KAN puminutok an Giyera Mundial I kan 1914, narisa kan dakul na tawo an neutral na paninindugan kan Mga Estudyante sa Bibliya. (Isa. 2:2-4; Juan 18:36; Efe. 6:12) Ano an nangyari kaidto sa mga lingkod nin Diyos sa Britania?

Kan iimplementar sa Britania an Military Service Act of 1916, inobligar na magserbisyo sa militar an mga lalaking daing agom na edad 18 sagkod 40. Igwa iyan nin eksemsiyon sa mga masayuma na an dahilan talagang nakabasar sa “mga paniniwala na may koneksiyon sa relihiyon o moral.” Nag-establisar an gobyerno nin mga husgado na madeterminar kun siisay an maninigong tawan nin eksemsiyon asin sagkod sain.

Sa laog nin halipot na panahon, mga 40 Estudyante sa Bibliya an ibinilanggo sa mga presohan na pangmilitar, asin 8 an ipinadara sa lugar nin ralaban sa Pransia. Huli sa bakong makatanusan na aksiyon na ini, an mga tugang sa Britania nagsurat ki Primer Ministro Herbert Asquith bilang protesta sa ginibong pagbilanggo, kaiba an sarong petisyon na may 5,500 na pirma.

Napabareta na an walong brother na ipinadara sa Pransia sinentensiyahan nin kagadanan paagi sa firing squad huli sa pagsayuma nindang makipaglaban. Pero kan sinda babadilon na, an sentensiya sa sainda ibinaba sa 10 taon na pagkapreso. Ibinalik sinda sa Inglatera para tapuson an sentensiyang iyan sa presohan na pangsibilyan.

Mantang nagpapadagos an giyera, inobligar man na magserbisyo sa militar an mga lalaking may agom. Sa sarong kaso na isinangat sa Manchester, Inglatera, an akusado iyo si Henry Hudson, sarong doktor asin Estudyante sa Bibliya. Kan Agosto 3, 1916, nagdesisyon an korte na siya dai nag-utob kan saiyang obligasyon sa ley, kaya pinamulta siya asin itinao sa hurisdiksiyon kan militar. Kasabay kaiyan an saro pang kaso na binista sa Edinburgh, Scotland. Naabsuwelto si James Frederick Scott, sarong 25 anyos na colporteur. Inapelar kan gobyerno an kaso pero dai iyan idinagos tanganing asikasuhon an saro pang kaso sa London. Sa kasong ini, an brother na si Herbert Kipps napatunayan na nagbalga sa ley, pinamulta siya, asin itinao sa hurisdiksiyon kan militar.

Kan Setyembre 1916, may total na 264 brother an nag-aplay para sa eksemsiyon sa serbisyo militar. Lima sa sainda an tinawan nin eksemsiyon, 154 an tinawan nin “magabat na trabaho na kapakipakinabang sa nasyon,” 23 an inasignaran nin gibuhon sa militar na daing kalabot na pakikilaban, 82 an itinao sa hurisdiksiyon kan militar, asin an pira sa sainda binista sa korte militar huli sa dai pagsunod sa mga pagbuot kan militar. Dakul an nagkontra sa maringis na pagtrato sa sainda sa  presohan na pangmilitar, kaya ibinalyo sinda kan gobyerno sa mga kampong pangsibilyan kun sain puwersahan an pagpatrabaho.

Si Edgar Clay asin Pryce Hughes, na kan huri nagin paraataman kan sangay sa Britania, nagtrabaho sa sarong dam sa Wales. Sa ibong na lado, si Herbert Senior, saro sa walong ibinalik hali sa Pransia, ipinadara sa Wakefield Prison sa Yorkshire. An iba tinapos an sentensiyang magabat na pagtrabaho sa masakit na mga kamugtakan sa Dartmoor Prison, kun sain natipon an pinakadakulang grupo nin mga habong magsuldados huli sa saindang konsiyensiya.

An Estudyante sa Bibliya na si Frank Platt, na nag-uyon na tawan nin mga gibuhon sa militar na daing kalabot na pakikilaban, nagtagal nin halawig asin maringis na persekusyon kan ipinadara siya sa lugar nin ralaban. Si Atkinson Padgett, na nakanuod kan katotoohan dai nahaloy pakatapos maglaog sa militar, nagtios man nin maringis na pagtrato kan mga awtoridad sa militar huli sa pagsayumang makipaglaban.

Dawa ngani dai pa lubos na nasasabutan kan satong mga tugang haros sarong siglo na an nakaagi kun ano an kalabot sa satong paninindugan bilang neutral na mga Kristiyano, hininguwa nindang paugmahon an Diyos na Jehova. An mga nginaranan sa report na ini nagpahiling nin marahay na halimbawa nin pagigin neutral durante nin masakiton na “oras nin pagbalo.” (Kap. 3:10)—Hali sa samong archive sa Britania.