Mga Pamilyang Kristiano—“Magdanay na Andam”

“Magdanay na andam, huli ta sa oras na dai nindo pinaghohona madatong an Aki nin tawo.”—LUC. 12:40.

1, 2. Taano ta maninigo niatong isapuso an konseho ni Jesus na “magdanay na andam”?

“KUN an Aki nin tawo mag-abot na sa saiyang kamurawayan” asin ‘pagsuruwaysuwayon an mga tawo,’ ano an mangyayari sa saindo asin sa saindong pamilya? (Mat. 25:31, 32) Huling mangyayari ini sa oras na dai niato pinaghohona, mahalagang marhay nanggad na isapuso niato an konseho ni Jesus na “magdanay na andam”!—Luc. 12:40.

² Tinokar sa naenot na artikulo kun paano makakatabang an kada miembro kan pamilya tanganing sinda gabos magdanay na puka sa espirituwal paagi sa pagseryoso sa saiyang paninimbagan. Pag-olayan niato an iba pang mga paagi na makakakontribwir kita sa espirituwal na ikakarahay kan satong pamilya.

Pagdanayon na “Simple” an Saindong Mata

3, 4. (a) An mga pamilyang Kristiano maninigong mag-ingat sa ano? (b) Ano an kahulogan kan pagpadanay na “simple” kan satong mata?

³ Tanganing magin andam sa pag-abot ni Cristo, dapat na mag-ingat an mga pamilya na an saindang atension dai ikarayo sa mga bagay na konektado sa tunay na pagsamba. Kaipuhan nindang mag-ingat na dai madisturbo nin mga bagay-bagay. Huling dakol nang pamilya an nasiod nin materyalismo, pag-isipan an sinabi ni Jesus  manongod sa pagpadanay na “simple” kan satong mata. (Basahon an Mateo 6:22, 23.) Kun paanong an lampara puedeng magtaong liwanag sa satong dalan kaya makakalakaw kita na dai natutumba, an mga bagay na ilinalaog niato paagi sa satong piguratibong ‘mga mata kan puso’ puede man na magtaong liwanag sa sato, na makakatabang sa sato na gumawe na dai nasisingkog.—Efe. 1:18.

⁴ Tanganing makaheling nin malinaw an literal na mata, iyan dapat na nagpupunsionar nin tama asin kayang magpokus sa hineheling kaiyan. Mayong pagkakalaen iyan sa mga mata kan puso. An pagkaigwa nin simpleng piguratibong mata nangangahulogan na nakapokus kita sa sarong katuyohan. Imbes na mamuhay na nakakonsentrar sa materyal na mga bagay asin magparahadit dapit sa pag-asikaso kan pisikal na pangangaipo sana kan pamilya, pinapagdadanay niato an satong mata na nakapokus sa espirituwal na mga bagay. (Mat. 6:33) Nangangahulogan ini na kita danay na kontento sa materyal na mga probisyon sa sato asin ineenot niato sa satong buhay an paglilingkod sa Dios.—Heb. 13:5.

5. Paano ipinaheling nin sarong daragita na an saiyang “mata” nakaturuhok sa paglilingkod sa Dios?

⁵ Marahay nanggad an puedeng magin resulta kun an mga aki sinanay na papagdanayon na simple an mata! Isip-isipa an halimbawa nin sarong daragita sa nasyon nin Etiopia. Matibayon sia sa klase kaya kan matapos nia an saiyang pundamental na edukasyon, inalok sia na magin iskolar para sa dugang pang edukasyon. Minsan siring, huling an saiyang mata nakapokus sa paglilingkod ki Jehova, sinayumahan nia iyan. Dai nahaloy, inalokan sia nin trabaho na an sueldo 3,000 na euro kada bulan—halangkaw kun ikokomparar sa ordinaryong sueldo sa nasyon nia. Alagad an “mata” kan daragita nakaturuhok sa pagpapayunir. Dai na nia kaipuhan na konsultahon pa an saiyang mga magurang tanganing sayumahan an trabaho. Ano an namatean kan mga magurang nia kan maaraman ninda an ginibo kan saindang aki? Iyo, nakigayagaya sinda sa saiya asin sinabi ninda sa saiya kun gurano ninda sia ipinag-oorgolyo!

