Kapakipakinabang daw an Pag-aling-aling Nindo?

“Baloon kun ano an nakakaogma sa Kagurangnan.”—EFE. 5:10.

1, 2. (a) Paano ipinaparisa kan Tataramon nin Dios na gusto ni Jehova na ikaogma niato an buhay? (b) Kun an pag-aling-aling ibinibilang niato na “balaog nin Dios,” mapahiro iyan sa sato na gibohon an ano?

SA BILOG na Biblia, dakol kitang mababasa na nagpaparisa na gusto ni Jehova na kita bako sanang mabuhay kundi ikaogma man iyan. Halimbawa, an Salmo 104:14, 15 nagsasabi na ‘pinapatunga ni Jehova an kakanon sa daga, asin an arak na nagpapagayagaya sa puso nin magagadanon na tawo, tanganing pakintabon nin lana an lalawgon, asin an tinapay na nakakabuhay sa puso nin magagadanon na tawo.’ (NW) Tunay nanggad na pinapatubo ni Jehova an mga pananom tanganing magkaigwa kita nin tipasi, lana, asin arak na masustenir sa sato. Alagad an arak ‘nagpapagayagaya man sa puso.’ Dawa ngani dai man talaga iyan kaipuhan tangani kitang mabuhay, nakakapagayagaya iyan sa sato. (Par. 9:7; 10:19) Iyo, gusto ni Jehova na kita maggayagaya, na an puso pano nin “kaogmahan.”—Gui. 14:16, 17.

² Kun siring, mayo kitang dahelan na makonsensia kun paminsanminsan nag-iiskedyul kita nin panahon tanganing ‘masdan an mga gamgam sa langit’ asin “an mga lirio sa oma” o ikaogma an iba pang aktibidad na nakakapaginhawa sa sato saka ginigibong mas marahay an buhay niato. (Mat. 6:26, 28; Sal. 8:3, 4) An maogma asin marahay na buhay “balaog nin Dios.” (Par. 3:12, 13) Kun an panahon para sa paglilibang ibinibilang niato na kabtang kan balaog na iyan, mapapahiro kitang gamiton iyan sa paaging makakapaogma sa Kagtao kaiyan. *

Laen-Laen Asin May Limitasyon

3. Taano ta rasonable na laen-laen an aling-alingan na gusto nin mga tawo?

³ An mga may timbang na pagmansay sa aling-alingan nagpipili nin laen-laen na klase kaiyan, alagad aram man ninda na kaipuhan nin limitasyon. Taano man? Tanganing masimbag iyan, ikomparar niato sa kakanon an libangan. Manlaenlaen an paboritong putahe sa iba-ibang parte kan kinaban. Sa katunayan, an gustong-gusto sa sarong lugar tibaad bakong masiram para sa mga nasa ibang lugar. Sa kaagid na paagi, an aling-alingan na nakakaogma sa mga Kristiano sa sarong parte kan kinaban tibaad dai nakakaogma sa mga Kristiano sa ibang lugar. Dawa sa mga Kristiano na nakaistar sa sarong lugar, an nakakarelaks para sa saro (arog kan pagbasa nin magayon na libro), tibaad bakong kawiliwili para sa iba; an nakakapaginhawa para sa saro (arog nin pagbisikleta sa lugar na may magayon na tanawon), tibaad nakakapagal para sa iba. Kaya, minaoyon kita na kun dapit sa mga bagay na arog nin kakanon asin aling-alingan, puedeng laen-laen an gusto kan kada saro.—Roma 14:2-4.

4. Taano ta kaipuhan tang magbugtak nin limitasyon sa klase nin aling-alingan na pinipili niato? Iilustrar.

⁴ Minsan siring, aram man niato na dawa puede kitang pumili nin laen-laen na aling-alingan, dai kita kaipuhan magpangana. Sa pag-ilustrar, isip-isipa giraray an halimbawa dapit sa kakanon. Minsan ngani gusto tang magkakan nin manlaenlaen na klase kaiyan, dai kita tuyong makakan nin raot na. Natural sanang lilikayan niato iyan huling makakaraot iyan sa satong salud. Kaagid kaiyan, minsan ngani puede sa sato an manlaenlaen na klase nin marahay na libangan, lilikayan niato an mga aktibidad na  nagsasapeligro kan buhay, madahas, o nakakaraot sa moral. An pakikikabtang sa siring na mga aktibidad bakong kaoyon kan mga prinsipyo sa Biblia asin magsasapeligro kan satong pisikal o espirituwal na salud. Tanganing masierto na dai kita malampas sa rasonableng limitasyon, marahay na patienot tang aramon kun baga kapakipakinabang o dai an aling-alingan na gusto niato. (Efe. 5:10) Paano niato iyan magigibo?

