Nagigirumdoman Mo daw?

Maingat mo daw na binasa an dai pa sana nahahaloy na mga isyu kan An Torrengbantayan asin The Watchtower? Bueno, helinga kun masisimbag mo an minasunod na mga hapot:

• Ano an tolong mahalagang bagay na makakatabang sa sato na malabanan an ano man na tendensia na mandaya?

Iyan iyo an: (1) Pagpatalubo nin tamang pagkatakot sa Dios. (1 Ped. 3:12) (2) Pagpatalubo nin konsensiang sinanay sa Biblia. (3) Pagmamaigot na makamate nin pagkakontento.—4/15, pahina 6-7.

• Paano niato naaraman na an pagigin seryoso sa paglilingkod sa Dios dai nangangahulogan na pirmeng naheheling sa sato an pagkaestrikto o linilikayan na niato an pagrelaks?

Puede tang arogon an halimbawa ni Jesus. Ikinaogma nia an pagrelaks mantang nagkakakan kaiba nin iba. Aram niato na sia bakong sobra kaseryoso o estriktohon. An iba, dawa an mga aki, naparani asin pamugtak an boot sa saiya.—4/15, pahina 10.

• Ano an puedeng gibohon nin mag-agom kun garo baga luminuya an saindang relasyon poon kan sinda magkaigwa nin mga aki?

Kaipuhan nindang patunayan liwat an pagkamoot ninda sa lambang saro. Puedeng pagmaigotan nin agom na lalaki na tabangan an saiyang agom na mahale an ano man na tibaad ikinakatakot asin ikinakahadit kaini. Asin an duwa kaipuhan na maghingoang magkaigwa nin marahay na komunikasyon manongod sa emosyonal asin pisikal na mga pangangaipo ninda.—5/1-E, pahina 12-13.

• Ano an boot sabihon kan ilustrasyon dapit sa poon nin olibo sa Roma kapitulo 11?

An poon nin olibo igwa nin koneksion sa sekondaryong kabtang kan banhi ni Abraham, an espirituwal na Israel. Si Jehova siring sa gamot asin si Jesus siring sa hawak kan simbolikong poon na ini nin olibo. Kan isikwal si Jesus kan kadaklan sa mga Judio sa laman, an mga Gentil na nagturubod puedeng isugpon sa hawak, asin sa siring makokompleto an bilang kan sekondaryong kabtang kan banhi ni Abraham.—5/15, pahina 22-25.

• Ano an nangorognang maogmang bareta na puede tang ikapaabot sa mga dukha?

An maogmang bareta iyo ini: Ninombrahan nin Dios si Jesus bilang Hade. Sia an pinakaangay na Tagapamahala na mahale kan kadukhaan. Taano? Huling sia mamamahala sa bilog na katawohan asin may kapangyarihan na gumibo nin aksion; sia may pagmalasakit sa mga dukha; saka kaya niang haleon an dahelan nin kadukhaan, an satong minanang tendensia na magin makasadiri.—6/1-E, pahina 7.

• Ano an boot sabihon ni Jesus kan sia magsabi ki Caifas: “Ika an nagsabi”?—Mat. 26:63, 64.

Minalataw na an mga tataramon na “ika an nagsabi” komun na idioma nin mga Judio na an boot sabihon totoo. Si Jesus hinapot kan Halangkaw na Saserdoteng si Caifas kun baga Sia an Cristo, an Aki nin Dios. An simbag ni Jesus na: “Ika an nagsabi” nangangahulogan nin iyo.—6/1-E, pahina 18.

• Puede daw na magin kabtang kan pantubos an mga puedeng maggikan sa perpektong tawo na si Jesus?

Dai. Minsan ngani puede kutanang paggikanan si Jesus nin binilyon na perpektong tawo, sinda bakong kabtang kan pantubos. An perpektong buhay sana ni Jesus an katimbang kan ki Adan. (1 Tim. 2:6)—6/15, pahina 13.

• Paano ikakapaheling nin mga Kristiano na isinasapuso ninda an patanid manongod sa bakong tunay na mga paratokdo na nasa Guibo 20:29, 30?

Dai ninda pinapadagos sa saindang harong an bakong tunay na mga paratokdo ni tinitino man sinda. (Roma 16:17; 2 Juan 9-11) Linilikayan nin mga Kristiano an mga publikasyon nin mga apostata, an mga programa sa TV na nagtatampok sa sainda, asin an mga Web site na igwa kan mga katokdoan ninda.—7/15, pahina 15-16.

• Siisay an maninigong magtokdo sa mga aki manongod sa Dios?

An ama asin ina maninigo na makikabtang sa paggibo kaiyan, kaoyon kan mga hatol na nasa Biblia. (Tal. 1:8; Efe. 6:4) Ipinapaheling nin pagsiyasat na positibo an epekto sa mga aki kun parehong kalabot an mga magurang.—8/1-E, pahina 6-7.