An Itinokdo ni Jesus Dapit sa Kahadean nin Dios
An Itinokdo ni Jesus Dapit sa Kahadean nin Dios
“Sia naglibot sa lambang siudad asin lambang baryo, na naghuhulit . . . kan maogmang bareta kan kahadean nin Dios.”—LUCAS 8:1.
GUSTO niatong ipakipag-olay an mga bagay na mahalaga sa sato, mga bagay na harani sa satong puso. Arog kan sinabi mismo ni Jesus, “gikan sa kapanoan kan puso nagtataram an ngoso.” (Mateo 12:34) Basado sa mga sinabi ni Jesus durante kan saiyang ministeryo, makakakongklusyon kita na mahalagang marhay sa saiya an Kahadean nin Dios.
Ano an Kahadean nin Dios? An kahadean sarong gobyerno na pinamamahalaan nin hade. Kaya an Kahadean nin Dios sarong gobyerno na pinatindog nin Dios. Dakol an sinabi ni Jesus manongod sa Kahadean nin Dios, asin ginibo nia iyan na tema kan saiyang mensahe. An Kahadean na iyan labing 110 na beses na sinambit sa apat na Ebanghelyo. Alagad bako sanang paagi sa tataramon nagtokdo si Jesus. An saiyang paggawe dakol man an itinokdo manongod sa Kahadean nin Dios asin sa gigibohon kaiyan.
Siisay an Hade? An pagtukaw sa puesto kan Hade kan Kahadean nin Dios bakong resulta kan pagboto nin mga tawo. Imbes, an Namamahalang ini pinili nin Dios mismo. Sa pagtotokdo ni Jesus, ihinayag nia na sia an pinili nin Dios na magin Hade.
Aram ni Jesus na ihinula sa Biblia na an ipinanugang Mesiyas mamamahala sa sarong daing katapusan na Kahadean. (2 Samuel 7:12-14; Daniel 7:13, 14; Mateo 26:63, 64) Girumdomon na ihinayag ni Jesus nin daing pag-alangan na sia an ihinulang Mesiyas. Paagi kaiyan, inako ni Jesus na sia an Hade na nombrado nin Dios. (Juan 4:25, 26) Angay nanggad, ginamit ni Jesus nin nagkapirang beses an mga tataramon na “sakong kahadean.”—Juan 18:36.
Itinokdo man ni Jesus na may iba pa na makakaibanan niang mamahala sa Kahadean. (Lucas 22:28-30) Inapod nia an kairibang mamamahala na ini bilang “sadangoton na aripompon,” huling limitado an bilang ninda. Sinabi nia dapit sa sainda: “An saindong Ama nag-oyon na itao sa saindo an kahadean.” (Lucas 12:32) Ipinapaheling kan huring libro kan Biblia na may total na 144,000 an magkakapribilehio na mamahala kaiba ni Cristo.—Kapahayagan 5:9, 10; 14:1.
Yaon saen an Kahadean? “An sakong kahadean bakong kabtang kan kinaban na ini,” an sinabi ni Jesus sa Romanong namamahala na si Poncio Pilato. (Juan 18:36) An Kahadean nin Dios sa pamamahala ni Cristo dai mamamahala paagi sa mga representanteng tawo. Paorootrong inapod ni Jesus an Kahadean nin Dios na “kahadean kan kalangitan.” * (Mateo 4:17; 5:3, 10, 19, 20) Kun siring, an Kahadean nin Dios sarong gobyerno sa langit.
Lubos na inasahan ni Jesus na mabalik sia sa langit pagkatapos kan temporaryo niang pag-istar sa daga. Sia nagsabi na ‘maandam sia nin lugar’ duman, na magbubukas kan dalan tanganing makaibanan nia an saiyang kairibang mamamahala.—Juan 14:2, 3.
Ano an gigibohon kan Kahadean? Tinokdoan ni Jesus an mga naghihinanyog sa saiya na mamibi sa Dios: “Dumatong logod an kahadean mo. Gibohon logod an kabotan mo, kun paano sa langit, siring man sa daga.” (Mateo 6:9, 10) Ginigibo na sa langit an kabotan nin Dios. An Kahadean iyo an paagi nin Dios tanganing maotob an katuyohan nia para sa daga. Tanganing mangyari iyan, an Kahadean magibo nin dakulang mga pagbabago sa dagang ini.
Ano an gigibohon digdi sa daga kan Kahadean? Itinokdo ni Jesus na hahaleon kan Kahadean nin Dios an karatan paagi sa pagpoho sa mga determinadong gumibo kaiyan. (Mateo 25:31-34, 46) Iyan an magigin katapusan kan gabos na klase nin karatan. Itinokdo ni Jesus na an daga mapapano nin mga tawo na “mahoyo,” matanos, maheherakon, “dalisay an puso,” asin mapagpatoninong.—Mateo 5:5-9.
