Talaga daw na Ikinakaogma Mo an Tataramon nin Dios?

“KAN magpoon akong magbasa nin regular kan Biblia, para sa sako iyan rutina sana imbes na dakulang kaogmahan,” an sabi ni Lorraine. “Masakit saboton iyan, kaya sa parate nawawara an konsentrasyon ko.”

Inadmitir nin iba na kan magpoon sindang magbasa kan Biblia, dai man ninda ikinakaogma iyan. Pero, nagmaigot sinda huling aram ninda na an pagbasa kan Banal na Kasuratan iyo an tamang gibohon. Si Marc nagsabi: “An pagbasa kan Biblia asin personal na pag-adal madali sanang maolang nin mga disturbo. Kinaipuhan ko an dakol na pamimibi asin paghihingoa tanganing magin kabtang kan sakong rutina an aroaldaw na pagbasa kan Biblia.”

Ano an magigibo mo tanganing orog na mapahalagahan an nasusurat na Tataramon nin Dios, an Biblia? Paano mo ikakaogma an pagbasa kaiyan? Estudyare an minasunod na mga suhestion.

Mga Pasohan Asin Pamamaagi

Mamibi bago magbasa kan Biblia asin magkonsentrar sa pagbasa. Makiolay ki Jehova na tabangan kang mawoton na pag-adalan an Tataramon nia. Makimaherak sa saiya na bukasan an isip asin puso mo tanganing mas lubos mong masabotan an kadonongan nia. (Sal. 119:34) Kun mayo kan pamamaaging ini, madali sanang magin mekanikal an pag-adal sa Biblia, asin tibaad mawara an pagmawot mong ipadagos iyan. Si Lynn nagsabi: “Kun minsan, marikason an pagbasa ko kaya biyo kong nalilipasan an iba pang punto na interesante. Sa parate, dai ko lubos na nasasabotan an pangenot na mga ideya. Pero, namimibi ako na logod makontrol ko an sakong sadiri, asin nakakatabang ini sa sako na dai maglagawlagaw an sakong isip.”

Pahalagahan an nanonodan mo. Girumdomon na an pagsabot asin pag-aplikar mo kan mga katotoohan sa Biblia nangangahulogan kan saimong buhay. Kun siring, hingoahon na marhay na makua an praktikal na mga punto asin iaplikar iyan. “Hinahanap ko an mga bagay na makakatabang sa sako na maheling an salang kaisipan asin motibo ko,” an sabi ni Chris. “Nakakaginhawang maheling na an Biblia asin an dakol sa mga publikasyon niato igwa nin impormasyon na personal na kapakipakinabang sa sako, dawa ngani dai ako midbid kan mga kagsurat kaiyan.”

Gumibo nin mga pasohan na puede mong aboton. Hingoahon na makanood nin bagong bagay manongod sa mga karakter sa Biblia. Makakakua ka nin interesanteng marhay na detalye manongod sa dakol sa sainda paagi sa pagkonsulta sa Insight on the Scriptures o Watch Tower Publications Index. Mantang namimidbid mo an mga lalaki asin babae sa Biblia bilang tunay na mga tawo na may personalidad asin pagmate, sinda magigin buhay sa isip mo.

Maghanap nin bagong mga paagi kun paano mangangatanosan base sa Kasuratan. (Gibo 17:2, 3) Iyan an nasa isip ni Sophia kun sia nag-aadal. “An gusto ko iyo na makanood asin makagibo nin bagong pangangatanosan na magagamit sa sakong ministeryo asin sa ibang panahon, tanganing malinaw kong ikapahayag an mga katotoohan sa Biblia. An Torrengbantayan ekselenteng pantabang tanganing magibo iyan,” an sabi nia.—2 Tim. 2:15.

Iladawan sa isip an mga pagkasaysay sa Biblia. “An tataramon nin Dios buhay,” an sabi kan Hebreo 4:12. Mantang binabasa mo an Kasuratan, gibohon na buhay sa isip mo an mensahe nin Dios paagi sa pag-imahinar sa kun ano an naheheling kan mga karakter sa Biblia. Hingoahon na imahinaron kun ano an nadadangog asin namamatean ninda. Ikonektar an mga eksperyensia ninda sa espesipikong mga kamugtakan sa buhay mo.  Makanood sa kun paano ninda inatubang an mga situwasyon. Makakatabang ini na orog mong masabotan asin magirumdoman an mga pagkasaysay sa Biblia.

Tawan nin panahon an masakit na mga teksto asin paliwanag dapit dian tanganing malinaw mong masabotan iyan. Magtagama ka nin igong panahon para sa kada pag-adal. Posible nanggad na may maagihan kang interesanteng marhay na mga hapot na nangangaipo nin dagdag na pagsiyasat. Magsiyasat man dapit sa bakong pamilyar na mga termino, estudyaran an mga nota sa ibaba, asin basahon an mga cross-reference sa Biblia. Mantang orog mong nasasabotan an binabasa mo asin inaaplikar iyan, orog man na ikakaogma mong marhay an nasusurat na Tataramon nin Dios. Huli kaiyan, masasabi mo man arog kan salmista: “Inako ko an mga pagirumdom mo [Jehova] bilang pagsadiri ko sagkod sa panahon na daing talaan, huling iyan an labi-labing kagayagayahan kan puso ko.”—Sal. 119:111.

