Rumani sa Dios

Sarong Paraotob nin mga Panuga

JOSUE 23:14

NADEDEPISILAN daw kamo na magtiwala sa iba? Makamomondo, nabubuhay kita sa sarong kinaban na dian an pagtitiwala parateng nararaot. Kun kamo nakolgan nin saro na saindong pinagtitiwalaan—tibaad huli sa mga kaputikan o nasudyang mga panuga—an saindong pagtitiwala tibaad biyo nang nawara. Minsan siring, igwa nin saro na puede nindong pagtiwalaan na dai kamo noarin man madedesganar. “Magtiwala ka ki Jehova sa bilog mong puso,” an pagdagka sa sato kan Talinhaga 3:5. Taano si Jehova ta maninigo sa siring na pagtitiwala? Tanganing masimbag iyan, siyasaton niato an mga tataramon ni Josue—sarong lalaki na nagtiwala nin lubos ki Jehova—na nakarekord sa Josue 23:14.

Estudyare an eksena. Si Josue, na kasalihid ni Moises bilang lider kan Israel, haros 110 anyos na. Durante kan saiyang halawig na buhay, naobserbaran nia mismo an dakol sa makapangyarihan na mga gibo ni Jehova para sa Israel, kaiba an milagrosong pagkaligtas ninda sa Dagat na Pula mga 60 taon na an nakaagi. Ngonyan, mantang iniisip-isip an nakaagi, ipinaapod ni Josue ‘an kamagurangan na lalaki kan Israel asin an mga namamayo kaiyan asin an mga hokom kaiyan patin an mga opisyal kaiyan.’ (Josue 23:2) An mga tataramon na sinabi nia naghahayag bako sana nin kadonongan huli sa edad, kundi kan mga paghorophorop nin puso na pano nin pagtubod.

“Ako pasiring sa dalan kan bilog na daga,” an paliwanag ni Josue. An mga tataramon na “dalan kan bilog na daga” sarong piguratibong pananaram para sa kagadanan. Garo man sana sinasabi ni Josue na, “dai na maghahaloy an sakong buhay.” Huling aram nia na madali na siang magadan, siertong naggamit si Josue nin dakol na toninong na oras sa paghorophorop sa saiyang buhay. Ano daw na pamamaaram an sasabihon nia sa saiyang mga kapwa parasamba?

Nagpadagos si Josue: “Mayo ni sarong tataramon sa gabos na marahay na tataramon na sinabi sa saindo ni Jehova na saindong Dios an nasudya. Iyan gabos naotob para sa saindo. Mayo ni sarong tataramon sa mga iyan an nasudya.” Ini an mga tataramon nin sarong tawo na igwa nin lubos na pagtitiwala sa Dios. An dahelan? Sa paggirumdom sa gabos niang naheling, naaraman ni Josue na pirmeng inootob ni Jehova an Saiyang mga panuga. * Malinaw an ipinapakahulogan ni Josue: Gusto nia na an mga kapwa nia Israelita magkaigwa nin lubos na pagtubod na maootob man an gabos na panuga ni Jehova para sa saindang ngapit.

Sa pagkomento sa Josue 23:14, sarong reperensia sa Biblia an nagsabi: “Iluwas an lambang panuga hale sa Biblia; dangan siyasaton an kasaysayan kan kinaban; asin makihumapot sa gabos na linalang dian, tanganing humanap nin saro sanang pangyayari na may binalga o liningawan na panuga an Dios.” Kun posibleng gibohon an siring na pagsiyasat, makakapagkongklusyon kita nin kapareho kan ki Josue—an mga panuga ni Jehova dai noarin man nasusudya.—1 Hade 8:56; Isaias 55:10, 11.

An Biblia igwa nin rekord kan mga panuga nin Dios na naotob na, kaiba an nagkapira na naheheling mismo niato na naootob. Yaon man dian an makangangalas na mga panuga ni Jehova para sa satong ngapit. * Taano ta dai nindo mismo siyasaton an rekord na iyan? An pag-adal sa Biblia puedeng makakombensir sa saindo na an Paraotob nin mga panuga angay na pagtiwalaan nindo.

[Mga Nota sa Ibaba]