Sa sarong maating daga daw mabubuhay an siring na mga maimbod? Bako nanggad! Nanuga si Jesus na magkakaigwa nin makangangalas na mga pagbabago sa daga sa pamamahala kan Kahadean nin Dios. An lalaking madali nang gadanon na kataed ni Jesus nagsabi: “Jesus, girumdoma man ako kun ika yaon na sa saimong kahadean.” Bilang simbag, si Jesus nagsabi: “Totoong sinasabi ko sa saimo ngonyan, Ika makakaibahan ko sa Paraiso.” (Lucas 23:42, 43) Iyo, an dagang ini gigibohon kan Kahadean nin Dios na pangglobong paraiso—kaagid kan sa hardin nin Eden.
Ano pa an gigibohon kan Kahadean para sa katawohan? Dai sana ipinanuga ni Jesus an gigibohon kan Kahadean nin Dios. Ipinaheling man nia iyan. Dakol na milagrosong pagpaomay an ginibo ni Jesus, na paagi kaiyan ipinaheling nia sa sadit na paagi an gigibohon nia sa mas dakula nanggad na paagi durante kan saiyang pamamahala sa Kahadean. An ipinasabong na Ebanghelyo nagsabi dapit ki Jesus: “Sia naglibot sa bilog na Galilea, na nagtotokdo sa saindang mga sinagoga asin naghuhulit kan maogmang bareta kan kahadean patin nagpapaomay kan gabos na klase nin helang asin kan gabos na klase nin kamatean sa banwaan.”—Mateo 4:23.
Manlaenlaen na klase nin pagpaomay an ginibo ni Jesus. ‘Binuklat nia an mata nin saro na namundag na buta.’ (Juan 9:1-7, 32, 33) Sa maboot niang pagduta, pinaomayan nia an lalaking may nakakarimarimang helang na lepra. (Marcos 1:40-42) Kan darahon sa saiya an “sarong lalaking bungog asin may depekto sa pagtaram,” ipinaheling ni Jesus na magigibo niang “makadangog an mga bungog asin makataram an mga dai nakakataram.”—Marcos 7:31-37.
Kayang haleon kan nombradong Hade nin Dios dawa an kagadanan. Sa tolong pangyayari na isinurat, si Jesus nagbuhay liwat nin mga gadan. Binuhay nia liwat an solong aking lalaki nin sarong balo, an 12 anyos na daragita, asin an saiyang namomotan na amigong si Lazaro.—Lucas 7:11-15; 8:41-55; Juan 11:38-44.
Sa pagladawan sa makangangalas na ngapit na naghahalat sa mga sakop kan Kahadean nin Dios, ihinula ni Jesus paagi ki apostol Juan: “Uya! An tolda nin Dios nasa mga tawo, asin sia mag-eerok kaiba ninda, asin sinda magigin saiyang mga banwaan. Asin an Dios mismo magigin kaibanan ninda. Asin papahidon nia an gabos na luha sa saindang mga mata, asin an kagadanan mawawara na, mayo na man nin pagmondo o pagtangis o kolog. An enot na mga bagay nakalihis na.” (Kapahayagan 1:1; 21:3, 4) Imahinara na sana—sarong kinaban na mayo nin nagluluha huli sa kamondoan, mayong kolog, asin mayong kagadanan! Dangan lubos nang maootob an pamibi na magibo logod an kabotan nin Dios digdi sa daga nin siring sa langit.
Noarin madatong an Kahadean nin Dios? Itinokdo ni Jesus na makakasabay kan kapinonan kan pamamahala nia bilang hade an napapalaen na peryodo nin panahon na inaapod niang saiyang “presensia.” Nagtao si Jesus nin detalyadong hula tanganing iparisa kun noarin mapoon an saiyang presensia bilang hade na may kapangyarihan. An magigin tanda kan peryodong ini nin panahon iyo an pangglobong mga kariribokan, kaiba na an mga guerra, tiggutom, linog, peste, asin nag-oorog na katampalasanan. (Mateo 24:3, 7-12; Lucas 21:10, 11) Ini asin an dakol na iba pang kabtang kan hula ni Jesus nagin partikularmenteng risang-risa poon kan 1914, an taon na biglang nagpoon an Guerra Mundial I. Kun siring, si Jesus namamahala na ngonyan bilang Hade. Dai na mahahaloy, an Kahadean madatong na asin papangyayarihon kaiyan na magibo an kabotan nin Dios digdi sa daga. *
Ano an magigin kahulogan para sa saimo personalmente kan pagdatong kan Kahadean nin Dios? Iyan depende nanggad sa magigin reaksion mo sa mensahe ni Jesus.
[Mga Nota sa Ibaba]
^ par. 8 An pananaram na “kahadean kan kalangitan” naglataw nin mga 30 beses sa Ebanghelyo ni Mateo.
^ par. 17 Para sa detalyadong paliwanag kun paano niato naaaraman na madali nang dumatong an Kahadean nin Dios, helingon an kapitulo 9 na “Nabubuhay Na daw Kita sa ‘Huring mga Aldaw’?” kan librong Ano Man Nanggad an Itinotokdo kan Biblia? na ipinublikar kan Mga Saksi ni Jehova.