DUWANG taon bago kaiyan, kami kan kapartner ko sa pagmisyonero na si Evelyn Trabert naggradwar sa ikaapat na klase kan Watchtower Bible School of Gilead, na ginigibo kaidto harani sa Ithaca, New York. Idinestino kaming maglingkod sa Santa Ana. Pero bago ko idagos an halipot na istorya kan haros 29 taon ko sa pagmimisyonero, tugutan nindo akong iistorya kun taano ta pinili ko an gibuhon na iyan.

Kan mamundag ako kan 1923, nakaistar an mga magurang ko na si John asin Eva Olson sa Spokane, Washington, U.S.A. Luterano sinda pero dai sinda nagtutubod sa katukduan kaiyan na pagpapasakit sa nagkakalayong impiyerno ta dai sinda makatubod na magigibo iyan nin sarong mamumuton na Diyos. (1 Juan 4:8) Nagtatrabaho si Papa sa sarong panaderya asin sarong banggi, siniyerto sa saiya kan katrabaho niya na dai itinutukdo kan Bibliya na an impiyerno sarong lugar nin pagpasakit. Dai nahaloy, nagpa-Bible study an mga magurang ko sa mga Saksi ni Jehova asin nanudan ninda kun ano talaga an itinutukdo kan Bibliya dapit sa buhay pagkagadan.

Nuwebe anyos pa sana ako kaidto, pero nagigirumduman ko na ugmahon na pig-iistorya kan mga magurang ko an manungod sa nanunudan nindang mga katotoohan sa Bibliya. Mas lalo pa sindang naugma kan maaraman ninda na Jehova an pangaran kan tunay na  Diyos asin kan makabutas sinda sa nakakaribong na doktrina nin Trinidad. Arog sa espongha, inako ko tulos an mga katukduan na iyan sa Kasuratan, ‘an katotoohan na nagpapatalingkas sa tawo.’ (Juan 8:32, BPV) * Kaya dai ko lamang naisip na nakakatungka an pag-adal sa Bibliya saka gustong-gusto kong siyasaton pirmi iyan. Dawa masusupgon ako, iniibanan ko an mga magurang ko sa paghuhulit. Nabawtismuhan sinda kan 1934. Kan 1939, nabawtismuhan man ako sa edad na 16.

Kan tig-init nin 1940, ipinabakal kan sakong mga magurang an harong mi, asin nagpayunir kaming tulo sa Coeur d’Alene, Idaho. Nag-arkila kami nin apartment na nasa itaas nin sarong talyer. An istaran mi an nagin tiripunan kan kongregasyon. Kaidto, pira sanang kongregasyon an may Kingdom Hall, kaya nagtitiripon an mga tugang sa pribadong mga harong o inarkilang mga kuwarto.

Kan 1941, nag-atender kaming tulo sa asembleya sa St. Louis, Missouri. Domingo an “Aldaw kan mga Aki,” kaya pinatukaw sa atubangan mismo kan entablado an mga 5 sagkod 18 anyos. Sa pagtatapos kan pahayag ni Brother Joseph F. Rutherford, kinaulay niya kaming mga aki: “Kamo gabos . . . na mga aki . . . na nagdesisyon na magsunod sa Diyos asin sa saiyang Hadi, magtirindog tabi kamo!” Nagtirindog kami gabos. Dangan makusog na sinabi ni Brother Rutherford: “Uya, labing 15,000 na bagong saksi para sa Kahadian!” Pinakusog kan aldaw na iyan an desisyon kong magpayunir sa bilog kong buhay.

Pirang bulan pagkatapos kan asembleya sa St. Louis, nagbalyo an pamilya mi sa parteng timog kan California. Inasignaran kaming magbilog nin kongregasyon sa siyudad nin Oxnard. Nakaistar kami sa sarong sadit na harong na de ruweda na may saro sanang kama. An lamesa na kinakakanan mi an nagigin “kama” ko pag banggi. Dakula nanggad na pagkakaiba ta dati may sadiri akong kuwarto!

