Mga “Nakikiistar nin Temporaryo” sa Maraot na Kinaban
Mga “Nakikiistar nin Temporaryo” sa Maraot na Kinaban
‘Sa pagtubod ini gabos nagpahayag sa publiko na sinda mga nakikihimanwa asin nakikiistar nin temporaryo sa daga.’—HEB. 11:13, NW.
1. Ano an sinabi ni Jesus manongod sa paninindogan kan mga parasunod nia kun dapit sa kinaban?
“AN MAGÑA ini nasa kinaban,” an sabi ni Jesus manongod sa mga disipulo nia. Alagad ipinaliwanag nia: “Bako sindang sa kinaban, siring sako na bakong sa kinaban.” (Juan 17:11, 14) Sa siring, malinaw na ipinarisa ni Jesus an paninindogan kan tunay na mga parasunod nia kun dapit sa “kinaban na ini” na an dios si Satanas. (2 Cor. 4:4) Minsan ngani nabubuhay sa maraot na kinaban na ini, bako sindang kabtang kaiyan. An kamugtakan ninda sa sistemang ini siring sa “mga nakikihimanwa asin nakikiistar nin temporaryo.”—1 Ped. 2:11, NW.
Sinda Namuhay Bilang mga “Nakikiistar nin Temporaryo”
2, 3. Taano ta masasabi na si Enoc, Noe, saka Abraham asin Sara namuhay bilang “nakikihimanwa asin nakikiistar nin temporaryo sa daga”?
2 Poon pa kan kaenot-enoteng mga panahon, an maimbod na mga lingkod ni Jehova laen nang marhay sa mga nasa bakong diosnon na kinaban na dian sinda namuhay. Bago kan Baha, si Enoc asin Noe “naglakao kaiba nin Dios.” (Gen. 5:22-24; 6:9) Pareho sindang makosog an boot na parahulit kan mga paghokom ni Jehova sa maraot na kinaban ni Satanas. (Basahon an 2 Pedro 2:5; Judas 14, 15.) Huling sinda naglakaw kaiba nin Dios sa bakong diosnon na kinaban, si Enoc ‘nasunoan nin Dios’ asin si Noe “naguin daing katuyauan sa saiyang magña gominikan [“kakontemporanyo,” NW].”—Heb. 11:5; Gen. 6:9.
3 Sa imbitasyon nin Dios, binayaan ni Abraham asin Sara an komportableng buhay sa Caldeong siudad nin Ur asin inako an kadepisilan bilang parabaklay sa ibang lugar. (Gen. 11:27, 28; 12:1) Si Pablo nagsurat: “Huli sa pagtubod si Abraham, kan sia apodon, nagkuyog na pumaduman sa lugar na saiyang mamanahon; asin sia naglakao na dai nakakaaram kun saen sia maduman. Huli sa pagtubod sia nakihimanua sa daga na panuga, siring sa daga na bako niang sadiri, na nageerok sa magña tolda kaiba si Isaac asin si Jacob, magña kapua-paramana nia kan iyo man sanang panuga.” (Heb. 11:8, 9) Mapadapit sa maimbod na mga lingkod na iyan ni Jehova, si Pablo nagsabi: “Sa pagtubod ini gabos nagkagaradan, minsan ngani dai ninda nakamtan an kaotoban kan mga panuga, alagad iyan natanaw ninda sa harayo asin maogmang inako iyan patin ipinahayag sa publiko na sinda mga nakikihimanwa asin nakikiistar nin temporaryo sa daga.”—Heb. 11:13, NW.
