1, 2. (a) Paano ka nakapagdesisyon na paglingkudan an Diyos? (b) Ano an mga puwede tang ihapot dapit sa satong espirituwal na mana?

MINILYON sa sato ngunyan an madunong na nagdesisyon na paglingkudan si Jehova Diyos asin maingat na sunudon an halimbawa ni Jesu-Cristo. (Mat. 16:24; 1 Ped. 2:21) Minamansay niyato na seryosong bagay an pagdusay kan satong buhay sa Diyos. An satong desisyon nakabasar, bako sa hababaw na kaaraman sa pira sanang teksto, kundi sa hararom na pag-adal kan Tataramon nin Diyos. Bilang resulta, nakanuod kita nin dakul na nakakapakusog sa pagtubod na detalye dapit sa mana na ipinanuga ni Jehova para duman sa mga naghihinguwang ‘mamidbid siya asin si Jesu-Cristo na saiyang sinugo.’—Juan 17:3; Roma 12:2.

² Tanganing mapagdanay an satong matanos na kamugtakan bilang mga Kristiyano, dapat kitang gumibo nin mga desisyon na nakakapaugma sa satong Ama sa langit. Pag-uulayan sa artikulong ini an importanteng mga hapot na ini: Ano an satong mana? Paano niyato maninigong mansayon iyan? Ano an puwede tang gibuhon tanganing masiyerto na makakamtan ta an satong mana? Ano an makakatabang sa sato na gumibo nin madunong na mga desisyon?

3. Anong mana an naghahalat sa (a) mga linahidan asin (b) ‘ibang mga karnero’?

³ Medyo dikit sanang Kristiyano an may paglaom na mag-ako nin ‘sarong pamana na dai matutunaw, asin daing digta, asin dai napapara’—an daing kaagid sa halaga na pribilehiyong mamahala kaiba ni Cristo sa langit. (1 Ped. 1:3, 4) Tanganing makamtan an siring na mana, sinda dapat na “mamundag liwat.” (Juan 3:1-3, BPV) * Ano an mana kan minilyon na ‘ibang mga karnero’ ni Jesus, na nakikipagtabangan sa saiyang linahidan  na mga parasunod sa paghuhulit kan maugmang bareta kan Kahadian nin Diyos? (Juan 10:16) An ibang mga karnero maako kan mana na dai nakamtan kan nagkasalang si Adan asin Eva—an buhay na daing katapusan sa paraisong daga na mayo na nin pagsakit, kagadanan, o pagmundo. (Kap. 21:1-4) Kaya nakapanuga si Jesus sa sarong parakasala na nagadan kaiba niya: “Totoong sinasabi ko sa saimo ngunyan, Ika makakaibahan ko sa Paraiso.”—Luc. 23:43, NW.

4. Anong mga bendisyon an nakakamtan ta na ngunyan?

⁴ Ngunyan pa sana, nakakamtan ta na an nagkapirang aspekto kan satong mana. Huling kita nagtutubod sa ‘pantubos ni Cristo Jesus,’ igwa kita nin panglaog na katuninungan asin dayupot na relasyon sa Diyos. (Roma 3:23-25) May malinaw kitang pakasabot sa mahalagang marhay na mga panuga na yaon sa Tataramon nin Diyos. Apuwera kaiyan, dakulaon an kagayagayahan niyato huling kita kabtang nin mamumuton na internasyonal na kasararuan nin magturugang. Asin maugmang pribilehiyo nanggad an magin saro sa mga Saksi ni Jehova. Siyertong pinapahalagahan nanggad niyato an satong mana!

5. Ano an pinagmamaigutan ni Satanas na gibuhon sa mga lingkod nin Diyos, asin ano an makakatabang sa sato na makapanindugan nin marigon laban sa saiyang mga katusuhan, o pakana?

