Humiro Bilang mga Siudadano kan Kahadean!
Humiro Bilang mga Siudadano kan Kahadean!
“Humiro bilang mga siudadano.”—FIL. 1:27, nota sa ibaba kan NW.
ANO AN ISISIMBAG NINDO?
Sairisay an puedeng magin siudadano kan Kahadean?
Ano an kaipuhan tang gibohon mapadapit sa lenguahe, kasaysayan, asin mga ley kan Kahadean?
Paano ipinapahiling kan mga siudadano kan Kahadean na namomotan ninda an mga pamantayan nin Dios?
1, 2. Taano ta igwa nin espesyal na kahulogan an konseho ni Pablo sa kongregasyon sa Filipos?
DINAGKA ni apostol Pablo an kongregasyon sa Filipos na ‘an saindang pamumuhay magin angay sa ebanghelyo.’ (Basahon an Filipos 1:27.) An Griegong termino na ginamit ni Pablo para sa tataramon na “pamumuhay” puede man na itradusir na ‘paghiro bilang mga siudadano.’ An mga tataramon na iyan igwa nin espesyal na kahulogan sa kongregasyon sa Filipos. Taano? Huling minalataw na an Filipos saro sa piniling grupo nin mga siudad kun saen an mga nag-iistar tinogotan na magin siudadano nin Roma. An mga siudadano nin Roma sa Filipos asin sa bilog na Imperyo nin Roma ipinag-oorgolyo an saindang kamugtakan asin igwa nin espesyal na proteksion kan ley nin Roma.
2 An mga miembro kan kongregasyon sa Filipos igwa nin orog na dahelan na mag-orgolyo. Ipinagirumdom ni Pablo sa sainda na bilang linahidan na mga Kristiano an saindang pagkasiudadano ‘nasa langit.’ (Fil. 3:20) Sinda mga siudadano, bako nin imperyo sana nin tawo, kundi kan Kahadean nin Dios. Huli kaiyan, igwa sinda nin daing kaagid na proteksion asin mga pakinabang.—Efe. 2:19-22.
3. (a) Sairisay an may oportunidad na magin siudadano kan Kahadean? (b) Ano an pag-oolayan niato sa artikulong ini?
3 An konseho ni Pablo na “humiro bilang mga siudadano” pangenot na minaaplikar sa mga mamamahalang kaiba ni Cristo sa langit. (Fil. 3:20) Alagad aplikado man iyan sa magigin daganon na mga sakop kan Kahadean nin Dios. Taano? Huling an gabos na nagdusay na Kristiano naglilingkod sa sarong Hade, si Jehova, asin parehong mga pamantayan an dapat nindang otobon. (Efe. 4:4-6) Ngonyan, nagmamaigot an mga tawo na makualipikar na magin siudadano nin mayaman na nasyon. Mas maninigo nanggad niatong pahalagahan an oportunidad na magin siudadano kan Kahadean! Tanganing pararomon an pag-apresyar niato sa pribilehiong iyan, pag-olayan niato an nagkapirang pagkakaagid kan mga kahagadan tanganing magin siudadano nin gobyerno nin tawo asin magin siudadano kan Kahadean nin Dios. Dangan sisiyasaton niato an tolong bagay na dapat tang gibohon tanganing mapagdanay niato an onra nin pagigin siudadano kan Kahadean.