5. Paano niato maaaraman kun baga an pag-aling-aling niato kaoyon kan mga pamantayan nin Dios?

⁵ Tanganing an pag-aling-aling magin kapakipakinabang sa sato asin nakakaogma ki Jehova, dapat na kaoyon iyan kan espesipikong mga pamantayan sa Tataramon nin Dios. (Sal. 86:11) Tanganing maaraman man kun baga totoo iyan sa klase nin aling-alingan na gusto nindo, puede kamong gumamit nin sarong simpleng listahan. An listahan may tolong hapot na puedeng pahalipoton paagi sa mga terminong ano, noarin, asin sairisay. Saro-saro tang pag-olayan iyan.

Ano an Kaiba Dian?

6. Anong libangan an dapat tang haboan, asin taano?

⁶ Bago maglibang, an enot na dapat mong ihapot sa sadiri iyo an Ano?—an boot sabihon, ‘Ano an kaiba sa libangan na gusto ko?’ Mantang inaaram mo an simbag, makakatabang kun isasaisip mo na sa pangenot may duwang kategoriya an libangan. An enot kaiyan habo tang gibohon; an ikaduwa, puede man gibohon. Ano an kaiba sa enot? Sa maraot na kinaban na ini, an kadaklan na libangan may mga aktibidad na hayag na nagbabalga sa mga prinsipyo sa Biblia o ley nin Dios. (1 Juan 5:19) Marigon na hinahaboan kan tunay na mga Kristiano an gabos na siring na libangan. Kaiba dian an mga nagtatampok nin pagkasadista, demonismo, homoseksuwalidad, pornograpiya, o kadahasan o nag-oomaw sa iba pang makababalde asin imoral na gibo. (1 Cor. 6:9, 10; basahon an Kapahayagan 21:8.) Saen man kita, pinapatunayan niato ki Jehova na ‘ikinakaongis niato an maraot’ paagi sa paglikay sa siring na libangan.—Roma 12:9; 1 Juan 1:5, 6.

7, 8. Paano niato sisiyasaton an kalidad nin libangan? Iilustrar.

⁷ Kaiba sa ikaduwang kategoriya an mga libangan na dai nakasentro sa mga gibo na malinaw na kinokondenar sa Tataramon nin Dios. Kun siring, bago kita magpili nin libangan, maninigo tang seguradohon na iyan ibinibilang ni Jehova na marahay, arog kan ipinahayag sa mga prinsipyo sa Biblia. (Tal. 4:10, 11) Dangan kaipuhan tang gumibo nin personal na desisyon na matao sa sato nin marahay na konsensia. (Gal. 6:5; 1 Tim. 1:19) Paano niato iyan magigibo? Isip-isipon ini: Bago magkakan nin bagong putahe, gusto nguna niatong aramon kun ano an pangenot na mga sangkap kaiyan. Kaagid kaiyan, bago mag-aling-aling, kaipuhan tang siyasaton kun ano an pangenot na mga karakteristiko kaiyan.—Efe. 5:17.

⁸ Halimbawa, tibaad mahilig kamo sa isport, asin normal sana iyan. An isport nakakaogma asin nakakalibang. Pero, paano kun an kinahihiligan nindong isport may grabeng kompetisyon, sobra kapeligroso, dakol nin nakokolgan, may maribok na mga selebrasyon, nasyonalistiko, o may kaagid kaiyan na “mga sangkap”? Pagkatapos na maaraman kun ano an kaiba dian, masasabi nindo na iyan bako nanggad kaoyon kan kaisipan ni Jehova asin kan mensahe nin katoninongan saka kan pagkamoot na ihinuhulit niato sa iba. (Isa. 61:1; Gal. 5:19-21) Sa ibong na lado, kun an libangan may “mga sangkap” na marahay sa pagheling ni Jehova, iyan magigin kapakipakinabang nanggad asin makakapaginhawa sa saindo.—Gal. 5:22, 23; basahon an Filipos 4:8.

Noarin Ko Iyan Ginigibo?

9. Ano an ihinahayag kan simbag niato sa hapot na ‘Noarin ako mag-aaling-aling?’

⁹ An ikaduwa na dapat mong ihapot sa sadiri iyo an Noarin?—an boot sabihon, ‘Noarin ako mag-aaling-aling? Gurano kadakol na panahon an gagamiton ko para dian?’ An simbag niato sa  hapot na ano? naghahayag nanggad dapit sa satong mga gusto—kun ano an puede o dai puede sa sato. Minsan siring, an simbag sa hapot na noarin? nagpapaheling kan satong mga prioridad—kun ano an mahalaga asin bakong mahalaga sa sato. Kun siring, paano niato maaaraman kun baga tama sana an itinatao tang importansia sa libangan?