6, 7. Sa anong peligro maninigo kitang “magpuka”?

⁶ Maririsa sa mga tataramon ni Jesus sa Mateo 6:22, 23 an patanid dapit sa kahanaban. Dai ginamit ni Jesus an terminong “komplikado” bilang kabaliktaran kan “simple,” kundi ginamit nia an terminong “maraot.” An ‘maraot na mata’ “maurihon,” na an boot sabihon maaraon o mahanab. (Mat. 6:23; nota sa ibaba) Ano an saboot ni Jehova dapit sa kaaraan o kahanaban? “An pakikisaro asin gabos na klase nin pagkamaati o kahanaban [o “kaaraan”] dai ngani masambitan dian sa saindo,” an sabi kan Biblia.—Efe. 5:3; nota sa ibaba.

⁷ Minsan ngani an kahanaban tibaad madaling marisa sa iba, bako iyan madalion na marisa sa satong sadiri. Huli kaini, madonong na himateon niato an sadol ni Jesus: “Magpuka kamo asin magmaan kamo sa gabos na klase nin kaaraan.” (Luc. 12:15) Tanganing magibo iyan, kaipuhan niatong siyasaton an sadiri tanganing maheling kun sa ano nakasentro an satong puso. Maninigong pag-isipan nin seryoso kan mga pamilyang Kristiano an dapit sa panahon asin kuarta na ginagamit ninda sa pag-aling-aling, pamamasyar, asin pagkamit nin materyal na mga bagay.

8. Kun dapit sa pamamakal, paano kita ‘makakapagpuka’?

⁸ Bago bumakal nin sarong bagay, kaipuhan nindong pag-isipan bako sanang kun baga kaya nindong bakalon iyan o dai. Isip-isipa man an mga bagay arog kan mga ini: ‘Magkakapanahon daw ako na gamiton iyan nin regular asin manteneron iyan? Gurano kahaloy bago ko manodan na gamiton iyan nin tama?’ Kamong mga hoben, dai maniwala sa gabos na iinaanunsio kan kinaban dapit sa mga barakalon asin sa siring magkaigwa nin bakong rasonableng pagmawot sa mamahalon na mga tatak nin bado o sa iba pang bagay. Magpugol. Pag-isipan man kun paano an pagbakal nin sarong bagay makakaapektar sa pagigin andam kan saindong pamilya sa pag-abot kan Aki nin tawo. Magtubod sa panuga ni Jehova: “Dai taka nanggad babayaan ni sa ano man na paagi papabayaan taka.”—Heb. 13:5.

 Pagmaigotan na Aboton an Espirituwal na mga Pasohan

9. Ano an puedeng magin epekto sa pamilya kan pagmamaigot na aboton an espirituwal na mga pasohan?

⁹ An saro pang paagi na mapapakosog nin mga miembro kan pamilya an pagtubod ninda asin makakakontribwir sa espirituwal na ikakarahay kan bilog na pamilya iyo na magkaigwa sinda nin espirituwal na mga pasohan asin hingoahon na aboton iyan. Makakatabang iyan sa mga pamilya na maaraman an pag-oswag ninda mapadapit sa saindang katuyohan na paogmahon si Jehova asin matuturotimbang ninda an kahalagahan nin ano man na aktibidad.—Basahon an Filipos 1:10.

10, 11. Bilang pamilya, anong espirituwal na mga pasohan an pinagmamaigotan nindong aboton, asin ano pang mga pasohan an gusto nindong aboton?