⁵ Pero, tanganing dai ta mawara an satong marahayon na mana, dapat na magdanay kitang alerto sa mga taktika ni Satanas. Pirming pinagmamaigutan ni Satanas na impluwensiyahan an mga lingkod nin Diyos na gumibo nin salang mga desisyon tanganing mawara sa sainda an saindang mana. (Bil. 25:1-3, 9) Huling aram ni Satanas na harani na an saiyang katapusan, urog pa siyang naghihinguwa na ilagalag kita. (Basahon an Kapahayagan 12:12, 17.) Tanganing padagos kitang ‘makatindog tumang sa mga katusuhan kan Diyablo,’ dapat na padagos tang pahalagahan na marhay an satong mana. (Efe. 6:11) Mapadapit digdi, marahay na isapuso ta an mga leksiyon na manunudan niyato sa nagpapatanid na halimbawa ni Esau, an matuang aki kan patriyarkang si Isaac.

6, 7. Siisay si Esau, asin anong mana an naghahalat sa saiya?

⁶ Haros 4,000 na taon na an nakaagi, si Isaac asin Rebeca nagkaaki nin kambal, si Esau asin si Jacob. Mantang nagdadakula an kambal, nahiling an pagkakaiba sa saindang ugali asin mga gustong gibuhon. “Si Esau nagin lalaking tataong mangayam, lalaking tuod sa kapatagan,” pero “si Jacob lalaking daing katuyawan, na nag-iirok sa mga tolda.” (Gen. 25:27, NW) Uyon sa paratradusir kan Bibliya na si Robert Alter, an Hebreong termino na trinadusir na “daing katuyawan” nagsusuherir nin “integridad o pagigin daing sala.”

⁷ Kan si Esau asin Jacob 15 anyos na, nagadan an saindang lolo na si Abraham, pero an panuga ni Jehova ki Abraham dai nawara. Paghaloy-haloy, inutro iyan ni Jehova ki Isaac, na sinasabi na bebendisyunan kan gabos na nasyon sa daga an saindang sadiri paagi sa banhi ni Abraham. (Basahon an Genesis 26:3-5.) Ihinayag kan panugang iyan na an Mesiyas—an maimbod na “banhi” na sinambit sa Genesis 3:15—magikan ki Abraham. Bilang matuang aki ni Isaac, si Esau an may legal na deretso sa panugang iyan. Marahayon nanggad na mana an naghahalat ki Esau! Pinahalagahan niya daw iyan?

8, 9. (a) Anong desisyon an ginibo ni Esau mapadapit sa saiyang mana? (b) Pakalihis nin mga taon, ano an narealisar ni Esau dapit sa saiyang desisyon, asin ano an nagin reaksiyon niya?

⁸ Sarong aldaw pag-uli ni Esau hali sa kapatagan, nahiling niya si Jacob na “nagluluto nin sarong kakanon.” Si Esau nagsabi, “Dali man, tabi, pakakana ako kan mapula, kaiyan na mapula, huli ta kaniguan ko kapagal!” Bilang simbag, sinabihan ni Jacob si Esau: “Pabakalan nguna sako an saimong katanusan sa pagkamatua!” Ano an nagin desisyon ni Esau? Masakit man paniwalaan pero ini an sinabi niya: “Ano man an pakinabang sako kan pagkamatua?” Iyo, pinili nanggad ni Esau an sarong mangko nin sinabawan imbes na an saiyang deretso sa pagkamatua! Tanganing magin legal an pagpabakal kan pagkamatua, nag-insistir si Jacob: “Sumumpa ka nguna sa sako!” Mayong pagduwa-duwa na ipinabakal ni Esau an saiyang  pagkamatua. Pagkatapos kaiyan, “tinawan ni Jacob si Esau nin tinapay asin nin linagang lentehas, asin siya nagkakan na asin nag-inom. Dangan siya tuminindog asin huminali. Kaya pinagmenos ni Esau an pagkamatua.”—Gen. 25:29-34, NW.

