex. 23:2) Minsan siring, an saro na tataong gumibo nin mga desisyon na nagtataong onra sa Dios dai nanggad magawe na kontra sa saiyang konsensia na sinanay sa Biblia huli sa takot o pagmawot na akoon nin iba.—Roma 13:5.
4. Taano ta tibaad gusto nin iba na gumibo nin mga desisyon para sa sato?
4 Bakong gabos na gustong magdesisyon para sa sato gustong gibohan kita nin maraot. An mga katood na may marahay na intension tibaad mag-insistir na sunodon niato an sadol ninda. Kun dai na kita nakaistar sa satong mga magurang, posibleng marhay na an mga kapamilya niato may hararom na pagmakolog pa man giraray sa sato asin tibaad pagmate ninda kaipuhan pa sinda sa importanteng mga desisyon na ginigibo niato. Halimbawa, isip-isipa an manongod sa pagpabolong. Malinaw na kinokondenar kan Biblia an salang paggamit nin dugo. (Gibo 15:28, 29) Pero, may mga bagay na konektado sa pag-asikaso sa salud na mayong espesipikong instruksion kaya kaipuhan na kita an gumibo nin personal na desisyon kun anong pagbolong an aakoon o sasayumahan niato. * An satong mga namomotan tibaad may iiniinsistir na mga opinyon sa mga isyung ini. Minsan siring, sa pagdesisyon manongod dian, an lambang dusay na bautisadong Kristiano kaipuhan magpasan kan “saiyang sadiring pasan” nin paninimbagan. (Gal. 6:4, 5) An pangenot sa sato iyo an mapagdanay an marahay na konsensia sa atubangan nin Dios, bako nin tawo.—1 Tim. 1:5.
5. Paano niato malilikayan na mabagbag an satong pagtubod?
5 Puede kitang mamugtak sa grabeng peligro dahel sa dai pakadesisyon. Si disipulo Santiago nagsurat na an saro na dai makadesisyon “bakong marigon sa gabos niang dalan.” (Sant. 1:8) Arog nin saro na nakasakay sa mayong timon na baroto sa binabagyong dagat, sia iaanod-anod sana kan pabarobagong opinyon nin tawo. Madali sana nanggad na mabagbag an pagtubod nin siring na tawo dangan basolon nia an iba huli sa makamomondong kamugtakan nia! (1 Tim. 1:19) Paano niato iyan malilikayan? Dapat kitang magin ‘marigon sa pagtubod.’ (Basahon an Colosas 2:6, 7.) Tanganing magin marigon, kaipuhan niatong manodan na gumibo nin mga desisyon na nagpapabanaag kan satong pagtubod sa ipinasabong na Tataramon nin Dios. (2 Tim. 3:14-17) Pero, ano an tibaad makaolang sa kakayahan niatong gumibo nin marahay na mga desisyon?
Kun Taano ta Puedeng Magin Masakit an Pagdesisyon
6. Paano kita tibaad maapektaran nin takot?
6 Tibaad makapugol sa sato an takot—takot na makagibo nin salang desisyon, takot na dai magin mapanggana, o takot na magin mangmang sa pagheling nin iba. Natural sana an mga pagmateng iyan. Mayo nin siisay man an gustong mapasala nin desisyon, na nagigin dahelan nin problema asin posibleng kasusupgan. Dawa siring, an pagkamoot sa Dios asin sa Tataramon nia makakatabang sa sato na daing gayo matakot. Sa anong mga paagi? An pagkamoot sa Dios pirmeng mapahiro sa sato na konsultahon an Tataramon nia asin an mga publikasyon na basado sa Biblia bago kita gumibo nin mahahalagang desisyon. Sa siring, maiinaan niato an nagigibo niatong sala. Taano? Huli ta an Biblia ‘makakatao nin pagkaalisto nin isip sa mga daing eksperyensia, nin kaaraman asin kakayahan sa pag-iisip sa hoben.’—Tal. 1:4.
7. Ano an puede niatong manodan sa halimbawa ni Hadeng David?
7 Pirme daw niatong magigibo an tamang desisyon? Dai. Gabos kita nasasala. (Roma 3:23) Halimbawa, si Hadeng David madonong asin maimbod. Pero, may mga panahon na nakagibo sia nin salang mga desisyon na nagpasakit sa saiya asin sa iba. (2 Sam. 12:9-12) Minsan siring, dai tinogotan ni David na paluyahon kan mga sala nia an saiyang kakayahan na gumibo nin mga desisyon na inooyonan nin Dios. (1 Ha. 15:4, 5) Puede kitang marigon na magdesisyon sa ibong kan nakaaging mga sala kun ginigirumdom niato, arog ni David, na papalampason ni Jehova an satong mga sala asin papatawadon nia an satong mga kasalan. Padagos niang susuportaran an mga namomoot asin nagkukuyog sa saiya.—Sal. 51:1-4, 7-10.