Sarong Patanid sa mga Israelita
4. Ano an ipinatanid sa mga Israelita bago sinda mag-istar sa saindang daga?
4 An mga Israelita, na naggikan ki Abraham, nagdakol asin pag-abot nin panahon nagin sarong nasyon na may daga asin kodigo nin ley. (Gen. 48:4; Deut. 6:1) Dapat na nungkang lingawan kan banwaan nin Israel na si Jehova an tunay na Kagsadiri kan saindang daga. (Lev. 25:23) Sinda siring sa mga tumatawo na obligadong igalang an kahagadan kan Kagsadiri. Apuera dian, dapat na girumdomon ninda na “an [tawo] bako sanang sa tinapay nabubuhay”; dai ninda dapat malingawan si Jehova huli sa materyal na kayamanan. (Deut. 8:1-3) Bago mag-istar an mga Israelita sa saindang daga, pinatanidan sinda: “Kun si Jehova na saimong Dios ikinalaog ka na nia sa dagang isinumpa nia sa saimong magña magurang na si Abraham, si Isaac, asin si Jacob, na itatao nia saimo; sa magña banuaan na [dakol] asin marayrahay na dai mo pinatindog, asin magña harong na pano nin gabos na karahayan, na dai mo pinakapano, asin magña bobon na kinaralot na dai mo kinalot, magña kauvasan asin kaolivahan na dai mo [itinanom]: Pakatapus mo pagkakan asin pakabasog mo, magmaan kang dai ka maligñao ki Jehova.”—Deut. 6:10-12.
5. Taano ta isinikwal ni Jehova an Israel, asin ibinalyo nia sa anong bagong nasyon an saiyang pag-oyon?
5 Makatanosan an patanid na ini. Kan panahon ni Nehemias, sarong grupo nin mga Levita an may pagkasupog na ginirumdom an nangyari pakalaog kan mga Israelita sa Dagang Panuga. Kan an banwaan nin Israel mag-istar na sa komportableng mga harong asin may abunda nang kakanon saka arak, “nagkarakan sinda, asin nagkabarasog, asin nagñagtaraba.” Nagrebelde sinda sa Dios, na ginadan pa ngani an mga propetang sinugo nia tanganing patanidan sinda. Huli kaiyan, pinabayaan sinda ni Jehova sa mga kaiwal ninda. (Basahon an Nehemias 9:25-27; Os. 13:6-9) Kan huri, sa pamamahala kan Roma, mas maraot pa an ginibo kan bakong maimbod na mga Judio huling ginadan ninda an ipinanugang Mesiyas! Isinikwal sinda ni Jehova asin ibinalyo nia an saiyang pag-oyon sa bagong nasyon, an espirituwal na Israel.—Mat. 21:43; Gui. 7:51, 52; Gal. 6:16.
“Bakong sa Kinaban”
6, 7. (a) Paano nindo ipapaliwanag an sinabi ni Jesus manongod sa paninindogan kan mga parasunod nia kun dapit sa kinaban? (b) Taano an tunay na mga Kristiano ta dai dapat magin kabtang kan sistema ni Satanas?
6 Arog kan ipinaheling sa enotan kan artikulong ini, lininaw kan Payo kan Kristianong kongregasyon, si Jesu-Cristo, na an mga parasunod nia magigin siblag sa kinaban, an maraot na sistema nin mga bagay ni Satanas. Kan harani na an kagadanan ni Jesus, sia nagsabi sa mga disipulo: “Kun kamo sa kinaban, an kinaban namomoot kutana sa saiyang sadiri: Alagad huli ta kamo bakong sa kinaban, kundi na magña pinili ko hale sa kinaban, kaya an kinaban naoogñis saindo.”—Juan 15:19.
7 Mantang naglalakop an Kristianismo, dapat daw na akoon nin mga Kristiano an mga kaugalean kan kinaban asin magin kabtang kaiyan? Dai. Saen man sinda nag-iistar, dapat nindang ipaheling na napapalaen sinda sa sistema ni Satanas. Mga 30 taon pagkagadan ni Cristo, nagsurat si Pedro sa mga Kristiano na nakaistar sa manlaenlaen na lugar na sakop kan Roma: “Magña namomotan, ako nakikimaherak saindo na magña parapakierok asin parabaklay [“dayo asin nakikiistar nin temporaryo,” NW], na kamo maglikay sa magña horot nin laman na minalaban tumang sa kalag, na an saindong pamumuhay maguin maninigo [“marahay,” NW] dian sa magña Gentil.”—1 Ped. 1:1; 2:11, 12.