¹⁰ Dawa an pagkaigwa nin simple asin realistikong mga pasohan na kayang aboton kan haros gabos na miembro kan pamilya puedeng magtao nin dakulang pakinabang. An sarong halimbawa iyo an pasohan na aroaldaw na pag-olayan an teksto kan aldaw. An mga komento kan mga miembro kan pamilya makakatabang sa payo kan pamilya na maheling kun gurano kararom an saindang espirituwalidad. An pasohan na regular asin iribang basahon an Biblia bilang pamilya nagtatao nin marahayon na oportunidad sa mga aki na paoswagon an kakayahan nindang bumasa saka an pakasabot ninda sa mensahe kan Biblia. (Sal. 1:1, 2) Asin bako daw na gugustohon niatong magin pasohan na paoswagon an kalidad kan mga pamibi niato? An orog na pagpatalubo kan mga aspekto kan bunga kan espiritu marahayon man na pasohan na puedeng aboton. (Gal. 5:22, 23) O makakahanap daw kita nin mga paagi na magpaheling nin pakikipagkapwa sa mga nakakaolay niato sa ministeryo? An pagmamaigot na gibohon iyan bilang pamilya makakatabang sa mga aki na makanood na magin mapagmalasakit, asin posibleng marhay na magkakaigwa sinda kan pagmawot na magregular payunir o magmisyonero.

 ¹¹ Taano ta dai pag-isipan an nagkapirang pasohan na puedeng aboton nindo asin kan saindong pamilya? Puede daw na magin pasohan kan pamilya nindo na orog na makikabtang sa ministeryo? Puede daw nindong pagmaigotan na pangganahan an takot na magpatotoo sa telepono, sa tinampo, o sa mga lugar nin negosyo? Makakapaglingkod daw kamo kun saen mas dakula an pangangaipo para sa mga parahayag kan Kahadean? Puede daw na an sarong miembro kan pamilya mag-adal nin ibang lenguahe tanganing ikapaabot an maogmang bareta sa mga iba an nasyonalidad?

12. Ano an magigibo kan mga payo nin pamilya tanganing matabangan an saindang pamilya na umoswag sa espirituwal?

¹² Bilang payo nin pamilya, aramon kun sa anong mga aspekto puedeng umoswag sa espirituwal an saindong pamilya. Dangan, tanganing maabot an katuyohan na iyan, magkaigwa nin espesipikong mga pasohan. An mga pasohan nindo bilang pamilya maninigong realistiko asin kayang aboton segun sa mga kamugtakan asin abilidad nindo. (Tal. 13:12) Siempre, kaipuhan an panahon tanganing maabot an sarong kapakipakinabang na pasohan. Kaya bakalon an panahon na ginagamit sa pagdalan nin telebisyon asin gamiton iyan para sa espirituwal na mga gibohon. (Efe. 5:15, 16) Magmaigot na aboton an mga pasohan na ibinugtak nindo para sa saindong pamilya. (Gal. 6:9) ‘Maheheling kan gabos na tawo’ an pag-oswag nin pamilyang nagmamaigot na aboton an espirituwal na mga pasohan.—1 Tim. 4:15.

Pagdanayon an Banggi nin Pampamilyang Pagsamba

13. Anong pagbabago an iinintrodusir sa semanal na iskedyul kan mga pagtiripon kan kongregasyon, asin anong mga hapot an maninigo niatong horophoropon?