⁹ Pakalihis nin mga taon, kan pagmati ni Isaac madali na siyang magadan, guminibo nin paagi si Rebeca tanganing masiyerto na makukua ni Jacob an pagkamatua na ipinabakal ni Esau. Kan marealisar ni Esau sa huri kun gurano kamangmang kan nagin desisyon niya, nakimahirak siya ki Isaac: ‘Bendisyuni man ako, ama ko. Dai ka nin tinadang bendisyon sa sakuya?’ Kan sabihon ni Isaac na dai niya na mababawi an bendisyon na itinao niya ki Jacob, ‘ilinangkaw ni Esau an saiyang tingog, asin tuminangis.’—Gen. 27:30-38.

10. Ano an nagin pagmansay ni Jehova ki Esau asin Jacob, asin taano?

¹⁰ Anong mga aspekto kan disposisyon ni Esau an nagin lataw sa Kasuratan? Ipinahiling niya na mas mahalaga sa saiya na mapaniguan an saiyang makalaman na mga pagmawot kisa sa makamtan an mga bendisyon na kabtang kan saiyang mana. Dai pinahalagahan ni Esau an saiyang pagkamatua asin malinaw na dai niya talaga namumutan an Diyos. Apuwera kaini, dai niya inisip an magigin epekto kan saiyang desisyon sa saiyang magigin mga aki. Sa kabaliktaran, inapresyar na marhay ni Jacob an saiyang mana. Halimbawa, sinunod ni Jacob an instruksiyon kan saiyang mga magurang dapit sa pagpili nin maaagom. (Gen. 27:46–28:3) Huli sa desisyon na ini ni Jacob na nangaipo nin pagpapasensiya asin pagsasakripisyo, siya nagin apuon kan Mesiyas. Ano an nagin pagmansay nin Diyos ki Esau asin Jacob? Paagi ki propeta Malaquias, si Jehova nagsabi: ‘Namutan ko si Jacob, asin ikinaungis ko si Esau.’—Mal. 1:2, 3.

11. (a) Taano ta makikinabang kita bilang mga Kristiyano sa nagpapatanid na halimbawa ni Esau? (b) Mapadapit sa ginibo ni Esau, taano ta sinambit ni Pablo an pakikisaro?

¹¹ Makikinabang daw an mga Kristiyano ngunyan sa sinasabi kan Bibliya dapit ki Esau? Iyo nanggad. Si apostol Pablo nagpatanid sa mga kapagtubod niya na mag-ingat tanganing dai magkaigwa sa sainda ‘nin parasambay [“parapakisaro,” NW], o basang na tawo, siring ki Esau, na huli sa sarong kakanon nagpabakal kan saiyang pagkamatua.’ (Heb. 12:16) An patanid na iyan aplikado pa man giraray sa mga Kristiyano. Dapat na papagdanayon ta an satong apresasyon sa sagradong mga bagay tanganing dai kita madaog kan makalaman na mga pagmawot asin dai mawara an satong espirituwal na mana. Pero, taano ta ikinonektar ni Pablo an pakikisaro sa ginibo ni Esau? Huling kun an saro igwa nin makalaman na disposisyon na arog kan ki Esau, posibleng marhay na an sagradong mga bagay iriribay niya sa salang mga kaugmahan, arog baga nin pakikisaro.

12. (a) Paano kita sinusugutan ni Satanas? (b) Magtao nin mga halimbawa sa Kasuratan na makakatabang sa sato kun kita napapaatubang sa masakit na pagdedesisyon.

