1. Ano an isinasadol ni apostol Juan na dapat pag-isipan kan mga Kristiyano, asin taano?

MANINIGO nanggad niyatong hurop-hurupon na marhay an isinurat ni apostol Juan na mababasa sa 1 Juan 3:1. Sa paggamit kan mga tataramon na “hilinga nindo kun anong klaseng pagkamuot an itinao sa sato kan Ama,” sinasadol ni Juan an mga Kristiyano na pag-isipan kun anong klase asin kun gurano kadakula kan pagkamuot nin Diyos sa sainda saka kun paano sinda namumutan ni Jehova. Kun gigibuhon niyato ini, siguradong mararom an satong pagkamuot asin mas mapaparani kita sa saiya.

2. Taano ta nasasakitan an iba na masabutan na namumutan sinda ni Jehova?

² Pero, nasasakitan an iba na masabutan na namumutan nin Diyos an mga tawo. Para sa sainda, an Diyos dapat na katakutan asin sunudon. O tibaad huli sa nakagamot na salang mga katukduan, naniniwala sinda na bakong mamumuton an Diyos asin masakit pa nganing kamutan. May mga naniniwala man na daing limitasyon an pagkamuot nin Diyos kaya dawa ano man an saindang ginigibo o dai ginigibo, mamumutan pa man giraray niya sinda. Nanudan mo sa pag-adal mo kan Bibliya na an pagkamuot iyo an panginot na kuwalidad ni Jehova asin iyan an nagpahiro sa saiya na itao an saiyang Aki bilang pantubos para sa sato. (Juan 3:16; 1 Juan 4:8) Pero huli sa mga eksperyensiya mo sa buhay, tibaad nasasakitan kang masabutan kun gurano ka kanamumutan nin Diyos.

3. Anong katotoohan an makakatabang tanganing masabutan ta an pagkamuot ni Jehova sa sato?

 ³ Kun siring, sa anong mga paagi kita namumutan ni Jehova? Para masimbag an hapot na iyan, kaipuhan nguna niyatong masabutan an relasyon ta sa Diyos na Jehova. Si Jehova an Kaglalang kan gabos na tawo. (Basahon an Salmo 100:3-5.) Iyan an dahilan kun taano ta inaapod kan Bibliya si Adan na ‘aki nin Diyos,’ asin kun taano ta itinukdo ni Jesus sa saiyang mga parasunod na apudon an Diyos na ‘Ama niyamo na yaon sa langit.’ (Luc. 3:38; Mat. 6:9) Bilang an Kagtao nin Buhay, si Jehova an satong Ama. An relasyon niyato sa saiya kapareho kan relasyon nin sarong ama sa saiyang mga aki. Sa simpleng pagtaram, kun sa paanong paagi namumutan nin sarong marahay na ama an saiyang mga aki, arog man kita kaiyan namumutan ni Jehova.

4. (a) Paano naiiba si Jehova sa mga tawong ama? (b) Ano an pag-uulayan ta sa artikulong ini asin sa masunod?

⁴ Siyempre bakong perpekto an mga tawong ama. Ano man an saindang gibuhon, dai ninda lubos na maaarog an paagi nin pagpahiling ni Jehova kan saiyang pagkamuot bilang ama. An totoo, dai nalilingawan kan nagkapira an makulog na mga pangyayari na inagihan ninda sa saindang pamilya na nagwalat nin piklat sa saindang emosyon asin kaisipan. Makulugon iyan asin makamumundo, kahirak-hirak pa ngani. Siyempre pa, bakong arog kaiyan na klaseng ama si Jehova. (Sal. 27:10) Kun maaaraman niyato kun paano namumuot asin nagmamakulog sa sato si Jehova, siyertong mas mapaparani kita sa saiya. (Sant. 4:8) Sa artikulong ini, pag-uulayan niyato an apat na paagi na ipinapahiling ni Jehova an saiyang pagkamuot sa sato. Sa masunod na artikulo, pag-uulayan ta an apat na paagi kun paano ta maipapahiling an satong pagkamuot sa saiya.

5. Ano an sinabi ni apostol Pablo sa mga taga Atenas mapadapit sa Diyos?

⁵ Kan si apostol Pablo yaon sa Atenas, Grecia, nahiling niya na an siyudad pano-pano nin mga idolo. Naniniwala sinda na sa mga diyos ninda hali an saindang buhay asin an mga ini an nagtatao kan mga pangangaipo ninda. Kaya sinabi sa sainda ni Pablo: ‘An Diyos na naggibo kan kinaban asin kan gabos na yaon diyan an nagtatao sa gabos nin buhay, nin ginhawa, asin nin gabos na bagay. Huli sa saiya kita nabubuhay asin naghihiro, patin [nag-eeksister].’ (Gui. 17:24, 25, 28) Iyo, huli sa pagkamuot, itinatao ni Jehova sa sato an “gabos na bagay” na kaipuhan ta para mabuhay. Pag-isipan an pira sa mga bagay na itinao niya huli sa saiyang pagkamuot sa sato.