¹³ An sarong marahayon na tabang sa mga pamilya na “magdanay na andam” sa pag-abot kan Aki nin tawo iyo an mahalagang pagbabago sa iskedyul kan semanal na pagtiripon na pinonan kan Enero 1, 2009. Dai na kaipuhan magtiripon sa ibang aldaw para sa inaapod kaidtong Pag-adal sa Libro kan Kongregasyon huling ginigibo na iyan kaiba kan Teokratikong Paadalan sa Pagmiministro asin Pagtiripon sa Paglilingkod. Ginibo an pagliliwat na ini tanganing tawan an mga pamilyang Kristiano nin oportunidad na parigonon an saindang espirituwalidad paagi sa pag-iskedyul nin espesipikong banggi kada semana para sa pampamilyang pagsamba. Mantang medyo haloy na poon kan iintrodusir an pagbabagong iyan, puede niatong hapoton an satong sadiri: ‘Inaaprobetsaran ko daw an nabakanteng panahon tanganing gamiton iyan para sa banggi nin Pampamilyang Pagsamba o sa personal na pag-adal? Naabot ko daw an katuyohan kan areglong iyan?’

14. (a) Ano an pangenot na katuyohan kan pagpadanay nin banggi nin Pampamilyang Pagsamba o personal na pag-adal? (b) Taano ta mahalagang marhay an pagtagama nin banggi nin pag-adal?

¹⁴ An pangenot na katuyohan kan pagpadanay nin banggi nin Pampamilyang Pagsamba o nin panahon para sa personal na pag-adal iyo na orog na rumani sa Dios. (Sant. 4:8) Kun kita regular na nag-aadal sa Biblia asin nagtatalubo sa kaaraman dapit sa Kaglalang, minakosog an relasyon niato sa saiya. Mientras na orog kitang minarani ki Jehova, orog man kitang namomotibar na mamotan sia ‘sa bilog niatong puso, bilog niatong kalag, bilog niatong isip, patin bilog niatong kosog.’ (Mar. 12:30) Seguradong gustong-gusto niatong kuyogon an Dios asin magin paraarog sa saiya. (Efe. 5:1) Kun siring, an pagpadanay nin regular na banggi nin Pampamilyang Pagsamba mahalagang marhay tanganing matabangan an bilog niatong pamilya na “magdanay na andam” sa espirituwal mantang hinahalat niato an ihinulang “dakulang kahorasaan.” (Mat. 24:21) Importanteng marhay iyan sa kaligtasan.

15. Ano an puedeng magin epekto kan banggi nin Pampamilyang Pagsamba sa saboot kan mga miembro nin pamilya sa kada saro?

¹⁵ An areglong Pampamilyang Pagsamba may saro pang katuyohan—an matabangan an mga miembro nin pamilya na orog na magin dayupot sa kada saro. An iribang pag-orolay-olay dapit sa espirituwal na mga bagay kada semana may dakulang epekto sa saboot kan mga miembro nin pamilya sa kada saro. Nagigin dayupot nanggad an mga mag-agom kun nadadangog ninda an kada saro na nagpapahayag nin kagayagayahan huli sa espirituwal na kayamanan na magkaibanan nindang nadidiskobre! (Basahon an Eclesiastes  4:12.) An mga magurang asin aki na iribang nagsasamba posibleng marhay na magkakasararo sa pagkamoot, an “sangkap na bogkos nin pagkasararo.”—Col. 3:14.

16. Isaysay kun paano an tolong Kristiana nakinabang sa banggi na itinagama sa pag-adal sa Biblia.

¹⁶ Pag-isipan kun paano nakinabang an tolong Kristiana sa areglo nin pagtagama nin banggi para sa pag-adal sa Biblia. Minsan ngani bakong magkakapamilya, an tolong gurang na balong ini nakaistar sa saro sanang siudad asin nagin dayupot na mag-aramiga sa laog nin dakol na taon. Huling gusto ninda na magin mas parate an pag-iribanan ninda asin magin kapakipakinabang man iyan sa espirituwal imbes na erestoryahan sana, nagdesisyon sinda na magtagama nin banggi tanganing magtiripon asin mag-adal sa Biblia. Pinonan nindang gibohon ini gamit an librong “Bearing Thorough Witness” About God’s Kingdom. “Ogmahon kami kaya parateng minalampas sa sarong oras an pag-adal mi,” an sabi kan saro sa sainda. “Hinihingoa ming imahinaron an mga situwasyon kan mga tugang kaidtong enot na siglo asin pinag-oolayan mi kun ano an gigibohon mi sa siring na mga kamugtakan. Dangan hinihingoa ming iaplikar sa ministeryo an mga puntong nanodan mi sa samong pag-orolay. Huli kaini, an samong paghuhulit kan Kahadean asin paggibo nin mga disipulo nagin mas nakakaogma asin mabunga kisa kasuarin man.” Paagi sa areglong iyan, sindang tolo dai sana napakosog sa espirituwal kundi orog pa ngani sindang nagin dayupot na mag-aramiga. “Gustong-gusto mi an areglong ini,” an sabi ninda.

