Posibleng may kabisto kang suway sa agom—tibaad bako lang saro kundi dakul pa ngani. Ordinaryo na sana kaya iyan ngunyan. Halimbawa sa Poland, ipinahiling kan pagsiyasat na an mga nasa edad 30 anyos, na tulo sagkod anom na taon nang kasal, posibleng marhay na makipagdiborsiyo; asin bako lang sa arog kaiyan na edad nangyayari an diborsiyo.

Sa katunayan, “ipinapahiling kan estadistika na [sa Europa] kabanga kan nagpapakarasal an madiborsiyo,” an sabi kan Institute for Family Policy sa España. Arog man kaiyan sa ibang mauswag na nasyon.

Ano an epekto kan pagdiborsiyo? Sarong eksperyensiyadong parakonseho sa mga mag-agom sa Sirangan na Europa an nagsabi: “Ginigibong pormal kan diborsiyo kun ano an nangyayari na—an pagkaraot nin relasyon dangan an pagsuwayan, sarong bagay na talagang makulugon sa buot.” Sinabi pa niya na sa parati, “grabe na kaiyan an mamamatian mo—pagkaanggot, pagbasol, pagkadisganar, kawaran nin paglaom, asin pagkasupog.” Ini an nagigin dahilan kun taano ta nakakaisip an iba na maghugot. “Pag ginibo nang pinal kan korte an diborsiyo, diyan na man mapuon na makamati nin kamunduan an sarong diborsiyado asin mag-isip na hinahabuan na siya kan iba. Kaya tibaad maisip-isip niya: ‘Ngunyan na diborsiyado na ako, siisay baya ako? Pasain an buhay ko?’”

Nagigirumduman pa ni Ewa kun ano an namatian niya mga pirang taon na an nakaagi. Sinabi niya: “Kan magin pinal na an diborsiyo mi, grabe an supog ko pag inaapod akong ‘diborsiyada’ kan kataraid mi saka mga katrabaho ko. Grabe an kaanggutan ko. Yaon sako an duwa ming aki, kaya kaipuhan kong magin ina sagkod ama sa sainda.” * Si Adam, na sarong iginagalang na elder sa laog nin 12 taon, nagsabi: “Haros nawara an respeto ko sa sadiri mala ta kun minsan angguton akong marhay, asin nakakaisip akong irayo an sadiri ko sa maski kiisay.”

Huli sa grabeng paghadit sa saindang puturo, an iba nadidipisilan na makabangon—dawa naglihis na an pirang taon pagkatapos magsuwayan. Tibaad isipon ninda na daing pakiaram sa sainda an iba. Sinabi man nin sarong kolumnista na kaipuhan na nindang “baguhon an mga kinatudan ninda asin makanuod na atubangon an mga problema na sinda sana.”

Nagigirumduman ni Stanislaw: “Kan magdiborsiyo kami, pinagbawalan ako kan dati kong agom na mahiling an duwa ming sadit na aking babayi. Kaya pagmati ko mayo nang nagmamakulog sakuya; dawa si Jehova pinabayaan na ako. Habo ko nang mabuhay. Dai nahaloy, napag-isip-isip ko na sala palan an mga iniisip ko.” Nakapurisaw man ki Wanda an pakamati nin kadaihan nin kasiguruhan sa magigin puturo niya. Sinabi niya: “Sigurado ako na dai mahahaloy, dai na magmamakulog sa sako asin sa mga aki ko  an ibang tawo—pati na an mga kapagtubod. Pero, nahihiling ko ngunyan kun paano kami pirming dinadamayan kan mga tugang asin tinatabangan ako mantang pighihinguwa kong mapadakula an mga aki na magin mga lingkod ni Jehova.”

Mahihiling sa siring na mga pananaram na pagkatapos magsuwayan, an iba apektadong marhay kan negatibong mga emosyon. Tibaad magbaba an paghiling ninda sa sadiri, huli ta iniisip ninda na mayo na sindang halaga kaya dai na man dapat tawan nin atensiyon. Apuwera kaiyan, tibaad magin mapaghusgar sinda sa mga nakapalibot sa sainda. Dahil diyan, tibaad isipon na nindang mayong pakilabot asin pagmakulog an kongregasyon. Alagad, mahihiling sa mga eksperyensiya na arog kan ki Stanislaw asin Wanda na narerealisar kan mga suway sa agom na talagang nagmamakulog an mga tugang. Sa katunayan, pambihirang pagmakulog an ipinapahiling kan mga kapwa Kristiyano, maski pa iyan dai tulos naririsa.

Tandaan na sa ibong kan gabos tang paghihinguwa, tibaad makamati pa man giraray nin kamunduan paminsan-minsan an mga kapagtubod na suway sa agom. Tibaad isipon ninda, partikularmente na kan mga sister, na dikit sana an nagmamakulog sa sainda. Inadmitir ni Alicja: “Walong taon na an nakaagi kan magdiborsiyo kami. Pero, kun minsan hababaon pa man giraray an paghiling ko sa sadiri. Pag arog kaiyan, nakakaisip na akong isuway an sadiri ko sa iba dangan magparahibi asin kahirakan an sadiri.”

Normal sana kun nakakamati nin arog kan mga nasambit digdi an saro na suway sa agom, pero an Bibliya nagpapatanid dapit sa pagsuway kan sadiri sa iba. Kun dai susunudon, puwede ining magresulta sa pagsikwal sa “gabos na praktikal na kadunungan.” (Tal. 18:1, NW) Pero, dapat masabutan kan saro na namumundo na sarong kadunungan kun mag-iingat siya na dai purupirming maghagad nin konseho o pagranga sa bako niyang kasekso. Sa paaging ini, malilikayan na magkaigwa nin salang romantikong pagmati.

An mga kapagtubod tang suway sa agom tibaad nadidipisilan huli sa manlain-lain na namamatian, kaiba na an pagkamundo, pagkahadit sa kun ano an magigin puturo ninda, asin pakamati pa ngani na hinahabuan sinda kan iba. Huling nasasabutan tang an arog kaiyan na mga pagmati normal sana asin dipisil paglabanan, mahalagang arugon ta si Jehova paagi sa padagos na pagsuporta sa sainda. (Sal. 55:22; 1 Ped. 5:6, 7) Makakasiguro kita na aapresyaron nanggad ninda an ano man na tabang na itinatao ta sa sainda. Iyo, manunumpungan ninda sa laog kan kongregasyon an tabang hali sa tunay na mga katuod!—Tal. 17:17; 18:24.