Pagtaram nin Laen-laen na Lenguahe—Hale daw Iyan sa Dios?

“DAI ko talaga nasasabotan,” an sabi ni Devon. “Kada semana sa simbahan mi, dakol an garo baga nagkakaigwa nin banal na espiritu asin milagrosong nagtataram nin laen-laen na lenguahe. An nagkapira sa sainda imoral an pamumuhay. Alagad, ako nagmamaigot na mamuhay na malinig sa moral. Pero, dawa pigpaparahagad ko iyan sa pamibi, nungka akong nag-aako kan balaog (gift) na ini kan espiritu. Taano daw?”

Si Gabriel nagsisimba man kun saen an mga tawo garo baga nag-aako nin banal na espiritu asin nagtataram nin laen-laen na lenguahe. “An ikinakasuya ko,” an sabi nia “iyo na kun ako namimibi, nadidisturbo ako nin iba huli sa makokosog na pagtaram na dai ngani nasasabotan nin siisay man sa samo. Mayo talagang nakikinabang sa pagtaram na ini. Bako daw na maninigong may kapakipakinabang na katuyohan an sarong balaog kan espiritu nin Dios?”

An eksperyensia ni Devon asin ni Gabriel nagpapalataw nin hapot na nakakapukaw nin interes, Talaga daw na hale sa Dios an pagtaram nin laen-laen na lenguahe na ginigibo nin nagkapirang relihion ngonyan? Tanganing masimbag an hapot na iyan, makakatabang an pagsiyasat dapit sa balaog na milagrosong pagtaram kan mga Kristiano kan enot na siglo.

Sinda “Nagpoon na Magtaram nin Laen-Laen na Lenguahe”

Mababasa niato sa Biblia an dapit sa nagkapirang lalaki asin babae na tinawan nin kapangyarihan na magtaram nin laen-laen na lenguahe na dai ninda noarin man nanodan. Enot ining nangyari kan aldaw nin Pentecostes 33 C.E., pirang semana sana pagkagadan ni Jesu-Cristo. Kan aldaw na iyan sa Jerusalem, mga 120 disipulo ni Jesus an ‘napano nin banal na espiritu asin nagpoon na magtaram nin laen-laen na lenguahe.’ An mga bisita hale sa ibang nasyon “nataranta, huling nadadangog kan lambang saro na nagtataram sinda sa sadiri niang lenguahe.”—Gibo 1:15; 2:1-6.

Sinasambit kan Biblia an iba pang enot na parasunod ni Jesus na nagkaigwa kan pambihirang kakayahan na ini. Halimbawa, paagi sa kapangyarihan na itinao ki apostol Pablo kan banal na espiritu, sia milagrosong nakapagtaram nin dakol na lenguahe. (Gibo 19:6; 1 Corinto 12:10, 28; 14:18) Alagad rasonable sana na may marahay na katuyohan an ano man na siring na balaog kan banal na espiritu nin Dios. Kaya, ano an nagin katuyohan kan pagtaram nin laen-laen na lenguahe kaidtong mga panahon kan Biblia?

Sarong Tanda nin Suporta nin Dios

Kan si Pablo magsurat sa mga Kristiano sa siudad nin Corinto, na minalataw na an nagkapira nakakapagtaram nin laen-laen na lenguahe, ipinaliwanag nia na “an pagtaram nin laen-laen na lenguahe sarong tanda . . . sa mga dai nagtutubod,” an boot sabihon, sa mga bakong Kristiano. (1 Corinto 14:22) Huli kaini, kaiba kan iba pang milagrosong mga  kakayahan, an kapangyarihan na makapagtaram nin laen-laen na lenguahe nagpaparisa sa mga nagmamasid na an bagong naestablisar na Kristianong kongregasyon may pag-oyon asin suporta nin Dios. An milagrosong mga balaog siring sa karatula sa tinampo na nagtotokdo kun saen maninigong magduman an mga naghahanap sa katotoohan tanganing manompongan an piniling banwaan nin Dios.

Mahalagang mangnohon na dai sinasambit kan Biblia na si Jesus, o an siisay man na propeta kan mga panahon bago kan mga Kristiano, milagrosong nakapagtaram nin laen-laen na lenguahe na dai ninda noarin man nanodan. Kun siring, may dugang na katuyohan an itinao sa mga disipulo ni Jesus na balaog na makapagtaram nin laen-laen na lenguahe.

