Ikinakaogma Kong Marhay an Paglilingkod ki Jehova

Isinaysay ni Fred Rusk

Kan ako aki pa naeksperyensiahan ko na an pagigin totoo kan sinabi ni David sa Salmo 27:10: “Minsan an sakuyang ama asin sakuyang ina pabayaan ako, si Jehova minsan siring poponponon [‘aamponon,’ NW] ako.” Togotan mo akong isaysay kun paano ini nagin totoo sa sako.

NAGDAKULA ako sa tanoman nin gapas kan sakong lolo sa estado nin Georgia, E.U.A., durante kan Grabeng Krisis (Great Depression) kan dekada nin 1930. An sakong ama—na grabe an kamondoan huli sa pagkagadan kan sakong ina asin bagong mamundag na tugang na lalaki—winalat ako sa saiyang balong ama asin nagbalyo sa harayong siudad tanganing magtrabaho. Kan huri, pirang beses na prinobaran niang paibanon ako sa saiya, alagad nungka ining nangyari.

An matuang mga aking babae ni lolo an nag-aasikaso kan pamilya. Minsan ngani sia bakong relihioso, an mga aki niang babae debotong Southern Baptist. Huli sa takot na pakolon, napipiritan akong magsimba kada Domingo. Kaya poon kan ako aki pa, daing gayo ako interesado sa relihion. Minsan siring, ikinakaogma ko an pag-eskuela asin mahilig ako sa isport.

An Pagbisita na Buminago sa Buhay Ko

Sarong hapon kan 1941, kan 15 anyos na ako, nagbisita sa samong harong an sarong may edad na lalaki kaiba an agom nia. Ipinamidbid sia sa sako bilang “Tiyo Talmadge Rusk.” Dai ko pa noarin man nadangog an ngaran nia, alagad naaraman ko na sinda Saksi ni Jehova. An paliwanag nia manongod sa katuyohan nin Dios na an mga tawo mabuhay sagkod lamang sa daga laen nanggad sa nadangog ko sa simbahan. An sinabi nindang iyan hinaboan—hinamak pa ngani—kan kadaklan na miembro kan pamilya. Nungka na sindang inako giraray sa harong. Minsan siring, an sakong Tiya Mary, na matua sana sa sako nin tolong taon, nag-ako nin Biblia saka mga publikasyon na nakakatabang sa pagpaliwanag dapit dian.

Si Tiya Mary nakombensir tolos na nakua na nia an katotoohan sa Biblia asin nabautismohan kan 1942. Naeksperyensiahan man nia an ihinulang ini ni Jesus: “An magña kaiwal nin tauo iyo man sana an magña kairiba nia sa saiyang harong.” (Mat. 10:34-36) Grabe an pagkontra kan pamilya. An saro niang matuang tugang na babae, na prominente sa mga aktibidad kan distrito, nakipagkasapakat sa alkalde asin ipinaaresto si Tiyo Talmadge. Inakusaran sia na nagpapabakal na mayong lisensia. Nasentensiahan sia.

Ibinareta sa diaryo kan banwaan mi na an alkalde, na iyo man an huwes, nagsabi sa korte kan siudad: “An babasahon na idinidistribwir kan lalaking ini . . . siring kapeligroso nin hilo.” Nanggana  an tiyo ko sa kaso kan sia mag-apelar, alagad sampulong aldaw na siang napreso.

Kun Paano Ako Tinabangan ni Tiya Mary

Apuera sa pakikipag-olay sa sako ni Tiya Mary manongod sa bagong pagtubod nia, sia naghulit man sa pagtaraed mi. Nag-iba ako sa pagkondukta nia nin pag-adal sa Biblia sa sarong lalaki na nag-ako kan librong The New World. * Sinabi kan agom kan lalaki na iyan magdamlag kaining binasa. Minsan ngani habo kong maimbuelto tolos sa ano man na may koneksion sa relihion, nagigin interesante sa sako an nanonodan ko. Minsan siring, sa pangenot bakong katokdoan sa Biblia an nakakombensir sa sako na an mga Saksi an banwaan nin Dios, kundi an nagin pagtratar sa sainda nin iba.

Halimbawa, sarong aldaw mantang papuli kami ni Tiya Mary hale sa paggudak sa samong tanoman nin kamatis, naheling mi an ebidensia sa nag-aaso pang suloan nin basura na sinulo kan mga tugang niang babae an saiyang mga babasahon, kaiba na an sarong ponograpo asin mga plaka na may mensahe hale sa Biblia. An grabeng kaanggotan ko orgolyosong sinimbag nin sarong tiya ko, “Pag-abot nin panahon, papasalamatan mo kami sa ginibo mi.”