MGA KAHAGADAN PARA SA PAGIGIN SIUDADANO
4. Ano an dalisay na lenguahe, asin paano niato “itinataram” iyan?
4 Pag-adalan an lenguahe. Kahagadan kan nagkapirang gobyerno nin tawo na an mga nag-aaplay na magin siudadano tataong magtaram kan pangenot na lenguahe kan nasyon. Dawa siudadano na, tibaad dakol na taon pang maghingoa an mga tawo tanganing magin eksperto sa ibang lenguaheng iyan. Tibaad manodan ninda tolos an mga reglamento nin gramatika alagad tibaad mangaipo nin harohalawig na panahon na manodan an tamang pagpronunsiar kan mga tataramon. Kaagid kaiyan, kahagadan kan Kahadean nin Dios na an mga siudadano kaiyan makanood kan inaapod kan Biblia na ‘malinig na ngoso’ o dalisay na lenguahe. (Basahon an Sofonias 3:9.) Ano an lenguaheng iyan? Iyan an katotoohan manongod sa Dios asin sa saiyang mga katuyohan na nasa Biblia. “Itinataram” niato an dalisay na lenguahe kun an satong gawe-gawe kaoyon kan mga ley asin prinsipyo nin Dios. An mga siudadano kan Kahadean nin Dios puedeng makanood tolos nin pundamental na mga katokdoan sa Biblia asin mabautismohan. Minsan siring, dawa bautisado na sinda, dapat sindang magmaigot na padagos na umoswag sa “pagtaram” kan dalisay na lenguahe. Sa anong paagi? Kaipuhan kan lambang saro sa sato na padagos na maghingoang iaplikar sa satong buhay an nanonodan niato sa Biblia.
5. Taano ta maninigong pag-adalan niato an gabos na mahihimo tang manodan manongod sa kasaysayan kan organisasyon ni Jehova?
5 Pag-adalan an kasaysayan. An nagmamawot na magin siudadano nin gobyerno nin tawo tibaad kaipuhan na makanood kan kasaysayan kan gobyernong iyan. Siring man, an mga nagmamawot na magin siudadano kan Kahadean marahay na mag-adal kan gabos na mahihimo nindang manodan manongod sa Kahadean nin Dios. Isip-isipa an halimbawang ipinahiling kan mga aki ni Kora, na naglingkod sa suanoy na Israel. Ikinaogma nindang marhay an Jerusalem saka an lugar nin pagsamba duman asin an pag-estorya kan kasaysayan kan siudad. An orog na hinangaan ninda bako an mga gapo asin an ginamit na pansemento dian kundi an irinepresentar kan siudad saka kan lugar nin pagsamba dian. An Jerusalem iyo ‘an siudad kan dakulaon na Hade,’ si Jehova, huling iyan an sentro kaidto kan dalisay na pagsamba. Duman itinokdo an Ley ni Jehova. Ipinahayag ni Jehova an saiyang mamomoton na kabootan sa banwaan na pinamamahalaan kan Hade nin Jerusalem. (Basahon an Salmo 48:1, 2, 9, 12, 13.) Arog ninda, may pagmawot ka daw na pag-adalan asin iestorya an kasaysayan kan daganon na kabtang kan organisasyon ni Jehova? Mientras na orog kang nakakanood manongod sa organisasyon nin Dios asin kun paano sinusuportaran ni Jehova an saiyang banwaan, orog na nagigin totoo sa saimo an Kahadean nin Dios. Magigin mas makosog an saimong pagmawot na ihulit an maogmang bareta kan Kahadean.—Jer. 9:24; Luc. 4:43.
6. Taano ta rasonable na hagadon sa sato ni Jehova na manodan asin sunodon an mga ley asin prinsipyo kan Kahadean?
6 Aramon an mga ley. Kahagadan kan mga gobyerno nin tawo sa mga nasasakopan ninda na manodan asin sunodon an mga ley kan nasyon. Kun siring, minalataw na rasonable sanang asahan ni Jehova na manonodan asin susunodon niato an mga ley saka prinsipyo na nagdidirehir sa gabos na siudadano kan Kahadean. (Isa. 2:3; Juan 15:10; 1 Juan 5:3) An mga ley nin tawo parateng may depekto asin tibaad bakong makatanosan. Sa kabaliktaran, an ley o “togon ni Jehova mahusay” o perpekto. (Sal. 19:7) Ikinakaogma daw niatong marhay an ley nin Dios asin binabasa an saiyang Tataramon aroaldaw? (Sal. 1:1, 2) An solamenteng paagi na manodan an ley nin Dios iyo na pag-adalan niato mismo iyan. Mayo nin siisay pa man na makakagibo kaini para sa sato.