8. Ano an manonodan niato sa komento ni apostol Pablo manongod sa pag-agom?
8 Maiinaan niato an satong pagkahadit manongod sa pagdesisyon. Paano? Paagi sa pagsaisip na kun beses may nagkapirang tamang mapagpipilian. Isip-isipa kun paano nangatanosan si apostol Pablo manongod sa pag-agom. Sia pinasabngan na magsurat: “Kun iniisip nin siisay man na sia minagawe nin bakong tama sa saiyang pagigin daing agom, kun iyan lihis na sa pagbukad nin pagkahoben, asin ini an maninigong mangyari, gibohon nia kun ano an gusto nia; dai sia nagkakasala. Mag-agom sinda. Alagad kun an siisay man desisyonado sa saiyang puso, na dai nakakamate nin pangangaipo, kundi kontrolado nia an saiyang sadiring boot asin naggibo kan desisyon na ini sa saiyang puso, na magdanay na daing agom, mapaparahay sia.” (1 Cor. 7:36-38) An pagigin daing agom irinekomendar ni Pablo bilang an pinakamarahay na gibohon, alagad bako iyan an solamenteng tamang pilion.
9. Maninigo daw kitang magin interesado sa kun paano minamansay nin iba an satong mga desisyon? Ipaliwanag.
9 Maninigo daw kitang magin interesado sa kun paano minamansay nin iba an ginigibo niatong mga desisyon? Iyo man. Mangnoha an sinabi ni Pablo mapadapit sa pagkakan nin mga kakanon na tibaad iinatang sa mga idolo. Sinabi nia na an sarong desisyon tibaad bako man talagang sala, pero puede iyan na makadanyar sa saro na may maluyang konsensia. Ano an desisyon ni Pablo? “Kun an kakanon nakakapasingkog sa sakong tugang,” an isinurat nia, “dai na ako noarin man makakan giraray nin karne, tanganing dai ako makapasingkog sa sakong tugang.” (1 Cor. 8:4-13) Kaipuhan man niatong pag-isipan kun paano an satong mga desisyon makakaapektar sa konsensia nin iba. Siempre, an pangenot sa sato iyo an magigin epekto kan satong mga desisyon sa pakikikatood niato ki Jehova. (Basahon an Roma 14:1-4.) Anong mga prinsipyo sa Biblia an makakatabang sa sato na gumibo nin mga desisyon na nagtataong onra sa Dios?
Anom na Lakdang sa Paggibo nin Marahay na mga Desisyon
10, 11. (a) Paano niato malilikayan na magin pangahas sa laog kan pamilya? (b) Ano an maninigong tandaan kan kamagurangan kun naggigibo nin mga desisyon na may epekto sa kongregasyon?
10 Likayan na magin pangahas. Bago magdesisyon kun ano an gigibohon, kaipuhan niatong ihapot sa sadiri, ‘Ako daw an dapat magdesisyon digdi?’ Si Hadeng Salomon nagsurat: “Nag-abot daw an kapangahasan? Kun siring maabot an kasusupgan; alagad an kadonongan yaon sa mga hababa an boot.”—Tal. 11:2.
11 Tibaad tawan nin mga magurang an mga aki ninda nin oportunidad na gumibo nin nagkapirang desisyon, alagad dai maninigong basta sadirihon kan mga aki an siring na autoridad. (Col. 3:20) An mga agom na babae asin mga ina may autoridad man sa laog kan pamilya alagad marahay na akoon ninda an pagkapayo kan saindang agom. (Tal. 1:8; 31:10-18; Efe. 5:23) Siring man, kaipuhan akoon kan mga agom na lalaki na limitado an autoridad ninda asin sakop sinda ni Cristo. (1 Cor. 11:3) An kamagurangan naggigibo nin mga desisyon na may epekto sa kongregasyon. Minsan siring, sinisierto ninda na dai sinda “maglihis sa mga bagay na nasusurat” sa Tataramon nin Dios. (1 Cor. 4:6) Maingat man nindang sinusunod an pagdirehir sa sainda kan maimbod na oripon. (Mat. 24:45-47) Ikakalikay niato an satong sadiri asin an iba sa grabeng kahaditan asin kamondoan kun kita may kababaan nin boot na naggigibo nin desisyon solamente kun kita tinawan kan autoridad na gibohon iyan.
12. (a) Taano ta maninigo kitang magsiyasat? (b) Ipaliwanag kun paano magigibo nin saro an siring na pagsiyasat.