Napiritan si Tiya Mary na humale sa harong kan 1943 huling habo niang talikdan an bagong pagtubod asin magpondo sa paghuhulit sa pagtaraed. Kan panahon na iyan, ikinaogma kong manodan na an Dios bako sanang may ngaran na Jehova, kundi sia man mamomoton asin mapagmalasakit na Dios, na dai sinusulo an mga tawo sa nagkakalayong impierno. Nanodan ko man na si Jehova may mamomoton na organisasyon, minsan ngani dai pa ako nakaatender nin pagtiripon.

Dai nahaloy, mantang nagtatabas ako kan lawn gamit an sarong mower, sarong auto an nagmenor dangan hinapot ako kan saro sa duwang lalaking nakasakay kun ako si Fred. Kan maaraman ko na mga Saksi sinda, an sabi ko, “Pasakayon nindo ako, asin magduman kita sa sarong lugar na makakapag-olay kita nin pribado.” Iinareglo ni Tiya Mary na dalawon ninda ako. Saro sa sainda si Shield Toutjian, nagbibiaheng ministro na nagtao sa sako nin pagparigon sa boot asin espirituwal na giya sa tamang panahon. Ako na ngonyan an kinokontra kan pamilya huling idinedepensa ko an mga tinutubod kan Mga Saksi ni Jehova.

Si Tiya Mary nagsurat sa sako hale sa Virginia, na duman sia nagbalyo, asin nagsabi na kun determinado akong maglingkod ki Jehova, puede akong mag-istar duman kaiba nia. Tolos-tolos akong nagdesisyon na magduman. Sarong Biernes na banggi kan Oktubre 1943, ibinugtak ko sa sarong kahon an importanteng mga gamit ko asin iginakod iyan sa sarong poon nin kahoy na haroharayo sa harong mi. Kinaagahan, binalikan ko an kahon, uminagi sa ibang dalan pasiring sa harong kan kataed mi, dangan nagbiahe pasiring sa  banwaan. Pag-abot ko sa siudad nin Roanoke, yaon si Tiya Mary sa harong ni Edna Fowlkes.

Pag-oswag sa Espirituwal, Bautismo, Asin Bethel

Si Edna mapagmalasakit na linahidan na Saksi—sarong Lidia sa presenteng panahon—na nag-arkila nin dakulang harong asin apuera ki Tiya Mary, pinaistar duman ni Edna an saiyang hipag, saka an duwang aking babae kaini. Kan huri, an duwang aking ini—si Gladys asin Grace Gregory nagin misyonera. Si Gladys, na labing 90 anyos na ngonyan, maimbod pa man giraray na naglilingkod sa sangang opisina kan Hapon.

Mantang nakaistar sa harong ni Edna, regular akong nag-aatender sa mga pagtiripon asin natatawan nin pagsasanay sa ministeryo. Huling libre akong mag-adal kan Tataramon nin Dios asin mag-atender sa mga pagtiripon, orog na napapanigoan ko an pagmawot sa espirituwal na mga bagay. Nabautismohan ako kan Hunyo 14, 1944. Nagpoon na magpayunir si Tiya Mary asin an magtugang na Gregory, dangan idinestino sinda sa amihanan na parte kan Virginia. Duman nakatabang sinda sa pag-establisar nin kongregasyon sa Leesburg. Kan enot na kabtang kan 1946, nagpoon akong magpayunir sa kaharaning distrito. Kan tig-init kan taon na iyan, magkairiba kaming nagbiahe pasiring sa dai malilingawan na internasyonal na kombension sa Cleveland, Ohio, kan Agosto 4-11.

Sa kombension na iyan, sinabi ni Nathan Knorr, na nangengenot sa organisasyon kaidto, an planong pagpahiwas kan Bethel sa Brooklyn. Kaiba digdi an pagtogdok nin bagong residensia asin dagdag na edipisyo sa pag-imprenta. Dakol na hoben na tugang na lalaki an kaipuhan. Nagdesisyon ako na duman ko gustong maglingkod ki Jehova. Kaya itinao ko an sakong aplikasyon, asin pakalihis nin pira sanang bulan, kan Disyembre 1, 1946, inapod ako sa Bethel.

Pakalihis nin mga sarong taon, si Max Larson, na paraataman sa imprentahan, dinumanan ako sa Mailing Department. Sinabihan nia ako na iaasignar ako sa Departamento sa Paglilingkod. Sa asignasyon na iyan, dakol akong nanodan manongod sa pag-aplikar kan mga prinsipyo sa Biblia asin pagpunsionar kan organisasyon, nangorogna kaidtong katrabaho ko si T. J. (Bud) Sullivan, an paraataman sa departamento.