6. Paano mahihiling an pagkamuot nin Diyos sa sato sa pagkagibo niya sa daga? (Hilingon an ritrato sa kapinunan kan artikulo.)

⁶ Sarong halimbawa kaiyan iyo an daga, na ‘itinao sa mga aki nin tawo’ kan Kaggibo kaiyan, si Jehova. (Sal. 115:15, 16) Grabe an ginagastos kan mga siyentista tanganing maghanap sa kalangitan nin mga planeta na kaagid kan daga. Minsan ngani ginatos nang planeta an nadiskubre, disganado pa man giraray an mga siyentista huling mayo lamang sa mga iyan an arog kan daga na igwa kan gabos na kaipuhan para maistaran nin tawo. Minalataw na daing kapareho an daga sa gabos na linalang nin Diyos. Isip-isipa na sana, sa gabos na dai mabilang na planeta sa Milky Way asin iba pang galaksiya, ginibo ni Jehova an daga bako sanang sarong lugar na puwedeng istaran kundi sarong komportable, magayon, asin ligtas na irukan kan mga tawong linalang niya! (Isa. 45:18) Mahihiling nanggad digdi kun gurano kita kanamumutan ni Jehova.—Basahon an Job 38:4, 7; Salmo 8:3-5.

7. Paano mahihiling sa pagkalalang sa sato na talagang namumutan kita nin Diyos?

⁷ Dawa tinawan na kita ni Jehova nin magayunon na istaran, aram niya na bako sanang materyal na mga probisyon an makakapaugma asin makakapakontento sa sato. An sarong aki nagigin tunay na tiwasay asin maugma pag namamatian niya an pagkamuot asin atensiyon kan saiyang mga magurang. Linalang ni Jehova an mga tawo uyon sa saiyang ladawan, kaya may kakayahan sinda na mamatian an pagkamuot saka pagmakulog nin Diyos sa sainda asin ipahiling man an pagkamuot ninda sa saiya. (Gen. 1:27) Linalang man kita ni Jehova na igwa  nin espirituwal na pangangaipo asin nagigin maugma kita kun napapaniguan iyan nin tama. Tandaan na sinabi ni Jesus: “Maugma an mga nakakamating kaipuhan ninda nin espirituwal na mga bagay.” (Mat. 5:3, NW) Bilang mamumuton na Ama, ‘itinatao sa sato ni Jehova an gabos na bagay,’—materyal man o espirituwal—para magin ‘maugma kita.’—1 Tim. 6:17, BPV; * Sal. 145:16.

8. Taano ta makakalaom kita sa pagkamuot kan “Diyos nin katotoohan”?

⁸ Namumutan kan mga ama an saindang mga aki asin gusto nindang protektaran sinda tanganing dai mailagalag o madaya. Pero dakul na mga magurang an dai naitatao an tamang paggiya sa saindang mga aki huli ta dai ninda mismo inaako an mga pamantayan na nasa Tataramon nin Diyos. Kaya sa parati, nagreresulta iyan sa kariribukan asin pagkadisganar. (Tal. 14:12) Pero si Jehova iyo an “Diyos nin katotoohan.” (Sal. 31:5, NW) Namumutan niya an saiyang mga aki asin maugma niyang pinapasirang an liwanag nin katotoohan para giyahan sinda sa gabos na aspekto kan saindang buhay, lalo na kun dapit sa saindang pagsamba. (Basahon an Salmo 43:3.) Anong katotoohan an ihinayag ni Jehova, asin paano mahihiling digdi na namumutan niya kita?

9, 10. Paano ipinahiling ni Jehova na namumutan niya kita paagi sa paghayag kan katotoohan (a) mapadapit sa saiya? (b) mapadapit sa sato?

⁹ Inot sa gabos, ihinayag ni Jehova an katotoohan mapadapit sa saiyang sadiri. Ipinamidbid niya an saiyang personal na pangaran, na naglataw sa Bibliya nin mas dakul na beses kisa sa iba pang pangaran. Sa paaging ini, irinarani kita ni Jehova sa saiya asin tinutugutan niya kitang mamidbid siya. (Sant. 4:8) Ihinayag man ni Jehova an saiyang mga kuwalidad o kun anong klaseng Diyos siya. Mahihiling sa pagkalalang niya sa uniberso an saiyang kapangyarihan asin kadunungan. Ihinayag man ni Jehova sa Bibliya an saiyang hustisya asin lalo na an saiyang daing sagkod na pagkamuot. (Roma 1:20) Arog siya nin sarong ama na bako sanang makusog asin madunong kundi makatanusan man asin mamumuton, kaya madali para sa saiyang mga aki na magkaigwa nin haraning relasyon sa saiya.