12 Magsiyasat. “An mga plano kan mahigos seguradong nagbubunga nin bentaha,” an isinurat ni Salomon, “alagad an gabos na naghihidali seguradong pasiring sa pagkatikapo.” (Tal. 21:5) Halimbawa, may pinag-iisipan ka daw na negosyo? Dai magpadara sa emosyon. Aramon an gabos na mahalagang impormasyon, humagad nin konseho sa mga pamilyar sa siring na mga bagay, asin aramon an konektadong mga prinsipyo sa Biblia. (Tal. 20:18) Tanganing magin organisado sa pagsiyasat, mag-andam nin duwang listahan—an saro para sa mga bentaha, an saro para sa mga disbentaha. Bago magdesisyon, ‘kuentahon an gastos.’ (Luc. 14:28) Isipon an posibleng magin epekto kan desisyon mo bako sanang sa pinansial kundi sa saimo man na espirituwalidad. Sa pagsiyasat, kaipuhan an panahon asin paghihingoa. Alagad sa paggibo kaiyan, puede mong malikayan na gumibo nin pabiglabiglang mga desisyon na minaresulta sa dai kinakaipuhan na kahaditan.
13. (a) Anong pag-asegurar an yaon sa Santiago 1:5? (b) Paano an pamimibi para sa kadonongan makakatabang sa sato?
13 Mamibi para sa kadonongan. An satong mga desisyon magtataong onra sa Dios solamente kun mapatabang kita sa saiya sa paggibo kaiyan. Si disipulo Santiago nagsurat: “Kun an siisay man sa saindo kulang nin kadonongan, padagos siang maghagad sa Dios, huli ta sia abundang nagtatao sa gabos asin dai nang-aanggot; asin iyan itatao sa saiya.” (Sant. 1:5) Mayong dapat ikasupog sa pag-admitir na kaipuhan niato an kadonongan nin Dios tanganing matabangan kitang magdesisyon. (Tal. 3:5, 6) Total, kun sa satong sadiring pakasabot sana kita masarig, madali kitang mapapasala. Kun namimibi kita para sa kadonongan asin nagsisiyasat kan mga prinsipyo sa Tataramon nin Dios, tinotogotan niato an banal na espiritu na tabangan kitang marisa kun ano talaga an motibo niato ta gusto niatong gibohon an sarong bagay.—Heb. 4:12; basahon an Santiago 1:22-25.
14. Taano ta maninigo niatong likayan an pagpalimanliman?
14 Magdesisyon. Dai maghidaling gibohon ini kun dai pa nagsiyasat asin namibi para sa kadonongan. An madonong nagtatao nin panahon tanganing ‘estudyaran an saiyang mga lakad.’ (Tal. 14:15) Pero, dai magpalimanliman. An sarong nagpapalimanliman tibaad gumibo nin bakong rasonableng mga sarahotan sa dai nia paghiro. (Tal. 22:13) Alagad naggigibo pa man giraray sia nin desisyon—sa katunayan, nagdedesisyon sia na togotan an iba na kontrolon an buhay nia.
15, 16. Ano an kalabot sa pag-implementar nin desisyon?
15 Iimplementar an desisyon. Masasayang an satong paghihingoa na makagibo nin marahay na desisyon kun iyan dai niato idadagos asin maigot na iiimplementar. “An gabos na makua kan saimong kamot na gibohon, gibohon iyan sa bilog mong kakayahan,” an isinurat ni Salomon. (Ecl. 9:10) Tanganing magin mapanggana, dapat na andam kitang itagama an mga kaipuhan tanganing ikaimplementar an satong mga desisyon. Halimbawa, an sarong parahayag sa kongregasyon tibaad magdesisyon na magpayunir. Magigin mapanggana daw sia? Posibleng marhay na iyo kun dai nia totogotan an sobrang sekular na trabaho asin pag-aling-aling na uboson an kosog asin panahon na kaipuhan nia tanganing maasikaso an saiyang ministeryo.
16 Bihirang mangyari na an pinakamarahay na mga desisyon iyo an pinakapasil na iimplementar. Taano? Huling “an bilog na kinaban namumugtak sa kapangyarihan kan saro na maraot.” (1 Juan 5:19) Dapat kitang makipaggumolan tumang sa “mga namamahala sa kinaban sa kadikloman na ini, tumang sa marigsok na mga puersang espiritu sa langitnon na mga lugar.” (Efe. 6:12) Parehong ipinarisa ni apostol Pablo asin ni disipulo Judas na an mga nagdesisyon na tawan nin onra an Dios kaipuhan na makipaglaban.—1 Tim. 6:12; Jud. 3.