AN MGA SIUDADANO KAN KAHADEAN NAMOMOOT SA MGA PAMANTAYAN NIN DIOS
7. Taano ta kinukuyog kan mga siudadano kan Kahadean an mga ley nin Dios?
7 Tanganing magdanay na siudadano kan Kahadean, an kaipuhan niato bako sanang maaraman an mga pamantayan nin Dios kundi mamotan man an mga iyan. Dakol na siudadano kan mga gobyerno nin tawo an nagsasabing minaoyon sinda sa mga ley asin pamantayan kan nasyon na iniistaran ninda. Minsan siring, kun bakong kombenyente sa sainda an sarong kahagadan asin kun iniisip ninda na mayong nakakahiling, binabalga ninda an ley. Sa parate, an mga tawong ini ‘mga parapaoyon sa mga tawo.’ (Col. 3:22) Bako nanggad arog kaiyan an mga siudadano kan Kahadean. Naoogma kitang kuyogon an mga ley nin Dios, dawa mayong nakakahiling na ibang tawo. Taano? Huling namomotan niato an Paragibo nin Ley.—Isa. 33:22; basahon an Lucas 10:27.
8, 9. Paano mo maaaraman kun baga tunay mong namomotan an mga ley nin Dios?
8 Paano mo maaaraman kun baga tunay mong namomotan an mga ley nin Dios? Siyasaton kun ano an reaksion mo kun ika tinatawan nin konseho dapit sa sarong bagay na sa paghiling mo depende sa personal na gusto—halimbawa, kun dapit sa pagbado asin pagpakarhay sa sadiri. Bago nagin siudadano kan Kahadean, tibaad an pagbado mo daing kahusayan o malaswa. Mantang nagtatalubo an pagkamoot mo sa Dios, nanodan mong magbado sa paagi na nagtataong onra sa saiya. (1 Tim. 2:9, 10; 1 Ped. 3:3, 4) Tibaad sa hiling mo mabini ka na ngonyan kun magbado. Alagad paano kun sabihan ka nin sarong elder na an pagbado mo bako nanggad marahay sa paghiling kan dakol na parahayag sa kongregasyon? Ano an magigin reaksion mo? Ika daw mangangatanosan, maghihinanakit, o magsisinutil? An saro sa pinakamahalagang mga ley kan Kahadean nin Dios iyo na an gabos na siudadano mag-arog ki Cristo. (1 Ped. 2:21) Mapadapit sa halimbawa ni Jesus, si apostol Pablo nagsurat: “An lambang saro sa sato magpaogma sa saiyang kataed sa karahayan, sa pagpakosog. Huli ta si Cristo man dai nagpaoyon sa saiya man sana.” (Roma 15:2, 3) Para sa katoninongan sa kongregasyon, an maygurang na Kristiano mayong paghinanakit na nagpapahunod sa konsensia nin iba.—Roma 14:19-21.
9 Estudyaran an duwa pang bagay na mahalagang marhay: an satong saboot dapit sa sekso asin an satong pagmansay sa pag-agoman. Tibaad iniisip kan mga bako pang siudadano kan Kahadean nin Dios na an homoseksuwalidad bakong maraot, na an pornograpiya dai nakakadanyar na libangan, asin na an pagsambay saka diborsio personal na mga bagay sana. Binayaan na kan mga siudadano kan Kahadean an siring na hayakpit asin makasadiring kaisipan. Minsan ngani dakol na Kristiano an dating imoral an pamumuhay, ngonyan minamansay na ninda an sekso asin pag-agoman bilang mga regalo nin Dios. Pinapahalagahan ninda an halangkaw na mga pamantayan ni Jehova asin bilog na pusong minaoyon na an mga padagos na naggigibo nin salang paggawe sa sekso bakong maninigo na magin siudadano kan Kahadean. (1 Cor. 6:9-11) Minsan siring, aram man ninda na an puso madaya. (Jer. 17:9) Kaya, sinda nagpapasalamat na nag-aako sinda nin espesipikong mga patanid na nakakatabang sa sainda na mapagdanay an halangkaw na mga pamantayan sa moral.
AN MGA SIUDADANO KAN KAHADEAN NAGPAPASALAMAT SA MGA PATANID
10, 11. Anong napapanahon na mga patanid an itinatao kan Kahadean nin Dios, asin ano an saboot mo sa siring na mga patanid?