10, 11. Paano an sinabi ni Jesus sa Mateo 6:33 nakakatabang sa sato sa pagdesisyon kun gurano kadakol na panahon an gagamiton sa pag-aling-aling?

¹⁰ Sinabi ni Jesu-Cristo sa mga parasunod nia: “Mamotan mo an Kagurangnan mong Dios sa bilog mong puso, asin sa bilog mong kalag, asin sa bilog mong isip, patin sa bilog mong kosog.” (Mar. 12:30) Kun siring, an pagkamoot ki Jehova iyo an enot sa satong buhay. Ipinapaheling niato ini paagi sa pagsunod sa sadol ni Jesus: “Hanapa gñona nindo [‘nin padagos,’ NW] an kahadean nin Dios asin an saiyang katanosan; asin [ining] gabos na bagay idadagdag na sana saindo.” (Mat. 6:33) Paano an pananaram na iyan makakatabang sa sato na maaraman kun gurano kadakol na panahon an gagamiton niato sa pag-aling-aling asin kun guranong importansia an itatao dian?

¹¹ Mangnohon an detalyeng ini: Sinadol kita ni Jesus na padagos na ‘hanapon nguna an kahadean.’ Dai nia sinabi sa sato na ‘kahadean sana an padagos na hanapon.’ Siempre pa, aram ni Jesus na apuera sa Kahadean, dakol na bagay  sa buhay an kaipuhan tang asikasohon. Kaipuhan niato nin istaran, kakanon, bado, tama sanang edukasyon, aling-alingan, asin iba pa. Minsan siring, sa gabos na iyan saro sana an dapat enoton—an intereses kan Kahadean. (1 Cor. 7:29-31) Huli sa pangenot na dahelan na iyan, mapapahiro kitang gibohon an sekondaryong mga aktibidad, kaiba na an pag-aling-aling, sa paagi na makakatabang tanganing maotob niato an pangenot na aktibidad—an pag-asikaso sa intereses kan Kahadean. Kun gigibohon niato iyan, puedeng magin kapakipakinabang an limitadong pag-aling-aling.

12. Paano an prinsipyo sa Lucas 14:28 puedeng iaplikar sa pag-aling-aling?

¹² Kaya, kun dapit sa paggamit nin panahon para sa pag-aling-aling, marahay na patienot tang pag-isipan iyan. (Luc. 14:28) Kaipuhan tang aramon kun gurano kadakol na panahon an gagamiton para sa sarong libangan. Sunod, dapat kitang magdesisyon kun baga kapakipakinabang an panahon na gagamiton para dian. Iyan bakong kapakipakinabang kun huli sa pag-aling-aling napapabayaan na an importanteng mga aktibidad na siring kan personal na pag-adal sa Biblia, pampamilyang pagsamba, pag-atender sa mga pagtiripon, o paghuhulit. (Mar. 8:36) Alagad kun an paminsanminsan na paglilibang nagpapakosog sa sato na padagos na maasikaso an intereses kan Kahadean, masasabi niato na kapakipakinabang an panahon na ginagamit niato para dian.

Sairisay an Kaiba Ko?

13. Taano ta maninigo na maingat tang isip-isipon kun sairisay an kaiba niato sa pag-aling-aling?

¹³ An ikatolo na dapat mong ihapot sa sadiri iyo an Sairisay?—an boot sabihon, ‘Sairisay an gusto kong makaiba sa paglilibang?’ Mahalaga na isip-isipon an aspektong ini nin pag-aling-aling. Taano? Huli ta an mga tawong kaiba niato sa pag-aling-aling dakula an epekto sa kalidad kan libangan niato. Kun paanong sa parate mas nakakaogmang magkakan kun kaiba an dayupot na mga katood, totoo man iyan kun dapit sa pag-aling-aling. Huli kaini, natural sana na an dakol sa sato, nangorogna an mga hoben, naoogmang mag-aling-aling kun may kaiba. Minsan siring, tanganing masierto na magigin kapakipakinabang iyan, madonong na patienot na aramon kun sairisay an pipilion na kaiba asin kun sairisay an lilikayan.—2 Cron. 19:2; basahon an Talinhaga 13:20; Sant. 4:4.

14, 15. (a) Anong halimbawa an itinao ni Jesus sa pagpili nin tamang mga kaibaiba? (b) Ano an mga maninigo tang ihapot sa satong sadiri mapadapit sa mga kaibaiba niato?