17. Kun manongod sa ginigibo niatong mga desisyon, ano an inaasahan sa sato ni Jehova?
17 Repasohon an desisyon asin gumibo nin mga pagliliwat kun kaipuhan. Bakong gabos na desisyon eksaktong ikinakaimplementar segun sa plano. “An panahon asin dai inaasahan na pangyayari” minaabot sa sato gabos. (Ecl. 9:11) Dawa siring, inaasahan ni Jehova na maghihingoa kita sa nagkapirang desisyon minsan ngani tibaad mapaatubang kita sa mga pagbalo. An pagdusay nin saro kan saiyang buhay ki Jehova asin pakipagsumpaan sa kasal mga desisyon na dai puedeng bagohon. Inaasahan nin Dios na ootobon niato an siring na mga desisyon. (Basahon an Salmo 15:1, 2, 4.) Pero, an kadaklan na desisyon bakong gayong magabat. Sa panapanahon, rerepasohon nin sarong madonong an nagibo niang mga desisyon. An kapalangkawan o katagasan nin payo dai nia totogotan na makaolang sa saiya na gumibo nin pagliliwat o baliktadon pa ngani an sarong desisyon. (Tal. 16:18) An pangenot sa saiya iyo na siertohon na an pamumuhay nia danay na nagtataong onra sa Dios.
Sanayon an Iba na Gumibo nin mga Desisyon na Nagtataong Onra sa Dios
18. Paano puedeng sanayon nin mga magurang an saindang mga aki na gumibo nin marahay na mga desisyon?
18 Dakula an magigibo nin mga magurang tanganing tabangan an mga aki ninda na makanood kun paano gumibo nin mga desisyon na nagtataong onra sa Dios. An marahay na halimbawa saro sa pinakamarahay na mga paagi nin pagtotokdo. (Luc. 6:40) Kun angay, puedeng ipaliwanag nin mga magurang sa mga aki ninda kun paano sinda mismo nagdesisyon sa sarong bagay. Tibaad gugustohon man nindang pabayaan an mga aki ninda na gumibo nin nagkapirang desisyon para sa saindang sadiri dangan komendaran sinda kun marahay an resulta. Pero, paano kun sala an desisyon nin aki? An tibaad enot na tendensia nin magurang iyo na ilikay an aki sa mga epekto, alagad an paggibo kaiyan tibaad bako pirmeng sa pinakaikakarahay kan aki. Halimbawa, tibaad tinogotan kan magurang an aki na kumua nin lisensia sa pagmaneho. Ipamugtak niatong binalga kan aki an sarong ley sa trapiko asin pinapamulta sia. Puedeng bayadan kan magurang an multa. Minsan siring, kun pinapatrabaho an aki tanganing mabayadan an multa, mas posible nanggad na makakanood sia na magin responsable sa mga ginigibo nia.—Roma 13:4.
19. Ano an maninigo niatong itokdo sa satong mga inaadalan sa Biblia, asin paano niato iyan magigibo?
19 Sinabi ni Jesus sa mga parasunod nia na tokdoan an iba. (Mat. 28:20) An saro sa pinakaimportanteng mga leksion na ikakatokdo niato sa mga inaadalan sa Biblia iyo an kun paano gumibo nin marahay na mga desisyon. Tanganing epektibong magibo iyan, dapat niatong pugolan an satong sadiri na sabihon sa sainda kun paano mahiro. Mas marahay nanggad para sa sato na tokdoan sindang mangatanosan sa mga prinsipyo sa Biblia tanganing makadesisyon sinda para sa saindang sadiri kun paano mahiro. Total, “an lambang saro sa sato maninimbag sa Dios para sa saiyang sadiri.” (Roma 14:12) Kun siring, gabos kita may mapuersang dahelan na gumibo nin mga desisyon na nagtataong onra sa Dios.
[Nota sa Ibaba]
^ par. 4 Para sa pagtokar dapit sa temang ini, helingon an suplemento na “Paano Ko Dedesisyonan an Manongod sa mga Fraction nin Dugo Asin an Medikal na mga Prosedimiento na Kalabot an Sadiri Kong Dugo?” na ipinublikar sa An Satong Ministeryo sa Kahadean na Enero 2007, pahina 3-6.
Ano an Isisimbag Nindo?
• Taano ta kaipuhan niatong manodan kun paano magdesisyon?
• Paano kita puedeng maapektaran nin takot, asin paano niato mapapangganahan an satong mga ikinakatakot?
• Anong anom na lakdang an magigibo niato tanganing masierto na an satong mga desisyon nagtataong onra sa Dios?
[Mga Hapot Para sa Pag-adal]
[Kahon/Ritrato sa pahina 16]
Mga Lakdang sa Paggibo nin Marahay na mga Desisyon
1 Likayan na Magin Pangahas
2 Magsiyasat
3 Mamibi Para sa Kadonongan
4 Magdesisyon
5 Iimplementar an Desisyon
6 Repasohon Asin Gumibo nin Pagliliwat
[Ritrato sa pahina 15]
An saro na dai makadesisyon siring sa sarong tawo na yaon sa mayong timon na baroto sa binabagyong dagat
