KAN 1991, labi-labi an kagaya-gayahan kan Mga Saksi ni Jehova sa Rusia kan halion an haloy nang pagbabawal sa saindang mga gibuhon asin opisyal na sindang minidbid. Kan panahon na idto, pipira sana an nakaisip na madakul nin sampulong beses an mga Saksi na uminabot na sa mga 170,000 ngunyan! Kaiba sa maiigot na parahulit na ini kan Kahadian an mga taga ibang nasyon na nagbalyo sa Rusia tanganing tumabang sa espirituwal na pag-ani. (Mat. 9:37, 38) Bistuhon niyato an nagkapira sa sainda.

Si Matthew na taga Britania 28 anyos kan taon na halion an pagbabawal sa Rusia. Sa sarong kumbensiyon kan taon na idto, idinuon sa sarong pahayag na nangangaipo nin tabang an mga kongregasyon sa Sirangan na Europa. Bilang halimbawa, an tagapagtaram may sinambit na sarong kongregasyon sa St. Petersburg, Russia, na saro sana an ministeryal na lingkod asin mayong elder. Pero, an mga parahayag nagkokondukta nin ginatos na pag-adal sa Bibliya. “Pagkatapos kan pahayag,” sabi ni Matthew, “pigpaparaisip ko an manungod sa Rusia, kaya namibi ako ki Jehova asin espesipiko kong sinabi an sakuyang kamawutan na magbalyo duman.” Nagtipon siya nin kuwarta, nagpabakal nin mga gamit, asin nagbalyo sa Rusia kan 1992. Ano an nagin resulta?

“Problema ko an lengguwahe,” an sabi ni Matthew. “Masakit makipag-ulay sa iba manungod sa katotoohan.” Saro pang problema an paghanap nin madadagusan. “Dai ko na mabilang kun pirang beses akong biglaan na pinalipat nin apartment.” Sa ibong kan mga kadipisilan na idto kan inot, sinabi ni Matthew: “An pagbalyo sa Rusia an pinakamarahay na desisyon na ginibo ko.” Ipinaliwanag niya: “Kan maglingkod ako digdi nanudan ko kun paano urog na magsarig ki Jehova asin nahiling ko an saiyang paggiya sa dakul na paagi.” Pag-abot nin panahon ninombrahan si Matthew bilang elder asin espesyal payunir asin ngunyan naglilingkod sa sangang opisina harani sa St. Petersburg.

Kan 1999, si Hiroo, na an edad 25, naggradwar sa Ministerial Training School sa Japan, asin dinagka siya kan saro sa saiyang mga instruktor na maglingkod sa ibang nasyon. Naaraman ni Hiroo an dakulang pangangaipo sa Rusia asin nagpuon siyang mag-adal kan tataramon na Ruso. May saro pa siyang praktikal na ginibo.  “Nagduman ako sa Rusia nin anom na bulan,” an sabi niya. “Huling grabe duman an tiglipot, nagduman ako nin Nobyembre para hilingon kun kaya kong tagalan an lipot.” Pagkatapos na matagalan an tiglipot, nagbalik siya sa Japan asin namuhay nin simple tanganing makatipon nin igong kuwarta asin bumalik sa Rusia—para mag-istar na duman.

Sa ngunyan, 12 taon na si Hiroo sa Rusia asin nakapaglingkod na sa dakul na kongregasyon. May mga panahon na solo sana siyang elder na nangangataman sa labing 100 na parahayag. Sa sarong kongregasyon, kada semana siya an nagkokondukta kan kadaklan na kabtang sa Pagtiripon sa Paglilingkod, kan Teokratikong Paadalan sa Pagmiministro, kan Pag-adal sa Torrengbantayan, asin kan limang magkakalain na Pag-adal sa Libro kan Kongregasyon. Dakul man siyang pigsungko na mga tugang bilang pagpastor. Sa paggirumdom sa mga taon na idto, sinabi ni Hiroo: “Dakulang kagaya-gayahan an makatabang sa mga tugang na magin mas makusog sa espirituwal.” Ano an nagin epekto sa saiya kan paglilingkod kun sain dakula an pangangaipo? Sinabi niya: “Bago ako magduman sa Rusia, elder asin payunir na ako, pero kan yaon na ako digdi namati ko na nagkaigwa ako nin biyong bagong relasyon ki Jehova. Nanudan ko na urog na magsarig ki Jehova sa gabos na kabtang kan sakong buhay.” Kan 2005, naagom ni Hiroo si Svetlana, asin magkaibanan sindang nagpadagos sa pagpayunir.

An magtugang man na si Matthew, 34 anyos, asin Michael, 28 anyos, na taga Canada parehong nagpasyar sa Rusia asin napahanga kan mahiling na kadakul an interesadong nag-aatender sa mga pagtiripon, pero pipira sana an brother duman para magkondukta. Sinabi ni Matthew: “An kongregasyon na nadumanan ko 200 an nag-atender, pero an nagkokondukta sa gabos na pagtiripon saro sanang elder na gurang na asin sarong hoben na ministeryal na lingkod. Sa nahiling kong kamugtakan na iyan, gusto kong magbalyo duman tanganing tumabang sa mga tugang na idto.” Nagbalyo siya sa Rusia kan 2002.