8. Ano an sinabi nin sarong historyador na nagpapaheling na an enot na mga Kristiano bakong kabtang kan kinaban?
8 Sa pagpatunay na an enot na mga Kristiano guminawe bilang “dayo asin nakikiistar nin temporaryo” sa mga lugar na sakop kan Roma, an historyador na si Kenneth Scott Latourette nagsurat: “Aram na marhay sa kasaysayan na sa enot na tolong siglo kan Kristianismo, napaatubang iyan sa daing ontok asin sa parate grabeng persekusyon . . . Manlaenlaen an sahot. Huling habo nin mga Kristiano na magpartisipar sa paganong mga seremonya, inapod sindang mga ateista. Sa dahelan na dai sinda nakikikabtang sa kadaklan na aktibidad kan komunidad—an paganong mga kapiestahan, pampublikong mga libangan na an pagmansay nin mga Kristiano pano nin paganong paniniwala, kaugalean, asin imoralidad—may pagtuyang inapod sinda na mga naoongis sa rasa nin tawo.”
Dai Paggamit nin Lubos sa Kinaban
9. Bilang tunay na mga Kristiano, paano niato pinapatunayan na dai kita “naoongis sa rasa nin tawo”?
9 Ano an situwasyon ngonyan? Kun dapit sa “kinaban na ining maraot,” pinapagdadanay niato an kaparehong paninindogan kan enot na mga Kristiano. (Gal. 1:4) Huli kaini, dakol an dai nakakasabot sa sato asin may mga naoongis pa ngani sa sato. Pero, dai nanggad kita “naoongis sa rasa nin tawo.” Huli sa pagkamoot sa kapwa, kita naghaharongharong, na naghihingoa nanggad na ipaabot sa gabos na yaon dian an “evangelio nin kahadean” nin Dios. (Mat. 22:39; 24:14) Ginigibo niato ini huli ta kombensido kita na sa dai na mahahaloy tataposon kan gobyerno kan Kahadean ni Jehova paagi ki Cristo an bakong perpektong pamamahala nin tawo, na sasalidahan nin matanos na bagong sistema nin mga bagay.—Dan. 2:44; 2 Ped. 3:13.
10, 11. (a) Paano niato limitadong ginagamit an kinaban? (b) Ano an nagkapirang paagi na an mapagbantay na mga Kristiano dai ginagamit nin lubos an kinaban?
10 Huling harani na an katapusan kan presenteng sistema nin mga bagay, aram niato bilang mga lingkod ni Jehova na bako ini an panahon na maghingoang magin komportable an buhay sa kinaban na ini na matatapos na. Hinihimate niato an sinabi ni Pablo: “Ini sinasabi ko, magña tugang, an panahon pinahayokong [“nainaan na,” NW], tagñaning magpoon gñunian an magña . . . nagbabakal, [magin] siring sa magña dai nin rogaring; asin an magña naggagamit kan kinaban, siring sa magña dai nakikinabang nin lubos: Huli ta an kamugtakan kan kinaban na ini minalihis sana.” (1 Cor. 7:29-31) Alagad paano an kinaban ginagamit kan mga Kristiano sa presenteng panahon? Paagi sa paggamit nin modernong teknolohiya asin komunikasyon tanganing ikapalakop sa bilog na kinaban an kaaraman sa Biblia sa ginatos na lenguahe. Limitado sana an paggamit ninda sa kinaban kun dapit sa pagganar nin kuarta. Ginagastos ninda iyan para sa kaipuhan sanang mga bagay asin serbisyo na makukua sa kinaban. Minsan siring, linilikayan nindang gamiton nin lubos an kinaban kaya pinagdadanay ninda sa tamang lugar an kinabanon na mga rogaring asin trabaho.—Basahon an 1 Timoteo 6:9, 10.
