Teokratikong mga Paadalan—Ebidensia kan Pagkamoot ni Jehova
SI Jehova an satong “Kaharohalangkaweng Instruktor.” (Isa. 30:20, NW) Pagkamoot an nagmomotibar sa saiya na tokdoan asin sanayon an iba. Halimbawa, huling napapahiro nin hararom na pagkamoot, ipinapahiling ni Jehova ki Jesus an ‘gabos na ginigibo nia.’ (Juan 5:20) An pagkamoot ni Jehova sa sato, na mga Saksi nia, an nagpapahiro sa saiya na tawan kita kan “dila na sa madonong,” mantang ginigibo niato an gabos tang makakaya tanganing tawan sia nin onra asin tabangan an iba.—Isa. 50:4.
Sa pag-arog sa pagkamoot na ipinapahiling ni Jehova, an Komite sa Pagtotokdo kan Namamahalang Grupo naggagamit nin sampulong teokratikong paadalan tanganing sanayon an mga may pagmawot saka nasa kamugtakan na magpalista. Minamansay mo daw an mga paadalan na ini bilang ebidensia kan pagkamoot ni Jehova?
Maogmang estudyaran an pangkagabsan na impormasyon dapit sa presenteng teokratikong mga paadalan asin an komento kan nagkapira na nakaatender na dian. Dangan hapoton an sadiri, ‘Paano ako makikinabang sa pagtotokdong ini nin Dios?’
MAKINABANG SA TEOKRATIKONG PAGSASANAY
Bilang “an Dios nin pagkamoot,” tinatawan kita ni Jehova nin pagsasanay na nagtataong kahulogan sa buhay niato, nag-aandam sa sato na mapangganahan an mga kadepisilan, asin nagtatabang sa sato na makamate nin dakulang kagayagayahan sa ministeryo. (2 Cor. 13:11) Arog kan mga disipulo kan enot na siglo, nasasangkapan kitang marhay na tabangan an iba, ‘na tinotokdoan sinda na otobon an gabos’ na ipinagboot sa sato.—Mat. 28:20.
Dawa dai kita makaatender sa gabos na paadalan na ini, makikinabang kita sa kisiera saro sa mga iyan. Asin magagamit niato an nakukua tang instruksion na basado sa Biblia. Magigin mas epektibo man kita sa ministeryo paagi sa paglilingkod na kaiba kan sinanay na marhay na mga lingkod ni Jehova.
Hapoton an sadiri, ‘Itinotogot daw kan kamugtakan ko na aboton an pasohan na makaatender sa arin man sa mga paadalan na ini?’
Para sa mga nagsasamba ki Jehova, sarong pribilehio na suportaran an kapakipakinabang na mga paadalan na ini asin matokdoan dian. Logod na paagi sa pagsasanay na inaako mo, orog kang maparani sa Dios asin masangkapan na otobon an mga paninimbagan mo sa saiya, nangorogna an apuradong sugo na ihulit an maogmang bareta.