Sarong Paagi na Ikapalakop an Maogmang Bareta

Sa enot na kabtang kan ministeryo ni Jesus, pinagbotan nia an mga disipulo na sa mga Judio sana ihulit an maogmang bareta kan Kahadean nin Dios. (Mateo 10:6; 15:24) Huli kaiyan, an mga disipulo bihirang maghulit sa mga lugar na dikit an Judio. Alagad madali nang magbago iyan.

Dai nahaloy pagkagadan nia kan 33 C.E., an binuhay liwat na si Jesus nagboot sa mga parasunod nia na ‘gumibo nin mga disipulo sa mga tawo kan gabos na nasyon.’ Sinabihan man nia an saiyang mga parasunod na sinda magigin mga saksi nia “sagkod sa kaporoporohi kan daga.” (Mateo 28:19; Gibo 1:8) Tanganing ikapalakop an maogmang bareta nin siring kaiyan kahiwas, kaipuhan an paggamit nin dakol na lenguahe apuera sa Hebreo.

Minsan siring, dakol sa enot na mga disipulong idto an “hababa an inadalan asin ordinaryo.” (Gibo 4:13) Kun siring, paano sinda makakapaghulit sa hararayong nasyon na an mga lenguahe tibaad dai pa ninda noarin man nadangog, dai na baga sabihon pa, dai ngani sinda tataong magtaram kaiyan? An nagkapira sa maiigot na parahulit na idto tinawan kan banal na espiritu nin milagrosong kakayahan na makapaghulit nin matibay sa mga lenguahe na dai pa ninda noarin man nanodan.

Kun siring, may duwang mahalagang katuyohan an balaog na makapagtaram nin laen-laen na lenguahe. Enot, iyan nagserbing sarong tanda nin suporta nin Dios. Ikaduwa, iyan nagin epektibong paagi tanganing tabangan an mga Kristiano kan enot na siglo sa pag-otob sa sugo sa sainda na maghulit sa mga tawo na laen-laen an lenguahe. An mga katuyohan daw na ini naootob kan pagtaram nin laen-laen na lenguahe na ginigibo nin dakol na relihion ngonyan?

An Pagtaram nin Laen-Laen na Lenguahe Ngonyan—Saro daw na Tanda nin Suporta nin Dios?

Saen ka malaag nin karatula na makikinabang an pinakadakol na tawo sa saindong komunidad? Sa laog daw nin sadit na edipisyo? Siempre bako! An pangyayari kan aldaw nin Pentecostes nagsasabi sa sato na an “kadaklan” na nag-aaragi nakaheling kan tanda na itinao kan mga disipulo paagi sa milagrosong pagtaram nin laen-laen na lenguahe. Iyo, bilang resulta, “mga tolong ribong kalag an nakadugang” sa Kristianong kongregasyon kan aldaw na idto! (Gibo 2:5, 6, 41) Kun may mga nagsasabi ngonyan na nakakapagtaram daa sinda nin laen-laen na lenguahe alagad ginigibo sana iyan sa laog nin simbahan, paano iyan magseserbing pampublikong tanda sa kadaklan na dai nagtutubod?

Sinasabi kan Tataramon nin Dios na an pakikisaro asin iba pang “gibo kan laman” tumang sa pagpunsionar kan banal na espiritu, na sinasabi pa na “an mga naggigibo nin siring na mga bagay dai magmamana kan kahadean nin Dios.” (Galacia 5:17-21) Kun may maheling kang mga tawo na nagtataram nin laen-laen na lenguahe pero kuestionable an moral, rasonable sanang maghapot ka, ‘Bako daw na sala—nakakalagalag pa ngani—na itao an banal na espiritu nin Dios sa mga indibiduwal na padagos na nakikikabtang sa paggaweng kinokondenar kan mismong Tataramon nin Dios?’ Iyan siring sa paglaag nin karatula sa tinampo na salang direksion an itinotokdo.

An Pagtaram nin Laen-Laen na Lenguahe Ngonyan—Saro daw na Paagi na Ikapalakop an Maogmang Bareta?

Kumusta man an saro pang katuyohan kan balaog na makapagtaram nin laen-laen na lenguahe kan enot na siglo? An pagtaram daw nin laen-laen na lenguahe na ginigibo nin mga relihion nagseserbing paagi na ikahulit an maogmang bareta sa mga tawo na laen-laen an lenguahe? Girumdomon na an mga nagmamasid na nasa Jerusalem kan aldaw nin Pentecostes 33 C.E. hale sa dakol na nasyon, asin malinaw na nasabotan ninda an mga lenguahe na milagrosong  itinaram kan mga disipulo. Sa kabaliktaran, an mga nagtataram nin laen-laen na lenguahe ngonyan sa parate dai nasasabotan nin siisay man na nagdadangog.

