SINABI ni Jesus na sa templo ni Jehova daing matatadang gapo sa ibabaw nin gapo—sarong hula na nautob kan an Jerusalem laglagon kan hukbo nin Roma sa panginginot ni Tito kan 70 C.E. (Mat. 24:2) Paghaloy-haloy, nagplano si Emperador Julian na itugdok liwat an templo.

Si Julian an inaapod na huring paganong emperador kan Roma. An pamangkin na ini ni Constantinong Dakula nag-ako nin Kristiyano daang edukasyon. Pero, pakatapos na iproklamar bilang emperador kan 361 C.E., hayagan niyang isinikwal an edukasyon na iyan pati an maraot na porma nin Kristiyanismo kan panahon niya apabor sa paganismo. Inaapod siya sa mga libro nin kasaysayan bilang “an Apostata.”

Nabaldi si Julian sa Kristiyanismo. An sarong posibleng dahilan iyo na kan sais anyos siya, nahiling niya na an saiyang ama asin mga paryente ginadan kan mga representante kaiyan. Sigun sa mga historyador kan simbahan, inenkaminar ni Julian an mga Judio na itugdok liwat an saindang templo, sa paniniwala na mapapatunayan kaiyan na si Jesus palsong propeta. *

Daing duda na nagplano si Julian na itugdok liwat an templo. Pigdedebatehan kan mga historyador kun baga pinunan niya talaga an pagtugdok liwat asin kun iyo, ano an dahilan na napundo iyan. Pero, sarong bagay an sigurado. Ginadan si Julian dai pang duwang taon puon kan siya magin emperador, asin kasabay niyang nawara an saiyang proyekto.