10 An mga gobyerno nin tawo puedeng magtao nin mga patanid para sa salud mapadapit sa mga pagkakan asin bolong. Siempre pa, bakong gabos na pagkakan asin bolong maraot. Alagad kun an sarong produkto peligroso, puedeng magtao nin timbang na mga patanid an gobyerno tanganing protektaran an mga siudadano kaiyan. Kun dai ini gigibohon kan gobyerno, iyan kapabayaan. Kaagid kaiyan, nagtatao an Kahadean nin Dios nin napapanahon na mga patanid manongod sa espesipikong mga peligro sa moral asin espirituwal. Halimbawa, an Internet nagagamit na marhay sa komunikasyon, edukasyon, asin aling-alingan. Ginagamit kan organisasyon nin Dios an Internet sa paggibo nin dakol na marahay na bagay. Minsan siring, dakol na site sa Internet an peligroso sa moral asin espirituwal. An mga web site na nagpapalakop nin pornograpiya malinaw na peligroso sa espirituwal na salud nin mga siudadano kan Kahadean. Pirang dekada nang nagpapatanid sa sato an grupong maimbod na oripon dapit sa siring na mga site. Nagpapasalamat nanggad kita sa mga patanid na ini para sa espirituwal na salud!
11 Sa nakaagi pa sanang mga taon, saro pang klase nin site an nagin popular na marhay—na puedeng magin kapakipakinabang kun maingat na marhay na gagamiton. Alagad an mga site na ini, na inaapod na social networking Web sites, posible man na makadanyar. An saro puedeng mabantad sa impluwensia nin maraot na kairiba huli kaiyan. (1 Cor. 15:33) Kun siring, bakong makangangalas na an organisasyon nin Dios nagtatao nin timbang na mga patanid dapit sa paggamit kan siring na mga site. Nabasa mo na daw an gabos na bago pa sanang artikulo na ipinublikar kan maimbod na oripon manongod sa paggamit nin mga social networking site? Bako nanggad madonong na gamiton an siring na mga site na dai nguna binabasa an mga artikulong iyan! * Garo man sana iyan pag-inom nin bolong na makosog an epekto na dai nguna binabasa an patanid na nakasurat sa bote.
12. Taano ta kalolongan na baliwalaon an mga patanid?
12 An mga nagbabaliwala sa mga patanid kan maimbod na oripon dai malilikayan na madanyaran an saindang sadiri asin an mga namomotan ninda. May mga naaadik sa paghiling nin pornograpiya o nakagibo nin imoralidad dangan dinadaya an saindang sadiri na isipon na dai nahihiling ni Jehova an ginigibo ninda. Kalolongan nanggad na isipon na puede niatong itago ki Jehova an satong paggawe! (Tal. 15:3; basahon an Hebreo 4:13.) Gusto nin Dios na tabangan an mga siring asin pinapahiro nia an saiyang daganon na mga representante na magmaigot na tabangan sinda. (Gal. 6:1) Minsan siring, kun paanong puedeng bawion nin mga gobyerno nin tawo an pagkasiudadano nin saro na naggigibo nin partikular na mga krimen, babawion ni Jehova an pagkasiudadano kan mga dai nagsosolsol na nagbabalga sa saiyang mga pamantayan. * (1 Cor. 5:11-13) Alagad, maheherakon sia. An mga nagsosolsol asin nagbabakle kan saindang paggawe puedeng magkaigwa giraray nin marahay na kamugtakan ki Jehova asin magdanay na siudadano kan Kahadean. (2 Cor. 2:5-8) Dakula nanggad an onra niato na paglingkodan an siring kamamomoton na Hade!
AN MGA SIUDADANO KAN KAHADEAN NAGPAPAHALAGA SA EDUKASYON
13. Paano ipinapahiling kan mga siudadano kan Kahadean na pinapahalagahan ninda an edukasyon?
13 Nagmamaigot an dakol na gobyerno nin tawo na tokdoan an saindang mga siudadano. Nag-oorganisar sinda nin mga eskuelahan na nagtotokdo nin pagbasa, pagsurat, asin praktikal na kaaraman sa pagtrabaho. Pinapahalagahan kan mga siudadano kan Kahadean an sekular na mga eskuelahan na ini asin maigot na nag-aadal na magbasa, magsurat, saka suportaran sa pinansial an saindang sadiri. Orog pa nganing pinapahalagahan ninda an edukasyon na nakukua ninda bilang mga siudadano kan Kahadean nin Dios. Paagi sa Kristianong kongregasyon, dinadagka kita ni Jehova na magbasa. Dinadagka an mga magurang na magbasa sa saindang saradit na aki. Kada bulan, dakol na pahina nin impormasyon na basado sa Biblia an ipinupublikar kan maimbod na oripon sa The Watchtower asin Awake! Kun magbabasa ka nin mga duwang pahina kada aldaw kan bulan, danay kang makakasubaybay sa mahalagang marhay na pinakapaagihan na ini kan edukasyon nin Kahadean.