Dai maghidali sa pag-adal. Magin rasonable dapit sa kun gurano kadakol na panahon an iniiskedyul mo para sa personal na pag-adal. Dapat na igwa ka man nin panahon para sa pag-andam sa mga pagtiripon. “Dakol na beses na natetension nanggad ako kaya dai ako nakakakonsentrar,” an sabi ni Raquel. “Kaya kapakipakinabang para sa sako an halipot sanang pag-adal. Nakakatabang ini sa sako na makanood nin lubos sa pag-adal ko.” Inadmitir ni Chris: “Kun naghihidali ako, nakokonsensia ako huling dikiton sana an natatandaan ko. Sa parate, dai nakakaabot sa puso ko an inadalan ko.” Kun siring, dai maghidali.

Magkaigwa nin orog na pagmawot sa tataramon nin Dios. Si Pedro nagsabi: “Bilang mga omboy na bagong mamundag, magkaigwa kamo nin paghidaw sa daing halong gatas kan tataramon, tanganing paagi kaiyan magtalubo kamo sa kaligtasan.” (1 Ped. 2:2) Dai kaipuhan kan mga omboy na magpatalubo nin pagmawot sa gatas. Natural na iyan sa sainda. Alagad sinasabi kan Kasuratan na talagang kaipuhan niatong magkaigwa nin pagmawot sa tataramon nin Dios. Kun nagbabasa ka nin dawa sarong pahina kan Biblia aroaldaw, dai mahahaloy magkakaigwa ka kan pagmawot na iyan. Dai mahahaloy, magigin kawiliwili an garo baga depisil kan primero.

Horophoropon an mga teksto. Dakula man an pakinabang sa paghorophorop sa binasa mo. Makakatabang ini na maheling kun paano magkakakonektar an espirituwal na mga temang napag-adalan mo. Dai mahahaloy, makakatipon ka nin espirituwal na kadonongan na siring sa kuintas na perlas—sarong nakakaogmang marhay na pagsadiri.—Sal. 19:14; Tal. 3:3.

 Bawi Man an Panahon

Kaipuhan an paghihingoa tanganing mapagdanay an marahay na ugale sa pag-adal, pero kadakol kan mga bendisyon huli kaiyan. Sa siring, mas mararom an espirituwal na pakasabot mo. (Heb. 5:12-14) An pakamansay asin kadonongan na nakukua mo hale sa ipinasabong na Kasuratan nagtatao nin kaogmahan, kagayagayahan, asin katoninongan. An kadonongan, na nasa ipinasabong na Tataramon nin Dios, “kahoy nin buhay” para sa mga nag-aaprobetsar asin nag-aaplikar kaiyan.—Tal. 3:13-18.

Paagi sa hararom na pag-adal sa Tataramon nin Dios, puede kang magkaigwa nin pusong may pakasabot. (Tal. 15:14) Makakatabang iyan na makatao ka nin odok sa pusong hatol na marigon na nakabasar sa Biblia. Kun gigibohon mong giya sa pagdesisyon an nababasa mo sa Kasuratan asin sa mga publikasyon kan “maimbod asin mapagmansay na oripon,” makakamtan mo an nakakaginhawa asin nakakaparigon na impluwensia kan ipinasabong na Tataramon ni Jehova. (Mat. 24:45) Ika magigin mas positibo, mapaglaom sa marahay, asin espirituwal an kaisipan. Apuera dian, magigin mapanggana an gabos na bagay may koneksion sa relasyon mo sa Dios.—Sal. 1:2, 3.

An pusong pano nin pagkamoot sa Dios mapahiro sa saimo na ipakipag-olay sa iba an dapit sa pagtubod mo. Ini puede man na magin nakakakontentong marhay. Si Sophia naghihingoang mapaoswag an paggirumdom asin paggamit nin manlaenlaen na teksto tanganing makua an atension nin mga kagharong saka magin epektibo patin nakakaogma an ministeryo nia. “Nakakaogmang marhay na maheling an reaksion nin mga tawo sa mga sinasabi sa Biblia,” an sabi nia.

Pero, an pinakamarahay na pakinabang sa pagkaogmang marhay sa Tataramon nin Dios iyo an dayupot na relasyon ki Jehova. An pag-adal sa Biblia nakakatabang sa saimo na maaraman an mga pamantayan nia asin mapahalagahan an pagkamoot, pagkamatinao, asin hustisya nia. Mayo na nin ibang gibohon na mas mahalaga o mas nakakakontento. Lubos mong tawan nin panahon an pag-adal sa Tataramon nin Dios. Talagang bawi man an panahon sa paggibo kaiyan.—Sal. 19:7-11.

[Kahon/Mga Ritrato sa pahina 5]

PAGBASA KAN TATARAMON NIN DIOS: MGA PASOHAN ASIN PAMAMAAGI

▪ Mamibi bago magbasa kan Biblia asin magkonsentrar sa pagbasa.

▪ Pahalagahan an nanonodan mo.

▪ Gumibo nin mga pasohan na puede mong aboton.

▪ Maghanap nin bagong mga paagi kun paano mangangatanosan base sa Kasuratan.

▪ Iladawan sa isip an mga pagkasaysay sa Biblia.

▪ Tawan nin panahon an masakit na mga teksto asin paliwanag dapit dian tanganing malinaw mong masabotan iyan.

▪ Dai maghidali sa pag-adal.

▪ Magkaigwa nin orog na pagmawot sa tataramon nin Dios.

▪ Horophoropon an mga teksto.

[Ritrato sa pahina 4]

Kun nagbabasa nin pagkasaysay sa Biblia, imahinara an sadiri mo na nasa kaagid na situwasyon