Pakikipag-olay sa Sarong Kagharong—Ano an Banal na Espiritu?

NAOOGMA an Mga Saksi ni Jehova na ipakipag-olay sa iba an Biblia. Igwa ka daw nin partikular na hapot sa Biblia na iniisip-isip mo? May gusto ka daw na maaraman sa arin man na paniniwala o relihiosong aktibidad kan Mga Saksi ni Jehova? Kun igwa, dai mag-alangan na sabihon iyan sa sunod na may makaolay kang Saksi. Maoogma siang ipakipag-olay iyan sa saimo.

Arog kaini an puedeng mangyari sa pakikipag-olay nin saro sa Mga Saksi ni Jehova sa sarong kagharong. Ipamugtak ta baga na nagtuktok an Saksing si Sam sa harong ni Bert.

Ano an Kahulogan Para sa Saindo kan “Espiritu Santo”?

Bert: Nadangog ko na bakong Kristiano an Mga Saksi ni Jehova. Dai kamo naniniwala sa espiritu santo.

Sam: Gusto ko po ngunang siertohon sa saindo na Kristiano kami. An pagtubod ko ki Jesu-Cristo an dahelan kaya nagdigdi ako sa harong nindo ngonyan na aga. An totoo, Sia mismo an nagboot sa mga parasunod nia na maghulit. Pero hapoton ko po kamo, ano an kahulogan para sa saindo kan “espiritu santo”?

Bert: An boot kong sabihon an banal na espiritu, an ikatolong persona sa Trinidad, an paratabang na ipinanuga ni Jesus na isusugo sa sato. Mahalagang maray sa sako an paratabang na iyan. Gusto kong mamatean an presensia kan banal na espiritu sa buhay ko.

Sam: Arog po kaiyan an pakasabot nin dakol na tawo sa banal na espiritu. Pero, pinag-adalan ko kaidto kun ano an itinotokdo kan Biblia dapit sa temang ini. Kun matogot po kamo, naoogma akong ipaheling saindo nin pirang minuto sana kun ano an nanodan ko.

Bert: Sige, puede man.

Sam: Ako po palan si Sam. Kamo po?

Bert: Ako man si Bert.

Sam: Tiyo Bert, dai po ako maghahaloy. Saro sanang bagay dapit sa temang ini an ipapakipag-olay ko saindo. Nasabi nindo na an banal na espiritu iyo an paratabang na ipinanuga sato ni Jesus. Oyon ako saindo. Alagad sa pakasabot po nindo, an banal na espiritu daw persona asin kapantay nin Dios?

Bert: Iyo, iyan an itinokdo samo.

Persona daw an Banal na Espiritu?

Sam: Magbasa po kita nin teksto sa Biblia na makakatabang sato na maintindihan kun baga persona o bako an banal na espiritu. Tibaad pamilyar kamo sa mga bersikulong ini. Ini an mababasa ta sa Gibo 2:1-4: “Ngonyan mantang nagpapadagos an aldaw kan kapiestahan nin Pentecostes sinda gabos magkairiba sa sarong lugar, asin bigla na sanang nagdatong hale sa langit an ribok na siring sa hagobohob nin makosog na doros, asin iyan nakapano sa bilog na harong kun saen sinda nagtuturukaw. Asin an garo  mga dila nin kalayo naheling ninda asin nakawaras, asin may saro na nagtogdon sa lambang saro sa sainda, asin sinda gabos nagkaparano nin banal na espiritu asin nagpoon na magtaram nin laen-laen na lenguahe, siring sa ipinataram sa sainda kan espiritu.”

Bert: Iyo, pamilyar ako dian.

Sam: Ngonyan Tiyo, puede daw po na an sarong persona mapano nin saro pang persona?

Bert: Siempre dai.