17. Anong mga bagay an nakakakontribwir sa kapangganahan kan banggi nin Pampamilyang Pagsamba?

¹⁷ Kumusta man kamo? Paano kamo nakikinabang sa banggi na itinagama sa pampamilyang pagsamba o personal na pag-adal? Kun an areglong iyan dai ginigibo nin regular, dai maaabot an minamawot na mga katuyohan kaiyan. An kada miembro kan pamilya maninigong magin andam na mag-adal sa iiniskedyul na oras. Dai pagtogotan na makaolang sa bangging iyan an saradit na bagay. Maninigo man na pumili nin reperensia na magigin praktikal sa saindong pamilya. Ano an magigibo nindo tanganing magin nakakaogma an mga pag-adal na ini? Gumamit nin epektibong mga paagi nin pagtotokdo, asin pagdanayon na may dignidad asin toninong an kamugtakan.—Sant. 3:18. *

“Magpuka” Asin “Magdanay na Andam”

18, 19. Ano an maninigong epekto sa saindo asin sa saindong pamilya kan pakaaram na harani na an pag-abot kan Aki nin tawo?

¹⁸ An naggagrabeng kamugtakan sa kinaban sa panahon niato malinaw na nagpapaheling na poon kan 1914 nasa huring mga aldaw na an maraot na kinaban ni Satanas. Harani na an Armagedon. Madali nang isagibo kan Aki nin tawo an sentensia ni Jehova sa mga bakong diosnon. (Sal. 37:10; Tal. 2:21, 22) Bako daw na maninigong magkaigwa nin epekto sa saindo asin sa saindong pamilya an pakaaram sa bagay na iyan?

¹⁹ Hinihimate daw nindo an sadol ni Jesus na pagdanayon na “simple” an saindong mata? Mantang an mga tawo sa kinaban na ini tibaad nagmamaigot para sa kayamanan, kabantogan, o kapangyarihan, an saindong pamilya daw nagmamaigot na aboton an espirituwal na mga pasohan? Nakikinabang daw kamo sa areglong banggi nin Pampamilyang Pagsamba o personal na pag-adal? Naaabot daw nindo an mga katuyohan kaiyan? Arog kan tinokar sa sinundan na artikulo, isinasaabaga daw nindo an sono sa Kasuratan na paninimbagan nindo bilang agom na lalaki, agom na babae, o aki, na huli kaiyan natatabangan an bilog na pamilya na “magpuka”? (1 Tes. 5:6) Kun iyo, ‘magdadanay kamong andam’ sa pag-abot kan Aki nin tawo.

[Nota sa Ibaba]

Ano an Nanodan Nindo?

• Ipaliwanag kun paano ‘makakapagdanay na andam’ an mga pamilyang Kristiano paagi sa . . .

pagkaigwa nin ‘simpleng’ mata.

pagkaigwa asin pag-abot nin espirituwal na mga pasohan.

pagpadanay nin banggi nin Pampamilyang Pagsamba.

[Mga Hapot Para sa Pag-adal]

[Ritrato sa pahina 13]

An ‘simpleng’ mata mamotibar sa sato na labanan an mga pandisturbo kan kinaban