Nagkapirang beses akong binisita sa Bethel kan sakong ama. Kan sia naggugurang na, sia nagin panatiko sa paniniwala nia. Kan huri niang pagbisita, kan 1965, sia nagsabi: “Puede mo akong bisitahon, alagad nungka na akong mabisita giraray digdi.” Pirang beses ko siang binisita bago sia magadan. Sia nakakasierto na sia mapalangit. Naglalaom ako na sia yaon sa memorya ni Jehova, asin kun iyo, sia bubuhayon liwat, bakong sa lugar na hinohona nia, kundi digdi sa daga na may paglaom na mabuhay sagkod lamang sa ibinalik na Paraiso.

 Iba Pang Dai Malilingawan na mga Kombension Asin Pagtogdok

An mga kombension mahahalagang pangyayari na pirmeng nagreresulta sa pag-oswag sa espirituwal. Nangorognang totoo iyan sa internasyonal na mga kombension sa Yankee Stadium sa Nueva York kan dekada nin 1950. Sa sarong sesyon kan 1958, an Yankee Stadium asin Polo Grounds napano nin 253,922 na nag-atender hale sa 123 na kadagaan. Nungka kong malilingawan an sarong pangyayari sa kombension na iyan. Mantang nagtatabang ako sa opisina kan kombension, si Tugang na Knorr naghihidaling nagdolok sa sako. “Fred,” an sabi nia, “nalingawan ko palan na mag-asignar nin tugang na makikipag-olay sa gabos na payunir na nagkakatiripon na ngonyan sa inarkilang kaharaning banquet hall. Puede daw na maghidali ka asin tawan mo sinda nin magayon na pahayag base sa kun ano an maiisip mo mantang paduman ka?” Nagparapamibi ako bago makaabot duman, na haros dai makahangos.

Huling marikas na nagdakol an mga kongregasyon sa Siudad kan Nueva York kan dekada nin 1950 asin 1960, kulang na an mga pasilidad na puedeng arkilahon tanganing magin Kingdom Hall. Kaya poon 1970 sagkod 1990, tolong edipisyo sa Manhattan an binakal asin rinemodel tanganing magin angay na lugar nin pagtiripon. Ako an tsirman kan mga komite sa pagtogdok para sa mga proyektong ini asin dakol na nakakaogmang bagay an nagigirumdoman ko kun paano abundang binendisyonan ni Jehova an mga kongregasyon na nagtarabang sa gastos asin pagtapos kan mga edipisyong ini; sagkod ngonyan ini nagseserbing sentro nin tunay na pagsamba.

Mga Pagbabago sa Buhay

Sarong aldaw kan 1957, uminoran mantang naglalakaw ako sa parke na nasa pag-oltanan kan Erokan na Bethel asin imprentahan. Sa enotan ko, naheling ko an sarong bagong Bethelite na babae na magayon asin bulaw an buhok. Mayo sia nin payong, kaya pinasukob ko sia. Arog kami kaiyan nagkamidbidan ni Marjorie, asin poon kan kasalon kami kan 1960, maogma kaming naglilingkod ki Jehova na magkaibanan, maoran man o mainit, sabi ngani. Kan Setyembre 2010 isinelebrar mi an samong ika-50 taon bilang mag-agom.

Dai pa kami nakakapakaray kan bagahe mi hale sa honeymoon kan sabihan ako ni Tugang na Knorr na inasignaran akong magin instruktor sa Paadalan nin Gilead. Espesyal nanggad na pribilehio iyan! Poon 1961 sagkod 1965, nagkaigwa nin limang mas halawig na klase na kompuesto sa pangenot nin mga nagtatrabaho sa sangang opisina na espesyal na sinanay sa pag-asikaso sa sangang opisina. Kan tigrakdag nin 1965, ibinalik giraray sa limang bulan an lawig kan klase, asin iyan nakasentro liwat sa pagsasanay sa mga misyonero.

Kan 1972, ibinalyo ako hale sa Paadalan nin Gilead pasiring sa Writing Correspondence Department, na ako an nagin paraataman. An  pagsiyasat tanganing matawan nin atension an manlaenlaen na hapot asin problema nakatabang sa sako na orog na masabotan an katokdoan kan Tataramon nin Dios asin kun paano iaaplikar an halangkaw na mga prinsipyo kan satong Dios sa pagtabang sa iba.

Dangan, kan 1987, iinasignar ako sa bagong departamento na Hospital Information Services. Nag-areglo nin mga seminar tanganing tokdoan an mga magurang sa kongregasyon na miembro kan Hospital Liaison Committee kun paano ipapakipag-olay sa mga doktor, huwes, asin social worker an satong sono sa Kasuratan na paninindogan dapit sa dugo. An sarong dakulang problema iyo na an mga aki sinasalinan nin mga doktor na mayong permiso kan mga magurang, asin sa parate nagkukua sinda nin mandamiento kan korte tanganing magibo iyan.