¹² Bilang mga lingkod ni Jehova, siyertong dai  kita naghahanap nin nakakatentar na mga situwasyon na puwedeng sumagkod sa imoral na paggawi sa sekso. Imbes, kita namimibi na lugod dai itugot ni Jehova Diyos na madaog kita kun may magtentar sa sato na suwayon Siya. (Mat. 6:13) Pero, padagos na hinihinguwa ni Satanas na paluyahon an satong espirituwalidad mantang pinagmamaigutan ta na papagdanayon an satong integridad sa bikong kinaban na ini. (Efe. 6:12) Bilang an diyos kan maraot na sistemang ini nin mga bagay, aram kan Diyablo kun paano aaprobetsaran an satong bakong perpektong mga pagmawot paagi sa pagtao nin mga sugot na inaagihan man nin ibang bakong perpektong mga tawo. (1 Cor. 10:8, 13) Halimbawa, imahinara na yaon ka sa sarong situwasyon na nagtatao nin oportunidad na mapaniguan sa imoral na paagi an sarong partikular na pagmawot. Ano an magigin desisyon mo? Magigin arog ka daw ki Esau asin masabi: ‘Dali! Itao mo na iyan sako!’ O lalabanan mo daw an sugot asin dudulagan iyan, arog kan ginibo kan aki ni Jacob na si Jose, na tinentaran kan agom ni Potifar?—Basahon an Genesis 39:10-12.

13. (a) Sa ngunyan, paano an dakul huminiro nin arog ki Jose, pero paano man an iba huminiro nin arog ki Esau? (b) Huli sa mga huminiro nin arog ki Esau, ano an narerealisar ta na mahalagang gibuhon?

¹³ Dakul sa satong mga tugang an napaatubang sa mga situwasyon kun sain kinaipuhan nindang magdesisyon kun baga sinda mahiro nin arog ki Esau o arog ki Jose. An kadaklan huminiro nin may kadunungan asin pinaugma an puso ni Jehova. (Tal. 27:11) Pero, kan napapaatubang sa sugot, may mga kapagtubod kita na nagdesisyon na humiro nin arog ki Esau, na isinasapeligro an saindang espirituwal na mana. Sa katunayan, an dahilan kan dakul na hudisyal na aksiyon asin pagtitiwalag kada taon iyo an salang paggawi sa sekso. Mahalaga nanggad na andamon an satong puso ngunyan—bago pa man kita mamugtak sa mga situwasyon na mabalo kan satong integridad! (Sal. 78:8) Kisiyera duwang lakdang an puwede tang gibuhon na magseserbing depensa sa sugot asin matabang sa sato na makagibo nin madunong na mga desisyon.

14. Anong mga hapot an maninigo tang hurop-hurupon tanganing matabangan kita na ‘ikaungis an maraot’ asin ‘dumayupot sa marahay’?

¹⁴ An inot na lakdang iyo an paghurop-hurop sa ibubunga kan satong mga gibo. An rarom kan satong apresasyon sa satong espirituwal na mana nakadependeng marhay sa rarom kan satong pagkamuot ki Jehova, an Kagtao kan manang iyan. Tutal, kun namumutan ta an saro, habo ta siyang kulgan. Imbes, pinagmamaigutan ta na makamtan an saiyang pag-uyon. Huli kaiyan, marahay na magtao kita nin panahon na hurop-hurupon kun ano an puwedeng magin epekto sa sato asin sa iba kun mapadara kita sa maating mga pagmawot nin laman. Maninigong haputon ta an satong sadiri: ‘Paano puwedeng maapektaran kan sakong makasadiring paggawi an relasyon ko ki Jehova? Ano an puwedeng magin epekto sa sakong pamilya kan sala kong gibo? Paano iyan makakaapektar sa sakong mga tugang sa kongregasyon? May masisingkog daw huli sako?’ (Fil. 1:10) Puwede ta man ihapot: ‘Sulit daw an halipot na panahon nin salang kaugmahan kun ikukumparar sa kamunduan na magigin resulta kaiyan? Talaga daw na gusto kong magin arog ki Esau, na matangis nin may kapaitan kun marealisar ko na kun gurano kagabat kan sakong nagibo?’ (Heb. 12:17) An paghurop-hurop sa siring na mga hapot matabang sa sato na ‘ikaungis an maraot’ asin mangapot o ‘dumayupot sa marahay.’ (Roma 12:9) An pagkamuot ki Jehova nangurugnang mapahiro sa sato na pangaptan an satong mana.—Sal. 73:28.