Bago pa kami mag-abot sa California, binomba kan Hapon an Pearl Harbor sa Hawaii, kan Disyembre 7, 1941. Kan sunod na aldaw, nagbali an Estados Unidos sa Giyera Mundiyal II. Ipinagbawal kan mga awtoridad an pagbukas nin ilaw pag banggi. Nagpapatrolya an mga submarino kan Hapon sa may baybayon kan California, kaya kun madiklom madidipisilan sindang tamaan an target ninda.

Pakalihis nin nagkapirang bulan, kan Setyembre 1942, nag-atender kami sa New World Theocratic Assembly sa Cleveland, Ohio. Duman itinao ni Brother Nathan H. Knorr an pahayag na “Katuninungan—Makakapagpadagos Daw Iyan?” Ipinaliwanag niya an Kapahayagan kapitulo 17 na manungod sa sarong “mabangis na hayop” na “yaon kaidto, alagad ngunyan mayo na, pero madali nang lumuwas sa bûngaw.” (Kap. 17:8, 11, NW) Sinabi niya na “an mabangis na hayop” iyo an Liga de Naciones na dai na nagpupunsiyonar puon pa kan 1939. Ihinula kan Bibliya na an Ligang iyan sasalidahan, na maresulta sa sarong panahon nin relatibong katuninungan. Nangyari nanggad iyan ta kan 1945 natapos an Giyera Mundiyal II. Pagkatapos kaiyan, nagluwas giraray an “mabangis na hayop” bilang an Naciones Unidas. Kan panahon na iyan, mas pinahiwas kan Mga Saksi ni Jehova an saindang paghuhulit sa bilog na kinaban, asin talagang duminakul an Saksi puon kaidto!

Natabangan ako kan hulang iyan na masabutan kun ano an mangyayari sa maabot na panahon. Kan ipaisi na magkakaigwa na nin Gilead School sa masunod na taon, nagin interesado akong marhay na magmisyonero. Kan 1943, idinestino akong magpayunir sa Portland, Oregon. Kaidto, naggagamit kami nin  ponograpo tanganing ipadangog an mga sermon sa mga kagharong sa may pinto ninda, pagkatapos aalukan mi sinda nin babasahon sa Bibliya manungod sa Kahadian nin Diyos. Sa bilog na taon na idto, pirmi kong iniisip an pagmimisyonero.

Kan 1944, ugmahon ako kan maresibi ko an imbitasyon sa Gilead kaiba an kaamiga kong si Evelyn Trabert. Sa laog nin limang bulan, ipinahiling sa samo kan mga instruktor mi kun paano magigin maugma sa samong pag-adal kan Bibliya. Napahanga kami sa kapakumbabaan ninda. Kun minsan sinda an waiter mi pag nagkakarakan kami. Naggradwar kami kan Enero 22, 1945.

Nag-abot kami ni Evelyn, kaiba si Leo asin Esther Mahan, sa destino mi sa El Salvador kan Hunyo 1946. Nahiling mi na an teritoryong iyan ‘maputi na para sa pag-ani.’ (Juan 4:35) Ipinapahiling kan pangyayari na inistorya ko sa kapinunan na naanggot na marhay an mga padi duman. Sarong semana bago kaidto, ginibo an inot ming pansirkitong asembleya sa Santa Ana. Ipinag-imbitar ming marhay an pampublikong pahayag asin labi-labi an kaugmahan mi kan haros 500 an nag-atender. Imbes na matakot asin maghali, mas nagin determinado pa lugod kaming magdanay diyan tanganing tabangan an mga sadiyosan an puso. Dawa pinatanidan kan mga padi an mga tawo na dai magbasa nin Bibliya asin pira sana an kayang magkaigwa nin Bibliya, dakul sa sainda an gutom sa katotoohan. Pinapahalagahan ninda an paghihinguwa ming mag-adal nin Kastila tanganing maitukdo mi sa sainda an manungod sa tunay na Diyos, si Jehova, asin an manungod sa magayunon na panuga niya na ibalik an Paraiso sa daga.

