NAKAKATABANG daw sa sato an pamibi? Ipinapaheling kan Biblia na iyo; an pamibi kan maimbod na mga lingkod nin Dios talagang nakatabang sa sainda. (Lucas 22:40; Santiago 5:13) An totoo, an pamimibi puedeng makatabang nanggad sa sato sa espirituwal, emosyonal, asin pisikal na paagi. Paano?

Ipamugtak ta na ika may aki na tinawan nin regalo. Totokdoan mo daw sia na igo nang makamate nin pagpahalaga? O totokdoan mo daw siang ipahayag an pasasalamat nia? Kun itinataram niato an tunay na namamatean niato, tinatawan niato iyan nin atension asin mas napapakosog pa ngani iyan. Totoo man daw iyan kun kinakaolay niato an Dios? Iyo nanggad! Helinga an nagkapirang halimbawa.

Pamibi nin pagpasalamat. Kun kita nagpapasalamat sa satong Ama sa marahay na mga nangyayari sa sato, tinatawan niato nin atension an mga bendisyon sa sato. Bilang resulta, kita nagigin mas mapagpasalamat, mas maogma, asin mas positibo.—Filipos 4:6.

Halimbawa: Ipinahayag ni Jesus an pasasalamat nia huling dinangog asin sinimbag kan saiyang Ama an mga pamibi nia.—Juan 11:41.

Pamibi para sa kapatawadan. Kun kita naghahagad nin kapatawadan sa Dios, mas napapakosog niato an satong konsensia, mas napapararom an satong pagsolsol, asin mas nasasabotan niato an pagigin seryoso nin kasalan. Kita nagiginhawahan man huling dai kita riniribok kan satong konsensia.

Halimbawa: Namibi si David tanganing ipahayag an pagsolsol asin kamondoan.—Salmo 51.

Pamibi para sa paggiya asin kadonongan. An paghagad ki Jehova nin paggiya o kadonongan na kaipuhan niato tanganing makagibo nin marahay na desisyon makakatabang sa sato na magin tunay na mapakumbaba. Iyan puedeng magpagirumdom sa sato kan mga limitasyon niato asin magpakosog kan pagtitiwala niato sa satong langitnon na Ama.—Talinhaga 3:5, 6.

Halimbawa: Si Salomon mapakumbabang naghagad nin paggiya asin kadonongan sa pamamahala sa Israel.—1 Hade 3:5-12.

Pamibi dapit sa kasakitan. Kun biyo niatong ipapahayag sa Dios an nasa puso niato mantang grabe an pagsakit kan satong boot, kita magiginhawahan asin magtitiwala ki Jehova imbes na sa satong sadiri.—Salmo 62:8.

Halimbawa: Si Hadeng Asa namibi kan sia mapaatubang sa makosogon na kalaban.—2 Cronica 14:11.

Pamibi sa kapakanan kan mga nangangaipo. An siring na pamibi nakakatabang sa sato na likayan an pagigin makasadiri, asin magin mas mapagmalasakit saka maduminamay.

Halimbawa: Si Jesus namibi sa kapakanan kan mga parasunod nia.—Juan 17:9-17.

Pamibi nin pag-omaw. Kun inoomaw niato si Jehova huli sa saiyang magayonon na mga ginibo asin kualidad, mararom an satong paggalang saka pagpahalaga sa saiya. An siring na pamibi puede man na makatabang sa sato na magin mas harani sa satong Dios asin Ama.

Halimbawa: Si David maogmang nag-omaw sa Dios huli sa saiyang mga linalang.—Salmo 8.

An saro pang bendisyon na konektado sa pamibi iyo “an katoninongan nin Dios na labi sa gabos na kaisipan.” (Filipos 4:7) An pagigin trangkilo sa maribok na kinaban na ini pambihirang bendisyon nanggad. May mga pakinabang pa ngani iyan sa pisikal. (Talinhaga 14:30) Alagad iyan daw makakamtan sana niato huli sa sadiri tang paghihingoa? O may kalabot daw iyan na mas mahalaga?