Makalihis an apat na taon, nagbalyo man si Michael sa Rusia asin narisa niya tulos na dakula pa man giraray an pangangaipo para sa mga brother. Bilang ministeryal na lingkod, siya an inasignaran na mag-asikaso kan kuwenta, literatura, asin teritoryo. Ipinagibo man saiya an gibuhon na sa parati ginigibo kan sekretaryo kan kongregasyon, inasignaran na magtao nin pampublikong mga pahayag, asin tumabang sa pag-organisar nin mga asembleya asin pagtugdok nin mga Kingdom Hall. An totoo, sagkod ngunyan, nangangaipong marhay nin tabang an mga kongregasyon duman. Dawa ngani mapagal an pag-asikaso nin dakul na asignasyon, si Michael, na ngunyan saro nang elder, nagsabi: “An pagtabang sa mga tugang nagtatao sako nin dakulang satispaksiyon. Ini an pinakamarahay na paagi nin paggamit kan sakong buhay!”

Miyentras tanto, naagom ni Matthew si Marina, asin si Michael naagom si Olga. An duwang mag-agom, kaiba an dakul na iba pang boluntaryo, padagos na nagtatabang sa nag-uuswag na mga kongregasyon.

Kan 1994, kan si Tatyana 16 anyos, anom na espesyal payunir haling Czech Republic, Poland, asin Slovakia an nagpuon na maglingkod sa saindang kongregasyon sa Ukraine. Nauugma siya pag nagigirumduman niya sinda, asin sinabi niya: “Sinda maiigot na payunir na madaling dulukon asin mabuot, saka kabisado nindang marhay an Bibliya.” Nahiling niya kun paano binendisyunan ni Jehova an saindang pagsakripisyo, asin naisip niya, ‘Gusto kong magin arog ninda.’

Huling nadagka kan halimbawa kan mga payunir, pag bakasyon sa eskuwelahan nag-iiba si Tatyana sa mga nagduduman sa hararayong teritoryo sa Ukraine asin Belarus na dai pa nahuhulitan. Naugma siyang marhay sa mga paghuhulit na idto kaya nagplano siya na pahiwason an saiyang ministeryo paagi sa pagbalyo sa Rusia. Kan inot, nagduman nguna siya nin halipot na panahon para dalawon an sarong sister na nagbalyo duman hali sa ibang nasyon asin para maghanap nin trabaho na makakasuportar sa saiyang pagpapayunir.  Dai nahaloy, kan 2000, nagbalyo siya sa Rusia. Nagin masakit daw iyan?

Isinaysay ni Tatyana: “Huling dai ko kayang magkua nin sadiri kong apartment, kaipuhan kong mag-arkila nin kuwarto sa harong nin iba. Bakong pasil mag-istar sa arog kaiyan na kamugtakan. May mga pagkakataon na gusto ko nang pumuli. Pero pirmi akong tinatabangan ni Jehova na masabutan na makikinabang ako kun mapadagos ako sa sakuyang paglilingkod.” Ngunyan, naglilingkod na siya bilang misyonera sa Rusia. Nasabi niya: “Sa mga taon na yaon ako digdi, nagkaigwa ako nin maugmang mga eksperyensiya asin dakul na katuod. Urog sa gabos, napakusog an sakong pagtubod.”

Si Masako na taga Japan, na labi pa sanang 50 anyos, haloy nang gustong maglingkod bilang misyonera, pero garo baga imposible na iyan huli sa saiyang hilang. Pero kan nagrahay-rahay na siya, nagdesisyon siyang magbalyo sa Rusia tanganing tumabang sa gibuhon na pag-ani. Minsan ngani masakit makahanap nin marahay na istaran asin trabaho, nasuportaran niya an saiyang pagpapayunir paagi sa pagtukdo nin Japanese asin trabahong paglinig. Ano an nagpakusog sa saiya na magpadagos sa saiyang ministeryo?

Ginigirumdom an 14 taon na paglilingkod sa Rusia, sinabi ni Masako: “An kagaya-gayahan na namamatian ko sa ministeryo igo nang balos sa ano man na kadipisilan na inaagihan ko. Dahil sa paghuhulit sa mga lugar na igwa nin dakulang pangangaipo, an buhay ko nagin aktibo asin maugma.” Sinabi pa niya: “Para sako, sarong milagro sa presenteng panahon an maeksperyensiyahan kun paano ako padagos na tinatawan ni Jehova nin kakanon, bado, asin istaran sa pag-agi nin mga taon.” Apuwera sa paglilingkod kun sain may dakulang pangangaipo sa Rusia, nagtabang pa si Masako sa gibuhon na pag-ani sa Kyrgyztan. Dugang pa, nakatabang man siya sa English, Chinese, asin Uighur language group. Sa ngunyan, nagpapayunir siya sa St. Petersburg.