14. (a) Anong pagsasanay an inaako niato? (b) Anong mga suhestion para sa banggi nin Pampamilyang Pagsamba an ikinakaaplikar nindo?
14 Serosemana, nag-aako nin pagsasanay an mga siudadano kan Kahadean sa saindang mga pagtiripon sa kongregasyon. Halimbawa, an Teokratikong Paadalan sa Pagmiministro labi nang anom na dekadang nagtatabang sa mga estudyante na magin epektibong mga paratokdo kan Tataramon nin Dios. Nakalista ka daw sa paadalan na ini? Sa nakaagi pa sanang mga taon, partikularmenteng idinodoon kan maimbod na oripon an semanal na banggi nin Pampamilyang Pagsamba. Pinapakosog kan areglong ini an pagkasararo nin pamilya. Ikinakaaplikar na daw nindo an mga suhestion na ipinublikar sa satong mga babasahon? *
15. Ano an saro sa pinakadakulang mga pribilehio niato?
15 An mga siudadano nin mga gobyerno nin tawo nagrarali sa publiko tanganing suportaran an sarong partido politikal, na naghaharongharong pa ngani sa paggibo kaiyan. Sa mas mahiwas nanggad na paagi, an mga siudadano kan Kahadean bilog na kosog na nagsusuportar sa Kahadean nin Dios paagi sa paghulit sa tinampo asin sa harong-harong. Sa katunayan, arog kan sinambit sa naenot na pinag-adalan na artikulo, An Torrengbantayan, na nagpapahayag kan Kahadean ni Jehova, iyo ngonyan an magasin na may pinakamahiwas na sirkulasyon sa daga! An saro sa pinakadakulang mga pribilehio niato iyo na sabihon sa iba an manongod sa Kahadean nin Dios. Maigot ka daw sa paghuhulit?—Mat. 28:19, 20.
16. Paano mo mapapatunayan na marahay kang siudadano kan Kahadean nin Dios?
16 Dai na mahahaloy, solamenteng an Kahadean nin Dios an gobyernong mamamahala sa daga. Didirehiran kaiyan an gabos na aspekto nin buhay, bako sanang pang-espirituwal kundi pansosyedad man. Magigin marahay ka daw na siudadano kan Kahadean nin Dios sa panahon na iyan? Ngonyan na an panahon tanganing patunayan na magigin marahay kang siudadano. Sa gabos na desisyon mo aroaldaw, gibohon an gabos para sa ikakamuraway ni Jehova asin sa siring patunayan na naghihiro ka bilang marahay na siudadano kan Kahadean nin Dios.—1 Cor. 10:31.
[Mga Nota sa Ibaba]
^ par. 11 Halimbawa, hilingon an Awake! na Hulyo 2011, pahina 24-27; Agosto 2011, pahina 10-13; asin Pebrero 2012, pahina 3-9.
^ par. 14 Hilingon An Torrengbantayan na Agosto 15, 2011, pahina 6-7 asin An Satong Ministeryo sa Kahadean na Enero 2011, pahina 3-6.
[Mga Hapot Para sa Pag-adal]
[Blurb sa pahina 14]
Hinihimate mo daw an basado sa Biblia na mga patanid dapit sa Internet?
[Ritrato sa pahina 12]
Arog kan mga aki ni Kora, ikinakaogma mo daw na marhay an dalisay na pagsamba asin an kasaysayan kaiyan?
[Ritrato sa pahina 15]
Dakula an magigibo kan saindong banggi nin Pampamilyang Pagsamba tanganing ika asin an saimong mga namomotan magin marahay na siudadano kan Kahadean