Malinaw na an pagtaram nin laen-laen na lenguahe sa presenteng panahon laen nanggad sa balaog kan banal na espiritu na itinao sa enot na mga parasunod ni Jesus. An totoo, mayo nin masasarigan na rekord dapit sa siisay man na nag-ako kan milagrosong kapangyarihan na iyan poon kan magadan an mga apostol. Bako ining makangangalas sa mga nagbabasa sa Biblia. Mapadapit sa milagrosong mga balaog, kaiba na an pagtaram na iyan nin laen-laen na lenguahe, an pinasabongan na si apostol Pablo naghula: “Iyan mapondo.” (1 Corinto 13:8) Kun siring, paano maaaraman nin saro kun siisay an igwa kan banal na espiritu ngonyan?

Sairisay an May Ebidensia na Sinda Igwa kan Banal na Espiritu?

Aram na marhay ni Jesus na mapondo an balaog na pagtaram nin laen-laen na lenguahe dai mahahaloy pagkaestablisar kan Kristianong kongregasyon. Kan si Jesus madali nang magadan, may sinabi siang magdadanay na tanda, o tatak, na magpapamidbid sa tunay na mga parasunod nia. “Paagi kaini an gabos makakaaram na kamo an sakong mga disipulo,” an sabi nia, “kun kamo nagkakaminorootmootan.” (Juan 13:35) Sa katunayan, sa bersikulo man sanang iyan—na dian ihinula kan Tataramon nin Dios na mapondo an milagrosong mga balaog pag-abot nin panahon—mababasa niato: “An pagkamoot nungkang nasusudya.”—1 Corinto 13:8.

An pagkamoot iyo an enot sa lista kan siyam na aspekto kan “bunga” kan banal na espiritu nin Dios. (Galacia 5:22, 23) Kaya an mga igwa talaga kan espiritu nin Dios—na huli kaini may suporta Nia—nagpapaheling nin tunay na pagkamoot sa lambang saro. Apuera kaiyan, an ikatolong aspekto kan bunga kan espiritu iyo an katoninongan. Huli kaini, an mga igwa kan banal na espiritu ngonyan nagdadanay na matoninong, na nagmamaigot na labanan an pagkapanatiko, diskriminasyon huli sa rasa, asin kadahasan.

Siring man, girumdoma an hula ni Jesus sa Gibo 1:8. Ihinula nia na an mga disipulo mag-aako nin kapangyarihan tanganing magin mga saksi nia “sagkod sa kaporoporohi kan daga.” Ipinarisa man ni Jesus na an gibohon na ini magpapadagos “sagkod sa katapusan nin kinaban.” (Mateo 28:20, Magna Banal na Kasuratan) Huli kaiyan, an internasyonal na paghuhulit na ini magpapadagos na nagpapamidbid na tanda kan mga tinatawan talaga nin kapangyarihan kan banal na espiritu.

Ano sa heling mo? Sa anong grupo nin mga tawo naheheling an ebidensia na sinda igwa kan banal na espiritu ngonyan? Sairisay an nagpapaheling kan bunga kan espiritu, nangorogna an pagkamoot asin katoninongan, dawa pa sinda magsakit sa kamot kan gobyerno huling sa bilog na kinaban nagsasayuma sindang magkapot nin armas? (Isaias 2:4) Sairisay an nagmamaigot na lumikay sa mga gibo kan laman, arog baga nin pakikisaro, na itinitiwalag pa ngani an mga naggigibo kaiyan na dai nagsosolsol? (1 Corinto 5:11-13) Sairisay an naghuhulit sa bilog na kinaban kan maogmang bareta na an Kahadean nin Dios sana an paglaom kan katawohan?—Mateo 24:14.

An kagpublikar kan magasin na ini dai nag-aalangan na magsabing Mga Saksi ni Jehova an angay sa paglaladawan kan Biblia dapit sa mga igwa kan banal na espiritu. Taano ta dai ka orog na magin pamilyar sa sainda asin ika mismo an magsabi kun baga igwa talaga sinda kan suporta nin Dios?