AN BANWAAN ni Jehova may halawig asin interesanteng espirituwal na kasaysayan. An kawiliwiling rekord kan kasaysayan na iyan maheheling bako sana sa mga publikasyon niato kundi pati sa mga retrato, surat, personal na mga salaysay, asin iba pang bagay na may koneksion sa satong pagsamba, paghuhulit, asin kasaysayan. Alagad ano an pakinabang sa pagpreserbar kan siring na mga bagay asin sa pagsiyasat sa satong kasaysayan? Bueno, kahagadan sa mga payo nin pamilya sa suanoy na Israel na itokdo sa saindang mga aki an mga ley asin makangangalas na mga gibo ni Jehova tanganing ‘ikabugtak ninda sa Dios an saindang panarig.’​—⁠Sal. 78:​1-7.

An pagsiyasat sa importante o makasaysayan na mga bagay (archives) haloy nang may mahalagang papel sa kaotoban kan katuyohan ni Jehova. Halimbawa, kan probaran nin mga parakontra na papondohon an trabaho sa templo sa Jerusalem, nadiskobre sa opisyal na pagsiyasat sa mga rekord sa Ecbatana (Achmetta), na kabisera kan Media, an sarong dokumento na hale ki Hadeng Ciro na nag-aautorisar sa siring na pagtogdok. (Esd. 6:​1-4, 12) Huli kaini, an templo ikinatogdok liwat kaoyon kan kabotan nin Dios. An makasaysayan na mga rekord ginamit man kan kagsurat nin Ebanghelyo na si Lucas, na ‘nagsusog nin daing kasalasala kan gabos na bagay magpoon sa kapinonan.’​—⁠Luc. 1:​1-4.

An Namamahalang Grupo interesadong marhay sa teokratikong kasaysayan niato. Sa pagkomento sa pangangaipong ipreserbar, irekord, asin ipasa an satong  espirituwal na kasaysayan, sarong miembro kan Namamahalang Grupo an nagsabi, “Tanganing maaraman kun saen kita paduman, kaipuhan niatong maaraman kun saen kita hale.” Sa katuyohan na iyan, an departamentong Writing Archives inestablisar dai pa sana nahahaloy sa pambilog na kinaban na opisina prinsipal sa Brooklyn, New York, asin iyan nasa pagdirehir kan Writing Committee.

AN SATONG “ALBUM NIN PAMILYA” ASIN “MGA PAMANA”

Sa paglihis nin panahon, nalilingawan niato an nakaagi, asin posibleng marhay na gusto kan kadaklan sa sato na kutana nakapagsaray kita nin mas kompletong personal na rekord kan pamilya. Sa Writing Archives, maigot na hinihingoa ngonyan na ipreserbar asin irekord an satong mayaman asin nagdadakol na pamana. An mga retrato na iniingatan sa Archives puedeng ibilang na kabtang kan satong “album nin pamilya.” Kaiba man sa mahahalagang bagay na yaon sa Archives an mas naenot niatong mga publikasyon, nakakapukaw sa boot na personal na mga salaysay, asin koleksion na daing kaagid an halaga. An siring na mga bagay “mga pamana” na nagtatao sa sato nin liwanag manongod sa teokratikong kasaysayan niato asin nakakatabang sa sato na kompiadong antisiparon kun ano an mangyayari sa espirituwal na pamilya niato.

Iniimbitaran mi kamo na siyasaton an mga yaon sa Writing Archives paagi sa bagong kabtang na “Hale sa Samong Archive.” Sa panapanahon, igwa kaini sa pag-aadalan na edisyon kan An Torrengbantayan. Halimbawa, sa sarong maabot na isyu, pinaplano ming magpublikar nin salaysay na may mga ilustrasyon na dinisenyo tanganing simbagon an mga hapot na ini: Ano an Dawn Mobile? Sairisay an naggamit kaiyan? Kasuarin iyan ginamit, asin sa anong katuyohan?

Arog nin album nin pamilya na pano nin mga rekuerdo, an koleksion sa Archives may dakol na sinasabi manongod sa sato asin sa mga ‘ama’ saka ‘lolo’ niato sa espirituwal​—⁠dapit sa pagtubod asin kosog nin boot kan mga naenot sa sato, dapit sa kagayagayahan asin mga kadepisilan sa paglilingkod sa mamomoton niatong Ama sa langit, saka dapit sa paggiya asin dai nasusudyang pagsuportar nin Dios sa mga lingkod nia. (Deut. 33:27) May kompiansa kami na bebendisyonan ni Jehova an ginigibong paghihingoa na ipreserbar an kasaysayan kan satong organisasyon tanganing orog kitang magkasararo asin mapakosog na gibohon an saiyang kabotan.

[Kahon/Ritrato sa pahina 31]

Dugang Pang mga Detalye

Durante kan preparasyon nin Kristianong mga babasahon, mga DVD, asin iba pang materyal na basado sa Biblia, an mga parasurat, paradrowing, parasiyasat, asin iba pa naggagamit kan makasaysayan na mga koleksion. Sa dahelan na iyan, an Writing Archives maingat na marhay asin may ginigibong praktikal na mga lakdang tanganing matipon asin mapreserbar an dakol na klase nin makasaysayan na bagay hale sa mga sangang opisina, departamento sa Bethel, kongregasyon, indibiduwal, sekular na institusyon, asin iba pa. Isip-isipa an minasunod na halipot na paglaladawan kan gibohon na ini:

Pagkolekta Asin Pag-analisar: Padagos na nadadagdagan nin pambihirang mga bagay an koleksion sa Archives. An dakol sa mga ini may kabootan na idinonar o ipinasubli nin mga indibiduwal na an mga pamilya dakol na dekada nang naglilingkod ki Jehova. An pag-analisar asin pagkomparar kan siring na mga bagay nakakatabang na orog na masabotan niato an satong kasaysayan asin an mga indibiduwal na nabuhay sa mga panahon na idto.

Pagkatalogo: An koleksion sa Writing Archives kompuesto nin rinibong bagay, na an iba labi nang sanggatos na taon. Manlaenlaen an korte, kadakulaan, saka format kaiyan asin dapat na maingat na ikatalogo iyan tanganing magamit sa maabot na panahon.

Pagbabalik sa Dati Asin Pagpreserbar: An madali nang maraot na mga libro asin iba pang mga bagay pinapakarhay asin pinepreserbar gamit an propesyonal na mga pamamaagi. An mga dokumento, retrato, news clipping, pelikula, asin rekording ilinalaog sa kompyuter. Kaya, puede iyan na ma-access sa elektronikong paagi tanganing malimitaran an pagkapot sa orihinal na mga dokumento o iba pang bagay na makasaysayan.

Pagsaray Asin Pag-retrieve: An nakolektang mga bagay maingat asin aregladong isinasaray tanganing dai mawara saka dai maraot huli sa liwanag o alumaad (moisture). Sarong database an ginigibo bilang pantabang sa pagsiyasat asin pag-retrieve, o pagkua giraray, kan mahahalagang bagay na ini sa satong kasaysayan.

[Mga Ritrato sa pahina 32]

1. Poster para sa “Photo-Drama of Creation.” 2. Subscription register. 3. Autong may loudspeaker. 4. Tutob kan Watch Tower na Abril 15, 1912. 5. Prison notice ni J. F. Rutherford. 6. Mikropono nin WBBR. 7. Ponograpo. 8. Sadit na maleta para sa mga libro. 9. Personal na nota. 10. Telegrama ki J. F. Rutherford.