¹⁰ Para sa satong kapakinabangan, ihinayag man ni Jehova an katotoohan manungod sa sato—kun ano an satong lugar sa saiyang pangkagabsan na areglo sa mga bagay. Nakakatabang ini na magin tuninong asin areglado an saiyang unibersal na pamilya. Nanudan niyato sa Bibliya na an tawo dai linalang na may deretso na magdesisyon para sa saiyang sadiri asin magin independiyente sa Diyos. Nanudan man niyato na may makamumundong resulta an pagbaliwala sa mahalagang katotoohan na ini. (Jer. 10:23) Mahalagang marhay ini para sa satong ikakarahay. Magkakaigwa sana kita nin katuninungan asin pagkauruyon kun mimidbidon ta an awtoridad nin Diyos. Mamumuton nanggad si Jehova huling ihinayag niya sa sato an mahalagang katotoohan na ini!

11. Anong panuga ni Jehova an nagpapahiling na namumutan niya kita asin interesado siyang marhay sa sato?

¹¹ Interesadong marhay an sarong mamumuton na ama sa puturo kan saiyang mga aki. Gusto niyang magkaigwa sinda nin maugma asin makahulugan na buhay. Makamumundo, kadaklan sa mga tawo ngunyan nahahadit sa magigin puturo ninda, o sinasayang an buhay ninda sa pag-abot sa mga bagay na dai magdadanay. (Sal. 90:10) Bilang mga aki nin Diyos, namamatian niyato na namumutan talaga kita ni Jehova huling ipinanuga niya sa sato an sarong marahayon na puturo. Huli kaini, nagkakaigwa nin tunay na kahulugan asin katuyuhan an satong buhay.

12. Paano mahihiling sa itinaong sadol asin instruksiyon ni Jehova ki Cain saka Baruc an saiyang pagkamuot asin pagmakulog sa sainda?

¹² “Taano ta angguton ka asin mamundo? Kun ika magibo nin marahay, bako daw na uuyunan ka giraray? . . . Kaya mo daw na daugon an [kasalan]?”  (Gen. 4:6, 7, NW) Sarong napapanahon na sadol iyan na may kaibang praktikal na instruksiyon. Kaya, kan mahiling ni Jehova na namemeligrong makagibo nin maraot na bagay si Cain, pinatanidan niya ini. Makamumundo, dai dinangog ni Cain an patanid na iyan, kaya pinagdusahan niya an maraot na resulta kaiyan. (Gen. 4:11-13) Kan makamati nin kapagalan asin pangluyahan na marhay nin buot an sekretaryo ni Jeremias na si Baruc huli sa saiyang salang kaisipan, sinadol siya ni Jehova na baguhon iyan. Bakong arog ni Cain, dinangog ni Baruc an sadol ni Jehova, asin ilinigtas kaiyan an saiyang buhay.—Jer. 45:2-5.

13. Taano ta tinugutan ni Jehova na mag-agi nin pagbalo an saiyang mga maimbod na lingkod?

¹³ ‘Huli ta dinidisiplina ni [Jehova] an namumutan niya, pinapakol an siisay man na inaako niya bilang aki,’ an isinurat ni Pablo. (Heb. 12:6, BPV) Pero an disiplina bako sanang pirming padusa. Igwa iyan nin manlain-lain na porma. Kadakul nin halimbawa sa Bibliya nin maimbod na mga lingkod ni Jehova na tinugutan niyang mag-agi nin grabeng mga pagbalo na nagserbing disiplina o pagsasanay sa sainda. Halimbawa kaiyan iyo si Jose, Moises, asin David. Idinetalyeng marhay an istorya kan buhay ninda sa Bibliya. Pag nababasa niyato kun paano sinda inalalayan ni Jehova sa panahon kan saindang mga pagbalo asin kun paano niya sinda pinagkatiwalaan nin urog pang paninimbagan, mas nakukumbinsir kita na talagang nagmamakulog asin namumutan ni Jehova an saiyang mga lingkod.—Basahon an Talinhaga 3:11, 12.