15. Ano an makakapakusog kan satong depensa laban sa mga puwersa na nagsasapeligro kan satong espirituwalidad?

¹⁵ An ikaduwang lakdang iyo an pagpakusog kan satong depensa. Dakul na probisyon si Jehova tanganing mapakusog ta an satong depensa laban sa mga bagay digdi sa kinaban na nagsasapeligro kan satong espirituwalidad. Kaiba sa mga probisyon niya an pag-adal sa Bibliya, Kristiyanong mga pagtiripon, ministeryo sa langtad, asin pamibi. (1 Cor. 15:58) Sa kada pagkakataon na biyo tang ipinapahayag ki Jehova an laog kan satong puso paagi sa  pamibi asin kada magkaigwa kita nin makahulugan na pakikikabtang sa Kristiyanong ministeryo, garo man sana pinapakusog ta an satong depensa laban sa mga sugot. (Basahon an 1 Timoteo 6:12, 19.) Dakula an papel kan satong sadiring paghihinguwa sa pagigin makusog kan satong depensa. (Gal. 6:7) Itinatampok ini sa ikaduwang kapitulo kan Talinhaga.

16, 17. Paano kita magkakaigwa kan kakayahan na gumibo nin madunong na mga desisyon?

¹⁶ Dinadagka kita kan kapitulo 2 kan Talinhaga na magkaigwa nin kadunungan asin kakayahan sa pag-iisip. An mga regalong ini nakakatabang sa sato kun arin an pipilion—an tama o an sala, disiplinahon an sadiri o paniguan iyan. Pero, magigin mapanggana sana kita kun andam kitang maghinguwa. Bilang pagduduon sa pundamental na katotoohan na iyan, an Bibliya nagsasabi: ‘Aki ko, kun akuon mo an sakuyang mga tataramon, asin rimpuson mo sa saimo an sakuyang mga tugon, na saimong pakamuninungon an saimong talinga sa kadunungan; kun saimong ikiling an saimong puso sa pagkatatao [“pakabatid,” NW]; kun ika mag-agrangay sa pakamidbid, asin itao mo an saimong tingog sa pagkatatao; kun siring baga sa pirak hanapon mo siya, asin siyasaton mo siya nin siring baga sa mga kayamanan; dangan kaiyan marururop mo an pagkatakot ki Jehova, asin makukua mo an pakamidbid sa Diyos. Huli ta itinatao ni Jehova an kadunungan, asin sa saiyang nguso naggigikan an pakamidbid asin an pakasabot.’—Tal. 2:1-6.

¹⁷ Kaya, malinaw na magkakaigwa sana kita kan kakayahan na kinakaipuhan sa paggibo nin madunong na mga desisyon kun naaabot ta an mga kondisyon na nasambitan sa Talinhaga. Mapanggana kitang makakapanindugan nin marigon laban sa mga sugot kun tutugutan ta na moldehon kan tataramon ni Jehova an satong panglaog na pagkatawo, kun padagos kitang mamimibi para sa paggiya nin Diyos, asin kun padagos tang hahanapon an kaaraman dapit sa Diyos na garo baga naghahanap nin nakatagong kayamanan.

18. Ano an determinado mong gibuhon nin padagos, asin taano?

¹⁸ Nagtatao si Jehova nin kaaraman, pakasabot, pakabatid, asin kadunungan sa mga naghihinguwa tanganing hanapon an mga regalong ini. Mantang urog tang hinahanap asin ginagamit an mga iyan, urog man kitang nagigin harani sa Kagtao kaiyan, si Jehova. Bilang resulta, an satong dayupot na relasyon ki Jehova Diyos magseserbing proteksiyon kun mapaatubang kita sa sugot. An pagrani ki Jehova asin an pagkatakot sa saiya na may hararom na paggalang maprotektar sa sato tanganing makalikay sa pagkakasala. (Sal. 25:14; Sant. 4:8) Lugod na an pakikikatuod ki Jehova asin an pag-aplikar kan diyosnon na kadunungan magpahiro sa sato gabos na padagos na gumibo nin mga desisyon na makakapaugma sa puso ni Jehova asin ingatan an satong mana.