Si Rosa Ascencio an saro sa mga inot kong nagin Bible study. Kan magpuon siyang mag-adal sa Bibliya, sinuwayan niya an kasaruan niya. Dangan nakipag-adal man an lalaking idto sa Bibliya. Nagpakasal sinda, nabawtismuhan, asin nagin maigot na mga Saksi ni Jehova. Si Rosa an inot na payunir na taga Santa Ana. *

May sadit na tindahan nin groseri si Rosa. Pag nagluluwas siya sa ministeryo, sarado an tindahan niya asin nagtitiwala na itatao ni Jehova an mga pangangaipo niya. Pag binukasan na niya an tindahan pakalihis nin pirang oras, kadakul na an kostumer na gustong magbakal. Nagkatotoo mismo ki Rosa an Mateo 6:33 asin nagin maimbod siya sagkod na siya magadan.

Sarong aldaw, dinumanan kan padi an kagsadiri kan harong na inaarkilahan ming anom na misyonero asin pinatanidan ini na kun padagos niya kaming papaarkilahon, ii-ekskomunikar sindang mag-agom sa simbahan ninda. An kasero mi na sarong prominenteng negosyante, dati nang nauuyam sa ginigibo kan mga klero kaya dai siya nagpadara sa panggigipit. Sinabi pa ngani niya sa padi na mayo siyang pakiaram kun halion siya sa relihiyon ninda. Sinigurado niya sa samo na puwede kaming mag-arkila sa harong niya sagkod na gusto mi.

Sa kabiserang siyudad na San Salvador, may misyonero man na nagba-Bible study sa agom kan inhenyerong  si Baltasar Perla. An mabuot na tawong iyan nawaran na nin pagtubod sa Diyos huli sa nahihiling niyang pagsagin-sagin kan mga lider nin relihiyon. Kan magtugdok nin sangang opisina, nagboluntaryo si Baltasar na siya an madisenyo kan pasilidad asin matabang siya sa pagtugdok maski bako pa siyang Saksi saka dai siya mapabayad sa serbisyo niya.

Kan makaibanan ni Baltasar an mga Saksi ni Jehova sa pagtutugdok na iyan, nakumbinsir siya na nakua na niya an tunay na relihiyon. Nabawtismuhan siya kan Hulyo 22, 1955, asin dai nahaloy, nabawtismuhan man an agom niyang si Paulina. An duwang aki ninda parehong maimbod na naglilingkod ki Jehova. An aki niyang si Baltasar, Jr. 49 taon nang naglilingkod sa Brooklyn, Bethel, kun sain sinusuportaran niya an nagpaparahiwas na gibuhon na paghuhulit sa bilog na kinaban asin ngunyan miyembro siya kan Branch Committee kan Estados Unidos. *

Kan magkaigwa na kami nin mga kumbensiyon sa San Salvador, tinabangan kami ni Brother Perla na magamit an sarong dakulang gymnasium. Kan inot, pirang seksiyon sana kan mga tukawan an nagagamit mi; pero huli sa bendisyon ni Jehova, padakul kami nin padakul taon-taon sagkod na mapano mi an gymnasium asin nag-abot an panahon na dai na kami magkahusto diyan! Sa mga maugmang okasyon na iyan, nahihiling ko an dati kong mga Bible study. Ugmahon talaga ako pag ipinapabisto sa sako kan mga dati kong Bible study an mga “makuapo” ko—mga bagong nabawtismuhan na Bible study ninda!