11 An mapagbantay na mga Kristiano dai ginagamit nin lubos an kinaban kun dapit sa halangkaw na edukasyon. Para sa dakol na tawo sa kinaban, iyan mahalagang marhay na tangga tanganing magin bantog asin mayaman. Alagad kitang mga Kristiano nakikiistar nin temporaryo asin laen na mga pasohan an pinagmamaigotan tang aboton. Linilikayan niato na “magisip kan magña halangkao na bagay.” (Roma 12:16; Jer. 45:5) Huling mga parasunod kita ni Jesus, hinihimate niato an patanid nia: “Magigñat asin maglikay kamo sa gabos na kaimotan: Huli ta an buhay nin tauo bakong yaon sa kadakulan nin nasasadirihan nia.” (Luc. 12:15) Kaya, dinadagka an hoben na mga Kristiano na pagmaigotan na aboton an espirituwal na mga pasohan, na an kinukuang edukasyon tama sana tanganing mapanigoan an pangenot na mga pangangaipo ninda mantang nagkokonsentrar sa pag-andam para sa paglilingkod ki Jehova nin ‘bilog na puso, kalag, kosog, asin isip.’ (Luc. 10:27) Sa paggibo kaiyan, puede sindang magin “mayaman dapit sa Dios.”—Luc. 12:21; Basahon an Mateo 6:19-21.
Likayan na Magabatan Huli sa mga Kahaditan sa Buhay
12, 13. Paano an paghimate sa sinabi ni Jesus sa Mateo 6:31-33 ginigibo kitang napapalaen sa mga tawo sa kinaban?
12 An mga lingkod ni Jehova laen sa mga tawo sa kinaban kun dapit sa pagmansay sa materyal na mga bagay. Mapadapit digdi, si Jesus nagsabi sa mga parasunod nia: “Dai kamo mahadit, na magsabi, Ano an samong kakakanon? o, Ano an samong iinomon? o, Ano an samong gugubigñon? Huli ta an gabos na bagay na ini hinahanap nin magña Gentil; huli ta naaaraman kan saindong Amang lagñitnon, na kinakaipuhan nindo [ining] gabos na bagay. Alagad hanapa gñona nindo an kahadean nin Dios asin an saiyang katanosan; asin [ining] gabos na bagay idadagdag na sana saindo.” (Mat. 6:31-33) Basado sa personal na eksperyensia, napatunayan nin dakol sa mga kapagtubod niato na itinatao kan satong langitnon na Ama an mga pangangaipo ninda.
13 “Dakulang pakinabang an pagsasadios [o, pagigin diosnon] na may pagkakontento.” (1 Tim. 6:6, An Banal na Biblia) Kabaliktaran nanggad iyan kan pagmansay nin mga tawo sa kinaban ngonyan. Halimbawa, kun nag-aagom an mga hoben, dakol sa sainda an nag-aasa na ‘magkakaigwa tolos sinda nin gabos na bagay’—harong o apartment na kompleto sa mamahalon na mga gamit, magayon na lunadan, asin pinakabagong elektronikong kagamitan. Minsan siring, an mga Kristiano na nakikiistar nin temporaryo dai nagmamawot nin mga bagay na bakong rasonable asin dai ninda kaya. Kaomaw-omaw nanggad na dakol an nagsasakripisyo nin kaginhawahan sa nagkapirang materyal na bagay tanganing magkaigwa nin dakol na panahon asin kosog para sa paglilingkod ki Jehova bilang maigot na mga parahayag. An iba naglilingkod bilang payunir, Bethelite, nagbibiaheng paraataman, o misyonero. Pinapahalagahan nanggad niato gabos an bilog na pusong paglilingkod kan mga kapwa niato parasamba ki Jehova!
14. Anong leksion an manonodan niato sa parabola ni Jesus dapit sa parasabwag?
14 Sa parabola ni Jesus dapit sa parasabwag, sinabi nia na “an kahaditan kan kinaban asin an kadayaan nin kayamanan” puedeng garo makapuot sa tataramon nin Dios na nasa puso niato asin puedeng magin dahelan na kita magin bakong mabunga. (Mat. 13:22) An pamumuhay nin kontento bilang nakikiistar nin temporaryo sa sistemang ini nin mga bagay nakakatabang sa sato na dai mahulog sa silong ini. Imbes, pinapagdadanay kaiyan an satong mata na “marahay [“simple,” NW],” o nakapokus, na nakaheling sa saro sanang direksion pasiring sa Kahadean nin Dios asin padagos na ineenot sa satong buhay an intereses kaiyan.—Mat. 6:22.