Huli sa masakit na pagbuhay, sa parati may mga pamilya na nagbabalyo sa ibang nasyon tanganing magrahay an pagbuhay. Pero arog ni Abraham asin Sara kan suanoy, may mga pamilya na nagbalyo sa ibang nasyon para sa mga espirituwal na gibuhon. (Gen. 12:1-9) Halimbawa, an mag-agom na taga Ukraine na si Mikhail asin Inga nagbalyo sa Rusia kan 2003. Dai nahaloy,  nakanumpong sinda nin mga tawo na naghahanap nin katotoohan sa Bibliya.

Sinabi ni Mikhail: “Sarong beses naghulit kami sa sarong lugar na dai pa nahuhulitan. Sarong gurang na lalaki an nagbukas kan pinto asin naghapot, ‘Mga parahulit kamo?’ Kan sabihon ming iyo, sinabi niya: ‘Aram kong maabot kamo. Imposible na dai mautob an mga tataramon ni Jesus.’ Dangan kinotar niya an Mateo 24:14.” Sinabi pa ni Mikhail: “Sa lugar na idto, nanumpungan mi man an sarong grupo nin mga sampulong babaying Baptist, sinserong mga tawo na paha sa katotoohan. Igwa sinda kan librong Mabuhay Sagkod Lamang, asin ginagamit ninda iyan kada katapusan kan semana tanganing pag-adalan an Bibliya. Pirang oras ming sinimbag an saindang mga hapot asin nagkanta kami nin mga awit na pang-Kahadian, dangan sarabay kaming namanggi. An pagbisitang idto an saro sa pinakamagagayon na bagay na nagigirumduman ko.” Nagtutubod si Mikhail asin Inga na dahil sa paglilingkod sa mga lugar na igwa nin dakulang pangangaipo nagin mas harani sinda ki Jehova, mas namutan ninda an mga tawo, asin nagkaigwa sinda nin nakakakontentong buhay. Ngunyan, nagdadalaw sinda sa mga kongregasyon sa sirkito.

Kan 2007, an mag-agom na taga Ukraine na si Yury asin Oksana, na mga 35 anyos na ngunyan, kaiba an aki nindang si Aleksey, 13 anyos na ngunyan, nagpasyar sa sangang opisina sa Rusia. Nahiling ninda duman an mapa kan Rusia na igwa nin dakulang mga lugar na mayo pang kongregasyon na naghuhulit. “Pakahiling kan mapa,” sabi ni Oksana, “lalo ming naisip na igwa pa nin dakulang pangangaipo nin mga parahulit. Nakatabang ini samuya na makapagdesisyon na magbalyo sa Rusia.” Ano pa an nakatabang sainda? Sinabi ni Yury: “Dakulang tabang an pagbasa kan mga artikulo sa satong mga publikasyon na siring baga kan ‘Puede daw Kamong Maglingkod sa Langtad sa Ibang Nasyon?’ * Pinasyaran mi an lugar sa Rusia na isinuherir kan sangang opisina na dumanan mi para maghanap nin harong asin trabaho.” Kan 2008, nagbalyo sinda sa Rusia.

Sa inot, talagang masakit maghanap nin trabaho, pirang beses man kaming nagpaburubalyo nin apartment. Sinabi ni Yury: “Parati kaming namimibi na dai man lugod mangluya an buot mi, dangan nagpapadagos kami sa paghuhulit, na nagsasarig ki Jehova para sa suporta. Naeksperyensiyahan mi kun paano kami atamanon ni Jehova pag iniinot mi an saiyang Kahadian. An samuyang pamilya napakusog kan paglilingkod mi.” (Mat. 6:22, 33) Ano man an nagin epekto sa hoben na si Aleksey kan paglilingkod kun sain dakula an pangangaipo? “Dakulaon an naitabang kaiyan saiya,” an sabi ni Oksana. “Idinusay niya an saiyang sadiri ki Jehova asin nabawtismuhan sa edad na nuwebe. Huling nahihiling niya na dakula an pangangaipo nin parahulit, napapahiro siya na mag-auxiliary payunir kada bakasyon. Nakakamati kami nin dakulang kagaya-gayahan na mahiling an saiyang pagkamuot asin kaigutan sa ministeryo.” Ngunyan, si Yury asin Oksana naglilingkod bilang espesyal payunir.

Siring kan malinaw na ipinapahiling kan mga tataramon kan mga parahulit na ini, an pagbalyo sa ibang lugar para pahiwason an saimong ministeryo nangangaipo nin bilog na pagtitiwala ki Jehova. Iyo, an mga naglilingkod kun sain dakula an pangangaipo napapaatubang sa mga kadipisilan sa saindang bagong teritoryo, pero nakakaeksperyensiya man sinda nin dakulang kagaya-gayahan sa paghuhulit kan maugmang bareta sa mga tawo na naghihinanyog sa mensahe kan Kahadian. Buot mo daw na tumabang sa pag-ani sa mga lugar na igwa pa nin dakulang pangangaipo? Kun iyo, mamamatian mo man an namatian ni Yury, na nagsabi manungod sa desisyon niyang maglingkod kun sain may dakulang pangangaipo: “An solamenteng pinagbabasulan ko iyo na dai ko tulos iyan ginibo.”