¹⁴ Makakatabang na marhay an pag-arog sa halimbawa  ni Jesus sa pagpili nin mga kaibaiba. Poon pa sa paglalang, namomotan na ni Jesus an mga tawo. (Tal. 8:31) Mantang nasa daga, nagpaheling sia nin mamomoton na konsiderasyon sa gabos na klase nin tawo. (Mat. 15:29-37) Minsan siring, ipinaheling ni Jesus na an pagigin makiamigo laen man sa pagigin dayupot na amigo. Minsan ngani sia makikatood sa mga tawo sa pangkagabsan, dayupot sana sia sa mga nakakaotob sa espesipikong mga kahagadan. Sinabi ni Jesus sa 11 maimbod na apostol: “Kamo iyo an sakong magña katood kun kamo magguiribo kan magña ipinagboboot ko saindo.” (Juan 15:14; helingon man an Juan 13:27, 30.) An ibinilang sana ni Jesus na mga katood iyo an mga indibiduwal na nagsusunod sa saiya asin naglilingkod ki Jehova.

¹⁵ Huli kaini, madonong na girumdomon an sinabi ni Jesus kun pinag-iisipan nindo kun baga maninigo nindong pilion an sarong indibiduwal bilang dayupot na katood o dai. Hapoton an saimong sadiri: ‘Ipinapaheling daw kan indibiduwal na ini paagi sa mga tataramon asin gibo na kinukuyog nia an mga pagboot ni Jehova asin ni Jesus? An saiya daw na pamantayan sa buhay asin moralidad nakabasar sa Biblia, arog ko? An pakiibaiba ko daw sa saiya makakadagka sa sako na enoton an Kahadean asin magin maimbod na lingkod ni Jehova?’ Kun segurado kamong iyo an simbag sa mga hapot na iyan, nakanompong kamo nin marahay na kaibaiba sa paglilibang nindo.—Basahon an Salmo 119:63; 2 Cor. 6:14; 2 Tim. 2:22.

An Pag-aling-aling Niato—Pasado daw Iyan sa Pagsiyasat?

16. Ano an kaipuhan tang aramon mapadapit sa paglilibang niato?

¹⁶ Pinag-olayan niato sa halipot an tolong aspekto dapit sa libangan—kalidad, panahon, asin kairiba. Tanganing magin kapakipakinabang an pag-aling-aling niato, kaipuhan na iyan kaoyon na marhay kan pamantayan kan Biblia para sa kada saro kan mga aspektong ini. Huli kaini, bago mag-aling-aling kaipuhan tang siyasaton iyan. Kun dapit sa kalidad, gusto tang aramon: ‘Ano an kaiba dian? Iyan daw marahay o maraot?’ (Tal. 4:20-27) Mapadapit sa panahon, gusto tang aramon: ‘Gurano kadakol na panahon an gagamiton ko para dian? Iyan daw tama sana o sobra?’ (1 Tim. 4:8) May koneksion sa kairiba, kaipuhan tang aramon: ‘Sairisay an makakaiba ko sa paglilibang? Sinda daw marahay o maraot?’—Par. 9:18; 1 Cor. 15:33.

17, 18. (a) Paano niato sisiyasaton an satong sadiri tanganing maaraman kun baga an paglilibang niato kaoyon kan mga pamantayan kan Biblia? (b) Ano an determinado mong gibohon kun dapit sa pagpili nin libangan?

¹⁷ Kun an sarong klase nin paglilibang bakong kaoyon kan mga pamantayan kan Biblia para sa arin man sa tolong aspektong ini, iyan bakong pasado sa pagsiyasat. Sa ibong na lado, kun seseguradohon niato na an mga libangan niato kaoyon kan mga pamantayan kan Biblia para sa tolong aspekto, an satong pag-aling-aling magtataong onra ki Jehova asin pakinabang sa sato.—Sal. 119:33-35.

¹⁸ Kaya, kun dapit sa pag-aling-aling, pagmaigotan tang gibohon kun ano an tama sa tamang panahon kaiba kan tamang klase nin mga tawo. Iyo, logod na odok sa pusong mawoton kan lambang saro sa sato na sunodon an sadol kan Biblia: “Kun kamo kumakan, o ominom, o gumibo kamo nin anoman, guiboha nindo an gabos manogñod sa kamurawayan nin Dios.”—1 Cor. 10:31.

[Nota sa Ibaba]

Ikakapaliwanag daw Nindo?

Kun dapit sa pag-aling-aling, paano nindo ikakaaplikar an mga prinsipyo sa . . .

• Filipos 4:8?

• Mateo 6:33?

• Talinhaga 13:20?

[Mga Hapot Para sa Pag-adal]

[Diagram sa pahina 9]

(Para sa aktuwal na format, hilingon an publikasyon)

✔Ano

[Diagram sa pahina 10]

(Para sa aktuwal na format, hilingon an publikasyon)

✔Noarin

[Diagram sa pahina 12]

(Para sa aktuwal na format, hilingon an publikasyon)

✔Sairisay

[Ritrato sa pahina 10]

Paano niato maaarog an halimbawa ni Jesus sa pagpili nin mga katood asin libangan?