Kun nagsusuherir sa mga doktor nin mga alternatibo sa pagsalin nin dugo, an parateng simbag ninda iyo na mayong makukua kaiyan o mahalon iyan. Ini an parate kong simbag sa siruhanong nagsasabi kaiyan, “Paheling tabi kan kamot nindo.” Dangan masabi ako, “Aram nindo, saro iyan sa pinakamarahay na alternatibo sa dugo.” An komendasyon na ini nagpapagirumdom sa saiya kan bagay na aram na aram nia—na an maingat na paggamit kan kasangkapan na pang-operar na inaapod na scalpel nakakatabang na malimitaran an pagdugo.

Durante kan nakaaging duwang dekada, abundang binendisyonan ni Jehova an mga paghihingoang ini na matawan nin impormasyon an mga doktor asin huwes. Nagbago nanggad an saboot ninda kan orog nindang masabotan an paninindogan niato. Nanodan ninda na an medikal na pagsiyasat nagpapatunay na epektibo an mga alternatibo sa dugo asin na dakol na nakikikooperar na doktor saka ospital an puedeng dumanan nin pasyente.

Poon 1996, kami ni Marjorie naglilingkod sa Watchtower Educational Center sa Patterson, Nueva York, na mga 110 kilometros sa amihanan kan Brooklyn. Digdi, nagtrabaho ako nin halipot na panahon sa Departamento sa Paglilingkod dangan sa laog nin sarong panahon nagtokdo sa mga nagtatrabaho sa sangang opisina asin nagbibiaheng mga paraataman. Sa laog nin 12 taon na, naglilingkod giraray ako bilang paraataman kan Writing Correspondence, na ibinalyo sa Patterson hale sa Brooklyn.

Mga Kadepisilan sa Paggurang

Kan mag-85 anyos na ako, nagin mas depisil para sa sako an pag-asikaso kan sakong mga pribilehio nin paglilingkod sa Bethel. Labi nang sampulong taon akong nakikipaglaban sa kanser. An pagmate ko garo ako si Ezequias, na dinagdagan ni Jehova an lawig nin buhay. (Isa. 38:5) Nagluluya na man an salud kan sakong agom, asin magkaibanan ming inaatubang an saiyang Alzheimer’s disease. Si Marjorie sarong may kakayahan na ministro ni Jehova, parasadol sa mga hoben, asin maimbod na katabang saka kaibaiba ko. Sia marahay nanggad na paraadal asin paratokdo kan Biblia, saka dakol na espirituwal na aki an padagos na nakikikomunikar sa samo.

Nagadan si Tiya Mary kan Marso 2010 sa edad na 87. Sia nagin matibay na paratokdo kan Tataramon nin Dios asin nakatabang sa iba na manindogan para sa tunay na pagsamba. Dakol na taon an ginamit nia sa bilog na panahon na ministeryo. Nagpapasalamat akong marhay huli sa pagtabang nia sa sako na manodan an katotoohan kan Tataramon nin Dios asin magin arog sa saiya, sarong lingkod kan satong mamomoton na Dios, si Jehova. Ilinobong si Tiya Mary sa kataed kan lolobngan kan saiyang agom, na dating misyonero sa Israel. Kompiado ako na sinda nasa memorya ni Jehova na naghahalat kan pagkabuhay liwat.

Mantang ginigirumdom ko an labing 67 taon na paglilingkod ki Jehova, nagpapasalamat ako sa abundang bendisyon na itinatao sa sako. Ikinakaogma kong marhay an paggibo kan kabotan ni Jehova! Huling nagtitiwala ako sa dai na kutana maninigong kabootan nia, odok akong naglalaom na makamtan an panuga kan saiyang Aki: “An siisay man na nagbaya nin magña harong, o magña tugang na lalaki, o magña tugang na babae, o ama, o ina, o magña aki, o magña daga, dahel sa gñaran ko, maako nin [mananggatos], asin magmamana kan buhay na daing katapusan.”—Mat. 19:29.

[Nota sa Ibaba]

[Ritrato sa pahina 19]

Sa tanoman nin gapas kan sakong lolo sa Georgia, E.U.A., kan 1928

[Ritrato sa pahina 19]

Si Tiya Mary asin Tiyo Talmadge

[Ritrato sa pahina 20]

Si Tiya Mary, Gladys, asin Grace

[Ritrato sa pahina 20]

Kan bautismohan ako kan Hunyo 14, 1944

[Ritrato sa pahina 20]

Sa Departamento sa Paglilingkod sa Bethel

[Ritrato sa pahina 21]

Kami ni Tiya Mary sa internasyonal na kombension kan 1958 sa Yankee Stadium

[Ritrato sa pahina 21]

Kan aldaw kan samong kasal ni Marjorie

[Ritrato sa pahina 21]

Kan 2008