Sam: Magbalyo po kita sa bersikulo 17 kan kapitulong ini. Ini an sinasabi sa enot na kabtang: “‘Sa huring mga aldaw,’ an sabi nin Dios, ‘ibububo ko an iba kan sakong espiritu sa gabos na klase nin laman.’” Hapoton ko po giraray kamo, puede daw na ibubo nin Dios an sarong kabtang nin saro pang Dios na kapantay nia?

Bert: Dai.

Sam: Sinabi man po ni Juan Bautista an saro pang paagi kun paano an saro napapano kan banal na espiritu. Yaon iyan sa Mateo 3:11. Puede po na kamo an magbasa?

Bert: “Ako nagbabautismo sa saindo sa tubig huli sa pagsolsol nindo; alagad an saro na minadatong na kasunod ko mas makosog kisa sa sako, asin bako akong maninigo na maghale kan saiyang sandalyas. An sarong iyan an mabautismo sa saindo sa banal na espiritu asin sa kalayo.”

Sam: Salamat po. Narisa po nindo an sinabi ni Juan Bautista na gigibohon may koneksion sa banal na espiritu?

Bert: Sinabi nia an dapit sa pagigin nabautismohan sa banal na espiritu.

Sam: Tama po kamo. Mangnoha na sinabi man nia an dapit sa pagigin nabautismohan sa kalayo. Siempre, an kalayo bakong persona. Sa heling po nindo, ipinapaheling daw kan bersikulong ini na persona talaga an banal na espiritu?

Bert: Dai.

Sam: Kaya, segun po sa mga tekstong binasa ta, bakong persona an banal na espiritu.

Bert: Garo bako man nanggad.

Taano ta “Paratabang”?

Sam: Pero, nasambit po nindo kasubago an terminong “paratabang.” Sa Juan 14:26, inapod ni Jesus an banal na espiritu na “paratabang.” Basahon ta po iyan: “An paratabang, an banal na espiritu, na isusugo kan Ama sa ngaran ko, an sarong iyan matokdo sa saindo kan gabos na bagay asin mapagirumdom sa saindo kan gabos na bagay na sinabi ko sa saindo.” May mga naniniwala na garo baga sinusuportaran kan tekstong ini an ideya na an banal na espiritu persona, saro na matabang asin matokdo.

Bert: Iyo, kaidto pa arog na kaiyan an paniniwala ko.

Sam: Pero, posible daw po na naggamit si Jesus nin ekspresyon na bakong literal an kahulogan? Ngonyan, mangnoha an sinabi ni Jesus manongod sa kadonongan segun digdi sa Lucas 7:35: “Minsan siring, an kadonongan pinapatunayan na matanos kan gabos na aki kaiyan.” Masasabi daw po nindo na an kadonongan persona, na talagang igwa nin mga aki?

Bert: Dai. Siempre bakong literal an kahulogan kaiyan.

Sam: Oyon po ako. An punto ni Jesus iyo na an kadonongan ikinakapaheling paagi sa mga resulta kaiyan. An Biblia parateng naggagamit nin sarong klase nin ekspresyon na bakong literal an kahulogan, na inaapod personipikasyon—an boot sabihon, pagsambit sa sarong bagay na mayong buhay na garo baga buhay iyan. Parate kitang naggagamit kaiyan sa sato mismong pakikipag-olay. Halimbawa, sa maliwanag na agang ini, natural na sanang sinasabi nin saro, “Buksi na an mga bintana nganing makalaog an saldang,” bako po?

Bert: Iyan man an sasabihon ko.

Sam: An boot daw po nindong sabihon an saldang sarong persona na malaog sa saindong harong bilang bisita?

Bert: Siempre dai. Bakong literal iyan.

Sam: Kaya, kan inapod ni Jesus na paratabang, o paratokdo, an banal na espiritu, posible daw po na naggamit sia nin ekspresyon na bakong literal an kahulogan?

