Rumani sa Dios

Sarong Ama na Daing Kapareho

Mateo 3:16, 17

“AMA.” Pira sanang tataramon an nakakapukaw nin mas hararom na mga emosyon sa mga tawo. An sarong ama na talagang namomoot sa saiyang mga aki nagtatabang sa sainda na umoswag. May marahay na dahelan na inaapod kan Biblia si Jehova Dios na “Ama.” (Mateo 6:9) Anong klaseng Ama si Jehova? Tanganing masimbag iyan, siyasaton niato an mga tataramon na sinabi ni Jehova ki Jesus kan bautismohan si Jesus. Total, an paagi nin pakikipag-olay nin sarong ama sa saiyang mga aki dakol an ihinahayag manongod sa kun ano man nanggad na klaseng magurang sia.

Kan mga Oktubre 29 C.E., si Jesus nagpasiring sa Salog nin Jordan tanganing magpabautismo. Sinasabi kan Biblia kun ano an nangyari: “Kan mabautismohan na, si Jesus tolos na naghawas sa tubig; asin, uya! an kalangitan nagkaburukasan, asin naheling nia an espiritu nin Dios na nag-iibaba siring sa salampati na nagtutugdon sa saiya. Uya! May tingog man hale sa kalangitan na nagsabi: ‘Ini an sakong Aki, an namomotan, na sakong inoyonan.’” * (Mateo 3:16, 17) Huling sinabi mismo ni Jehova, an mamomoton na mga tataramon na iyan dakol an sinasabi sa sato manongod sa kun anong klaseng Ama sia. Mangnohon an tolong bagay na ipinahayag ni Jehova sa saiyang Aki.

Enot, paagi sa mga tataramon na “ini an sakong Aki,” garo man sana sinasabi ni Jehova, ‘ipinag-oorgolyo ko na ako an saimong Ama.’ Pinapanigoan nin sarong may pakabatid na ama an pagmawot kan saiyang mga aki na sinda midbidon asin tawan nin atension. Kaipuhan nin mga aki na aseguraron giraray na sinda pinapahalagahan bilang indibiduwal na mga miembro kan pamilya. Imahinaron kun ano an nagin kahulogan kaiyan ki Jesus—dawa kan sia nasa edad na—na sia midbidon kan saiyang Ama!

Ikaduwa, paagi sa pag-apod sa saiyang Aki na “an namomotan,” hayag na ipinaheling ni Jehova an saiyang pagkamoot ki Jesus. Sa sarong kabtang, an Ama nagsasabing, ‘Namomotan taka.’ Sinasabi nin sarong marahay na ama sa saiyang mga aki na namomotan nia sindang marhay. An siring na mga tataramon—na may kaibang angay na kapadangatan—nakakatabang sa pag-oswag nin mga aki. Siertong nakapahiro nanggad sa puso ni Jesus na madangog an boses kan saiyang Ama na nagpapahayag nin pagkamoot sa saiya!

Ikatolo, paagi sa mga tataramon na “sakong inoyonan,” ipinahayag ni Jehova an saiyang pag-oyon sa saiyang Aki. Garo man sana sinasabi ni Jehova, ‘Aki ko, naoogma ako sa ginibo mo.’ An mamomoton na ama naghahanap nin mga oportunidad tanganing ipaaram sa saiyang mga aki na naoogma sia sa marahay na mga bagay na sinasabi o ginigibo ninda. An mga aki nakakakua nin sarig asin kosog nin boot hale sa pag-oyon nin mga magurang. Siertong nakaparigon sa boot ni Jesus na madangog na inoyonan sia kan saiyang Ama!

Totoo, si Jehova sarong Ama na daing kapareho. Minamawot daw kan saindong puso an siring na ama? Kun siring, mararanga kamong maaraman na puede kamong magkaigwa nin relasyon ki Jehova. Kun may pagtubod na pag-aadalan nindo an manongod sa saiya asin sinserong magmamaigot na gibohon an saiyang kabotan, mahimate sia. An Biblia nagsasabi: “Rumani kamo sa Dios, asin sia marani sa saindo.” (Santiago 4:8) Ano an makakatao sa saindo nin mas tiwasay na pagmate kisa sa pagkaigwa nin dayupot na relasyon ki Jehova Dios, an pinakamarahay nanggad na Ama?

[Nota sa Ibaba]