“An Kinaban Naagui Sana”
15. Anong mga tataramon ni apostol Juan an nagpapaheling kan pagmansay asin paggawe nin tunay na mga Kristiano sa presenteng kinaban?
15 An sarong pangenot na dahelan kun taano ta para sa sato na tunay na mga Kristiano kita “mga nakikihimanwa asin nakikiistar nin temporaryo” sa kinaban na ini iyo an makosog na paniniwala niato na bilang na an mga aldaw kaiyan. (1 Ped. 2:11; 2 Ped. 3:7) Naheheling ini sa satong mga desisyon sa buhay, kamawotan, asin pasohan. Sinadol ni apostol Juan an mga kapagtubod na dai mamoot sa kinaban o sa mga bagay na yaon dian huling “an kinaban naagui sana asin an saiyang magña horot: Alagad an nagguiguibo kan boot nin Dios nagdadanay sagkod lamang.”—1 Juan 2:15-17.
16. Paano niato ikakapaheling na kita isinuway na bilang napapalaen na banwaan?
16 An mga Israelita sinabihan na kun susunodon ninda si Jehova, sinda magigin saiyang “piniling kayamanan . . . sa gabos na magña banuaan.” (Ex. 19:5) Kan maimbod pa an Israel, iyan napapalaen sa gabos na iba pang nasyon kun dapit sa pagsamba asin pamumuhay. Ngonyan man, isinuway ni Jehova para sa saiyang sadiri an sarong banwaan na napapalaen nanggad sa kinaban ni Satanas. Sinasabihan kita: “Isikwal an pagkabakong diosnon asin an kinabanon na mga mawot asin mamuhay na may toltol na isip asin katanosan patin diosnon na debosyon sa tahaw kan presenteng sistemang ini nin mga bagay, mantang kita naghahalat sa maogmang paglaom asin mamuraway na pagkahayag kan dakulang Dios asin kan satong Paraligtas, si Cristo Jesus, na itinao an saiyang sadiri para sa sato tanganing ikaligtas nia kita sa gabos na klase nin katampalasanan asin makalinig para sa saiya nin sarong banwaan na magigin saiya sana nanggad, maigot sa marahay na mga gibo.” (Tito 2:11-14, NW) An “banwaan” na ini kompuesto kan linahidan na mga Kristiano asin minilyon na “ibang magña carnero” ni Jesus, na nagtatabang saka nagsusuportar sa sainda.—Juan 10:16.
17. Taano ta nungkang pagbabasolan kan mga linahidan asin kan saindang kairiba na sinda namuhay bilang nakikiistar nin temporaryo sa maraot na kinaban na ini?
17 An “maogmang paglaom” kan mga linahidan iyo an mamahala kaiba ni Cristo sa langit. (Kap. 5:10) Kun an paglaom na buhay na daing sagkod sa daga maotob na sa ibang mga karnero, dai na sinda makikiistar nin temporaryo sa maraot na kinaban. Magkakaigwa sinda nin magayon na harong asin abundang kakanon saka inomon. (Sal. 37:10, 11; Isa. 25:6; 65:21, 22) Bakong arog kan mga Israelita, nungka nindang lilingawan na an gabos na ini hale ki Jehova, an “Dios kan bilog na kinaban.” (Isa. 54:5) Dai pagbabasolan kan mga linahidan ni kan ibang mga karnero na sinda namuhay bilang nakikiistar nin temporaryo sa maraot na kinaban na ini.
Ano an Isisimbag Nindo?
• Sa anong paagi an maimbod na mga tawo kan suanoy namuhay bilang mga nakikiistar nin temporaryo?
• Paano guminawe an enot na mga Kristiano kun dapit sa kinaban?
• Sa anong paagi limitado sana an paggamit kan tunay na mga Kristiano sa kinaban?
• Taano ta nungka tang pagbabasolan na kita namuhay bilang nakikiistar nin temporaryo sa maraot na kinaban na ini?
[Mga Hapot Para sa Pag-adal]
[Ritrato sa pahina 18]
Linikayan kan enot na mga Kristiano an madahas asin imoral na aling-alingan
