Naghahapot an mga Parabasa . . .

Taano ta Gagamiton ni Satanas an Sarong Halas Tanganing Makipag-olay ki Eva?

▪ Tibaad maoyon kamo na segun sa tinokar sa pahina 8, si Satanas an puersa sa likod kan halas na nakipag-olay ki Eva. Ini nanggad an itinotokdo kan Biblia. Minsan siring, tibaad isipon nindo, ‘Taano ta mamanipularon nin sarong makapangyarihan na espiritu an sarong halas na arog kan ginigibo nin bentrilokista sa sarong kiko-kiko?’

Ilinaladawan kan Biblia an mga taktika ni Satanas bilang “mga pakana,” o “mga katusohan,” asin nakakatabang an insidenteng ini na patunayan an puntong iyan. (Efeso 6:11; nota sa ibaba) An nangyari sa Eden bakong pabula manongod sa nagtataram na hayop; iyan nakakapanggirabong halimbawa nin tusong estratehiya tanganing an mga tawo irayo sa Dios. Sa anong paagi?

Maingat na pinili ni Satanas an saiyang punteriya. Si Eva iyo an pinakahoben na linalang na may intelihensia sa uniberso kaidto. Inaprobetsaran ni Satanas an kawaran nin eksperyensia ni Eva paagi sa pagdaya asin pagsugot sa saiya. Paagi sa pagtago sa likod nin halas, na sarong maingat na marhay na linalang, may katusohan na itinago ni Satanas an saiyang pangahas asin ambisyosong mga katuyohan. (Genesis 3:1) Pag-isipan man kun ano an nagibo nia paagi sa garo baga pagpataram sa halas.

Enot, biyong nakua ni Satanas an atension ni Eva. Aram nia na an mga halas dai nakakataram; an agom nia an nagtao nin ngaran sa gabos na hayop, kaiba na an sarong ini, posibleng marhay na pagkatapos nin maingat na pagmasid sa mga ini. (Genesis 2:19) Siertong pinagmasdan man ni Eva an maingat na linalang na ini. Kaya an taktika ni Satanas nakapukaw sa interes ni Eva; ini an nagpahiro sa saiya na magkonsentrar sa saro sanang bagay na ipinagbawal sa saiya sa bilog na hardin. Ikaduwa, kun an halas nagpapahipli sa mga sanga kan ipinagbabawal na kahoy, ano daw an posibleng marhay na inisip ni Eva? Posible daw na inisip niang an hamak asin dai nakakataram na linalang na ini nagkakan mismo kan bunga kaiyan kaya nakakataram na ini? Kun an bunga kaiyan dakula nanggad an nagibo para sa sarong halas, ano daw an puedeng magibo kaiyan para sa saiya? Dai niato masisierto kun ano an inisip ni Eva o kun baga kinagatan kan halas an bunga kaiyan, alagad aram niato na kan sabihon kan halas ki Eva na paagi sa bungang iyan sia magigin “arog nin Dios,” andam siang maniwala sa kaputikan na iyan.

Dakol man an ihinahayag kan mga tataramon na pinili ni Satanas. Nagtanom sia nin mga pagduda sa isip ni Eva, na ipinaparisang an Dios may marahay na bagay na ipinapanguri sa saiya asin linilimitaran nin dai man kaipuhan an saiyang katalingkasan. An kapangganahan kan pakana ni Satanas nagdepende sa posibilidad na magigin mas matimbang ki Eva an saiyang personal na interes kisa sa pagkamoot nia sa Dios na nagtao kan gabos na bagay na yaon sa saiya. (Genesis 3:4, 5) Makamomondo, nag-aser an estratehiya ni Satanas; si Eva asin Adan parehong dai nakapatalubo sa saindang puso kan klase nin pagkamoot asin pagpahalaga na maninigo kutanang namatean ninda para ki Jehova. Bako daw na pinapalakop ngonyan ni Satanas an kaparehong pagpaorog sa personal na interes asin pangangatanosan?

Pero, ano an motibo ni Satanas? Ano an gusto niang mangyari? Sa Eden, prinobaran niang itago kun siisay sia sagkod kun ano an motibo nia. Alagad, pag-abot nin panahon, ihinayag nia kun siisay sia. Kan sinugotan nia si Jesus, siertong aram nia na dai nia ikakatago kun siisay sia. Kaya direkta niang sinutsutan si Jesus: ‘Lumuhod ka asin gumibo nin sarong akto nin pagsamba sa sako.’ (Mateo 4:9) Malinaw na si Satanas haloy nang pinapahiro nin pagkaara sa pagsamba na itinatao ki Jehova Dios. Gigibohon nia an gabos tanganing maraot o irayo sa Dios an siring na pagsamba. Gustohon niang raoton an satong integridad sa Dios.

Malinaw nanggad, ihinahayag kan Biblia na si Satanas sarong peligroso asin ekspertong parapakana sa paggibo kan saiyang mga katuyohan. Marahay sana ta dai kita kaipuhan na madaya na arog kan nangyari ki Eva, “huli ta bako kitang ignorante sa saiyang mga pakana.”—2 Corinto 2:11.