Sa sarong asembleya, sarong brother an nagdulok sako asin nagsabing may itutuga siya. Dai ko maintindihan an sinasabi niya asin dai ko siya midbid. Dangan sinabi niya, “Kaiba po ako sa mga aking lalaki na nanggapo saindo kaidto sa Santa Ana.” Ngunyan kaiba ko na siyang naglilingkod ki Jehova! Talagang ugmahon ako. An pag-uulay ming iyan mas nagpakusog sa sako na talagang an bilog na panahon na ministeryo an pinakanakakakontentong karerang mapipili nin siisay man.

Sa laog nin haros 29 taon, naglingkod ako bilang misyonero sa El Salvador, inot sa siyudad nin Santa Ana, tapos sa Sonsonate, sunod sa Santa Tecla, asin an  pinakahuri sa San Salvador. Kan 1975, pagkatapos nin dakul na pamibi, nagdesisyon akong magpundo sa pagigin misyonero asin magbalik sa Spokane. Naggugurang na an maimbod kong mga magurang asin kaipuhan ninda an tabang ko.

Pagkagadan ni Papa kan 1979, inataman ko si Mama, na luway-luway na nagluya asin mas nangaipo nin tabang. Walong taon ko siyang inataman sagkod na magadan siya sa edad na 94. Sa masakit na panahon na iyan, grabe an namati kong emosyonal asin pisikal na kapagalan. Huli sa stress, nagka-shingles ako, sarong makulugon na hilang. Pero sa tabang kan pamibi asin mamumuton na mga kamot ni Jehova na garo nakakugos sa sako tanganing pakusugon ako, nakaya ko an mga pagbalo na idto. Arog kan sinabi mismo ni Jehova, ‘sagkod na magputi an saindong buhok, ako an maataman saindo, tatabangan ko kamo asin ililigtas ko kamo.’—Isa. 46:4, BPV.

Kan 1990, nagbalyo ako sa Omak, Washington. Duman namati ko giraray na kaipuhan ako sa teritoryo na nagtataram nin Kastila, asin nabawtismuhan an nagkapira sa mga Bible study ko. Kan Nobyembre 2007, dai ko na kayang asikasuhon an harong ko sa Omak, kaya nagbalyo ako sa sarong apartment sa kaharaning banwaan na Chelan, Washington. Nagpapasalamat talaga ako sa kongregasyon na Kastila digdi ta inaasikaso ninda ako puon pa kaidto. Huling ako sana an gurang na Saksi digdi, mabuot na “inampon” ako kan mga tugang bilang “lola” ninda.

Dawa pinili kong dai mag-agom asin magkapamilya tanganing mas lubos akong makapaglingkod sa ministeryo na ‘daing ulang,’ dakul man akong aki sa espirituwal. (1 Cor. 7:34, 35) Iniisip ko na dai ko makakamtan an gabos na bagay ngunyan. Kaya ininot ko nguna kun ano an pinakaimportante—an paglilingkod ko ki Jehova nin bilog na puso. Sa bagong kinaban, magkakaigwa ako nin dakul na panahon tanganing ikaugma an gabos na marahay na mga aktibidad. An paborito kong teksto iyo an Salmo 145:16, na sinisigurado sa sato na ‘papaniguan ni Jehova an mawot nin lambang bagay na may buhay.’ (NW)

Sa edad na 91, medyo marahay pa man an salud ko kaya padagos akong nagpapayunir. Huli sa pagpapayunir ko, nagkaigwa nin katuyuhan an buhay ko asin an pagmati ko garo baga dai ako naggugurang. Kan inot akong mag-abot sa El Salvador, nagpupuon pa sana an paghuhulit duman. Sa ibong kan grabeng pagkontra ni Satanas, labing 39,000 na an parahayag sa nasyon na iyan ngunyan. Talagang napakusog kaiyan an pagtubod ko. Malinaw nanggad na sinusuportaran kan banal na espiritu ni Jehova an mga paghihinguwa kan saiyang mga lingkod!