14. Paano mahihiling an pagkamuot ni Jehova sa pagdisiplina niya sa sato?

¹⁴ Mahihiling man niyato an pagkamuot ni Jehova sa pagdisiplina niya sa sato. Kun an mga nakagibo nin sala dinisiplina ni Jehova, dangan nagbago sinda saka nagsulsol, ‘bulaos niya sindang papatawadon.’ (Isa. 55:7) Ano an buot sabihon kaiyan? Nakakapahiro nanggad an paglaladawan ni David sa  pagigin mapagpatawad ni Jehova. Sinabi niya: ‘Pinapatawad niya an gabos kong kasalan asin binubulong niya an gabos kong hilang. Iliniligtas niya an buhay ko sa lulubngan; binebendisyunan niya ako nin danay na pagkamuot asin pagkahirak. Kun gurano an rayo kan sirangan sa sulnupan, siring man niya irinayo an satong mga kasalan.’ (Sal. 103:3, 4, 12, BPV) Lugod na pirmi niyatong akuon tulos an mga sadol asin disiplina ni Jehova, saka gumibo tulos nin mga pagbabago, na isinasaisip na iyan kapahayagan kan saiyang daing sagkod na pagkamuot sa sato.—Sal. 30:5.

15. Ano an nagpapahiling na mahalagang marhay ki Jehova an saiyang mga lingkod?

¹⁵ Siguradong kabilang sa mga priyoridad nin sarong mamumuton na ama an pagbantay asin pagprotektar sa saiyang pamilya laban sa ano man na posibleng kapahamakan o peligro. Arog kaiyan an ginigibo kan satong Ama sa langit, si Jehova. Mapadapit ki Jehova, an salmista nagsabi: “Binabantayan niya an mga buhay kan mga maimbod sa saiya; iliniligtas niya sinda sa kamot kan mga maraot.” (Sal. 97:10, NW) Pag-isipan ini: Kun gurano mo karikas na pinoprotektaran an saimong mga mata huling mahalagang marhay iyan sa saimo, arog man kaiyan karikas na pinoprotektaran ni Jehova an saiyang banwaan. (Basahon an Zacarias 2:8.) Mahalaga nanggad ki Jehova an saiyang mga lingkod!

16, 17. Paano binantayan saka prinotektaran ni Jehova an saiyang mga lingkod kaidto asin ngunyan?

¹⁶ An sarong paagi na pinoprotektaran ni Jehova an saiyang mga lingkod iyo an paggamit kan saiyang mga anghel. (Sal. 91:11) Sarong anghel an guminadan sa 185,000 na Asiriano sa laog nin sarong banggi para iligtas an Jerusalem. (2 Ha. 19:35) Mga anghel an nagpaluwas ki apostol Pedro asin Pablo saka sa iba pa sa bilangguan. (Gui. 5:18-20; 12:6-11) Pinoprotektaran man ni Jehova an saiyang mga lingkod ngunyan. Halimbawa, kan magbisita sa sangang opisina nin sarong nasyon sa Aprika an sarong representante kan headquarters, ibinareta niya na grabe an kariribukan sa pulitika asin relihiyon sa lugar na iyan. Maribok na marhay sa nasyon huli sa ralaban, harabunan, panglulupig, asin garadanan. Dakul sa satong mga tugang an nawaran nin rugaring asin pagbuhay, pero mayo sa sainda an nagadan. Kan haputon kun kumusta sinda, gabos sinda nakangirit na nagsimbag: “Okey kami gabos, salamat ki Jehova!” Namatian ninda an pagkamuot nin Diyos sa sainda.

¹⁷ Totoo, may mga pagkakataon na itinutugot ni Jehova na gadanon kan mga kaiwal an saiyang maimbod na mga lingkod, arog kan nangyari ki Esteban. Pero bilang grupo, pinoprotektaran ni Jehova an saiyang mga lingkod paagi sa pagtao sa sainda nin napapanahon na mga patanid laban sa tusong mga pakana ni Satanas. (Efe. 6:10-12) Paagi sa saiyang Tataramon asin sa mga publikasyon hali sa saiyang organisasyon, tinatabangan niya kita na mahiling an mga peligro na dara nin mapandayang kayamanan, imoral saka madahas na libangan, salang paggamit nin Internet, asin iba pa. Malinaw nanggad, bilang sarong mamumuton na Ama, binabantayan asin pinoprotektaran ni Jehova an saiyang mga lingkod.

18. Ano an masasabi mo dapit sa pagkamuot ni Jehova sa saimo?

¹⁸ Pagkatapos tang pag-ulayan an pira sana sa marahayon na mga paagi na ipinapahiling ni Jehova an saiyang pagkamuot sa sato, namamatian ta an arog kan namatian ni Moises. Mantang iniisip-isip niya an dakul na taon kan saiyang paglilingkod, sinabi niya: ‘Pagkaaga panua kami kan danay mong pagkamuot, tanganing mag-awit kami asin mag-ugma sa bilog niyamong buhay.’ (Sal. 90:14, BPV) An masabutan asin mamatian an pagkamuot ni Jehova sa sato iyo an saro sa dakulang mga pribilehiyo asin bendisyon na puwede tang makamtan ngunyan. Arog ni apostol Juan, napapahiro man kitang sabihon: “Hilinga nindo kun anong klaseng pagkamuot an itinao sa sato kan Ama!”—1 Juan 3:1, NW.