Kan an bilog na panahon na parahulit na si Charlotte White mag-abot sa Louisville, Kentucky, U.S.A., na may maletang de rueda, dakol na tawo an nakarisa sa saiya.

TAON nin 1908 kaidto, asin nakua nanggad ni Sister White an atension kan mga namamanwaan huli sa bagong imbension​—⁠an Dawn-Mobile. “Nagin orolay-olay iyan kan nagkapira,” an sabi nia, “asin risang-risa ako huli kaiyan.”

Naheling kan Mga Estudyante sa Biblia, na apod kaidto sa Mga Saksi ni Jehova, an pangangaipo na ipaabot sa iba an mahalagang marhay na mga katotoohan na saindang nanodan sa maigot na pag-adal ninda kan Kasuratan. Dakol an nagkaigwa nin kaaraman sa Biblia paagi sa serye nin mga libro na may titulong Millennial Dawn (kan huri inapod man na Studies in the Scriptures). An mga Kristianong andam asin nasa kamugtakan nagbiahe sa manlaenlaen na lugar​—⁠sa mga banwaan, baryo, asin sa mga sitio​—⁠na iinaalok sa iba pang gustong-gustong magbasa an mga librong ini na inaapod na “Mga Pantabang sa Mga Estudyante sa Biblia.”

Kan 1908, iinaalok ni Sister White asin kan iba pang maigot na parabalangibog kan Kahadean an anom na tomong libro, na an tutob may patos na tela, sa kantidad na $1.65 (U.S.). Imbes na ipasakamot tolos-tolos an mga Dawn, nagpapaorder nguna sinda, dangan minabuelta na sana paghaloyhaloy​—⁠sa parate kun aldaw nin sueldo​—⁠tanganing darahan sinda kaiyan karibay nin hababang kantidad para sa gastos sa pag-imprenta. Irineklamo nin sarong paratumang an kadikiton na kuartang ikinokontribwir nin mga tawo para sa mga libro!

Nagirumdoman ni Malinda Keefer na nakakapaorder sia nin dos sientos sagkod sa tres sientos na libro kada semana. Alagad huling dakol an nagin interesado sa mga Dawn, may nagin problema an mga tugang. An  totoo, an ikaanom na tomo sana kompuesto na nin 740 pahina! “An 50 libro 18 kilos,” an inadmitir kan The Watch Tower, kaya “masakiton” an paghatod kaini lalo na para sa mga sister.

Tanganing maresolberan an masakit na paghatod kan Dawn, nag-imbento si Brother James Cole nin natitiklop na kasangkapan na may duwang rueda asin puedeng kabitan nin maleta paagi sa mga tornilyo. Huling dai na ninda kaipuhan na bitbiton an magagabat na karton na pano nin mga libro, an imbentor mismo nagkomento: “Dai na nababari an sakong abaga.” An bagong gamit na iyan iinintrodusir nia sa naoogmang marhay na mga nagdadangog sa kombension kan Mga Estudyante sa Biblia sa Cincinnati, Ohio, kan 1908. Sa kada poro kan crossbar may nakaukit na ngaran na Dawn-Mobile, huling an pangenot na karga kaiyan mga tomo kan Millennial Dawn. Sa dikit na pagpraktis, pasil nang darahon an maleta na pano nin dakol na libro, dawa sa sarong kamot sana. Puedeng i-adjust an langkaw kaiyan, asin an mga rueda makakaagi dawa sa mga inaagihan nin kareta. Pagkatapos nin maghapon na ministeryo, an mga gomang rueda puedeng tiklopon paitaas sa may gilid kan maleta kun mapuli na, baga man malakaw o masakay sa trambia.

An kantidad nin Dawn-Mobile $2.50 (U.S.). Pero an mga sister na nasa bilog na panahon na paglilingkod libreng makakakua kaiyan. Nakabisadong marhay ni Sister Keefer, na an retrato yaon digdi, an paggamit kan Dawn-Mobile kaya naguguyod nia iyan nin saro sanang kamot mantang kapot kan ibong niang kamot an saro pang bag na may mga libro. Sa sarong banwaan na may minahan sa Pennsylvania, E.U.A., dakol an naghimate kaya sa aldaw nin paghatod, sa parate tolo o apat na beses siang pabalikbalik, na minaagi sa tulay.

Kan huring mga taon kan dekada nin 1980, sarong piloto nin kompanya nin eroplano an nakaimbento nin de ruedang bag na ordinaryo nang maheheling ngonyan sa mga airport patin sa matawong mga kalye nin mga siudad. Alagad mga sanggatos na taon na an nakaagi, posibleng marhay na ikinaogma kan maiigot na mga Estudyante sa Biblia na paghelingon kan nagngangalas na mga nagmamasid mantang ginuguyod ninda an saindang Dawn-Mobile sa pagsabwag kan mahalagang marhay na mga banhi kan katotoohan sa Biblia.

[Blurb sa pahina 32]

Sa aldaw nin paghatod, sa parate tolo o apat na beses na pabalikbalik si Sister Keefer, na minaagi sa tulay

[Blurb sa pahina 32]

Solusyon iyan sa problema sa paghatod kan “Dawn”