‘Paano Ko Makakayang Maghulit?’

Sa bilog na kinaban, kadakol kita nin marahayon na arogan na mga tugang na lalaki asin babae na maimbod na nakikikabtang sa paghuhulit dawa may tinatagalan sinda na grabeng mga problema sa salud. Kuanon niatong halimbawa si Dalia, na nakaistar sa Vilnius, an kabisera kan Lithuania.

Si Dalia sarong tugang na mga 35 anyos na. Poon kan mamundag sia, nagsasakit na sia huli sa mga epekto nin cerebral apoplexy. Huli sa helang na iyan, sia nagin paralisado asin nagkaigwa nin grabeng depekto sa pagtaram. Bilang resulta, mga kapamilya sana nia an nakakasabot na marhay sa saiya. Kaiba ni Dalia sa harong an saiyang ina na si Galina, na nag-aasikaso kan mga pangangaipo nia. Minsan ngani an buhay ni Dalia pano nin kasakitan asin kahaditan, pinapagdadanay nia an positibong pananaw. Paano iyan nagin posible?

Nagpaliwanag si Galina: “Kan 1999, binisita kami kan pinsan kong si Apolonija. Nariparo niamo na si Apolonija, na saro sa mga Saksi ni Jehova, pamilyar na marhay sa Biblia, asin dakol an ihinapot ni Dalia sa saiya. Dai nahaloy, naponan nin pag-adal sa Biblia si Dalia. Kun minsan, minaiba ako sa sainda sa pag-adal tanganing iinterpretar an sinasabi ni Dalia. Pero, nariparo ko na talagang nakikinabang sia sa gabos na nanonodan nia. Dai nahaloy, nakiolay ako na tokdoan man ako sa Biblia.”

Kan nasasabotan na ni Dalia an mga katotoohan sa Biblia, sarong hapot an paorog nang paorog na nakapurisaw sa saiya. Sa katapustapusi, sia nagtaram asin naghapot ki Apolonija: “Paano makakayang maghulit nin sarong arog ko na paralisado?” (Mat. 28:​19, 20) Kalmadong pinakosog ni Apolonija an boot ni Dalia: “Dai ka matakot. Tatabangan ka ni Jehova.” Asin talagang nagtatabang si Jehova.

Kun siring, paano nakakapaghulit si Dalia? Sa nagkapirang paagi. Tinatabangan sia nin mga sister sa pag-andam nin mga surat na may mensahe hale sa Biblia. Primero, sinasabi sa sainda ni Dalia an nasa isip nia. Dangan, naggigibo sinda nin surat base dian. Nagpapatotoo man si Dalia paagi sa pagpadara nin mga text message gamit an saiyang mobile phone. Asin kun magayon an panahon, iiniiba sia sa luwas kan mga kakongregasyon nia tanganing kaolayon an mga natatagboan ninda sa mga parke asin sa tinampo.

Si Dalia asin an saiyang ina padagos na nag-oswag sa espirituwal. Pareho nindang idinusay an saindang sadiri ki Jehova asin nabautismohan sinda kan Nobyembre 2004. Kan Setyembre 2008, sarong grupo nin mga nagtataram nin Polish an nabilog sa Vilnius. Huling an grupo nangangaipo nin dakol pang parahayag kan Kahadean, si Dalia asin an saiyang ina nakiiba dian. Sabi ni Dalia: “May mga bulan na nahahadit ako kun dai pa ako nakakaiba sa paghuhulit. Alagad namimibi ako ki Jehova manongod dian, dangan dai nahahaloy may nakikipag-olay sa sako na mag-ibanan kami sa ministeryo.” Paano minamansay kan namomotan niatong tugang na si Dalia an saiyang situwasyon? Sia nagsabi: “Naparalisar kan helang an hawak ko, alagad dai kaiyan naparalisar an isip ko. Naoogma nanggad ako na nakakaya kong sabihon sa iba an manongod ki Jehova!”