 Bert: Iyo gayod. Kaoyon iyan kan mga tekstong binasa mo manongod sa espiritu na ibinububo asin sa mga tawo na binabautismohan dian. Pero, kun an banal na espiritu bakong persona, ano palan iyan?

Ano an Banal na Espiritu?

Sam: Sa Gibo 1:8, sinasabi po sato ni Jesus kun ano an banal na espiritu. Gusto po nindong basahon iyan?

Bert: “Kamo mag-aako nin kapangyarihan kun dumatong na sa saindo an banal na espiritu, asin kamo magigin mga saksi ko sa Jerusalem asin sa bilog na Judea asin Samaria patin sagkod sa kaporoporohi kan daga.”

Sam: Mangnoha po na an banal na espiritu ikinonektar ni Jesus sa kapangyarihan. Asin sa binasa tang mga teksto kasubago, sa heling po nindo, saen hale an kapangyarihan na iyan?

Bert: Sa Dios Ama.

Sam: Tama po. An banal na espiritu man na iyan an puersang ginamit nin Dios sa paglalang kan uniberso. Sinambit iyan kan ikaduwang bersikulo sa Biblia. An Genesis 1:2 nagsasabi: “An aktibong puersa nin Dios naghihiro sa ibabaw kan katubigan.” An termino sa Hebreo na trinadusir digding “aktibong puersa” tinatradusir man na “espiritu.” Iyan an dai naheheling na aktibong puersa na ginagamit nin Dios sa pag-otob kan saiyang katuyohan asin paghayag kan saiyang kabotan. May saro na sanang teksto na gusto kong ipakipag-olay saindo. Ining Lucas 11:13. Puede pong pakibasa kaini?

Bert: “Kun kamo, minsan ngani maraot, tataong magtao nin marahay na mga regalo sa saindong mga aki, gurano pa daw an Ama sa langit na dai matao nin banal na espiritu sa mga naghahagad sa saiya!”

Sam: Kun kontrolado kan Ama an banal na espiritu, na itinatao iyan sa mga naghahagad sa saiya, puede daw po na magin kapantay kan Ama an banal na espiritu?

Bert: Dai. Nakukua ko na an punto mo.

Sam: Tiyo, dai na po ako maghahaloy. Nasabi ko kasubago na pirang minuto sana ako. Pero, gusto ko kamong hapoton manongod sa napag-olayan ta. Sa mga tekstong pinag-olayan ta, ano po an banal na espiritu?

Bert: Aktibong puersa nin Dios.

Sam: Tama po. Asin segun sa Juan 14:26, kan apodon ni Jesus na paratabang o paratokdo an banal na espiritu, naggamit po sia nin personipikasyon.

Bert: Ngonyan ko sana naaraman iyan.

Sam: May sarong bagay na nakakaparigon na marhay sa sinabi ni Jesus.

Bert: Ano?

Sam: Puede ta pong hagadon sa Dios an saiyang banal na espiritu tanganing tabangan kita sa masakit na mga kamugtakan. Puede ta man pong hagadon an saiyang espiritu tanganing tabangan kita na manodan an katotoohan manongod sa saiya.

Bert: Magayon iyan. Pag-iisipan ko iyan.

Sam: Bago po ako maghale, puede man nindong pag-isipan an saro pang bagay. Mantang an banal na espiritu iyo an aktibong puersa nin Dios, maoyon po kita na puede iyan gamiton nin Dios tanganing otobon an ano man na booton nia.

Bert: Iyo nanggad.

Sam: Kun siring, taano po ta dai pa nia ginagamit an daing limiteng kapangyarihan na iyan tanganing haleon an gabos na kamondoan asin karatan na naheheling niato sa kinaban? Napag-isip-isip na po nindo iyan? *

Bert: An totoo, iyo na.

Sam: Puede daw akong magbalik sa sunod na semana sa arog kaining oras tanganing pag-olayan ta iyan?

Bert: Iyo, sige. Halaton taka.

[Nota sa Ibaba]