An Katotoohan Puedeng Makapabago kan Buhay Mo

TIBAAD naaraman mo o itinokdo na sa saimo an saro sa mga kaputikan manongod sa Dios na ibinubuyagyag sa seryeng ini nin mga artikulo. Sa ibong kaiyan, tibaad mag-alangan kang bagohon an saimong mga paniniwala, nangorogna kun haloy mo nang pinaniniwalaan iyan.

Natural sana an siring na pag-alangan. Dinedesganar nin nagkapirang simbahan an ideya na ikomparar an saindang mga katokdoan sa kun ano an sinasabi kan Biblia. Idinedepensa nin iba an saindang salang mga katokdoan paagi sa pagsabi na an Biblia komplikado, na dai talaga kayang saboton nin lambang tawo. Pero, an kadaklan sa mga disipulo ni Jesus ordinaryong mga tawo, na mayo nin halangkaw na edukasyon, alagad tolos nindang nasabotan an saiyang itinokdo.—Guibo 4:13.

Tibaad mag-alangan ka man na siyasaton an saimong mga paniniwala huli sa takot na an paggibo kaiyan pagpaheling nin kakulangan nin pagtubod. Alagad rasonable daw na isipon na maaanggot sa saimo an Dios kun sisiyasaton mo an Biblia, an saiyang mensahe sa mga tawo, tanganing masabotan kun ano an hinahagad nia sa saimo? Sa kabaliktaran, dinadagka ka kan saiyang Tataramon na personalmenteng siyasaton an Kasuratan, sa pagsabing: ‘Baloon nindo kun ano an marahay, asin maaako, patin sangkap na kabotan nin Dios.’—Roma 12:2.

An pakanood kan katotoohan manongod sa Dios orog pa sa basta sana pag-adal—puede kaiyan bagohon an saimong buhay para sa ikakarahay. (Juan 8:32) Si Deanne, na nasambitan sa enot na artikulo, nakapatalubo na nin pagtubod sa Tataramon nin Dios. Sia nagsabi: “Kan magpoon na akong mag-adal kan Biblia, saka ko sana naisip na malinawon palan an Kasuratan. Ngonyan, midbid ko na si Jehova bako bilang Dios na dai madodolok, kundi bilang sakong mamomoton na Ama sa langit. Nagkaigwa na nin tunay na katuyohan an buhay ko.”

Tibaad nag-adal ka kan Biblia kaidto alagad pagmate mo dai ka man nakinabang. Kun siring, dai ka magsuko. An pagmamaigot na saboton an Biblia mantang natokdoan ka nin mga kaputikan manongod sa Dios garo pagmamaigot na bilogon an sarong puzzle na sala an retratong inaarog mo. Tibaad ikalaag mo nin tama an nagkapirang pidaso, alagad tibaad sumuko kang nadedesganar kun iyan bakong pareho kan kabilogan kan retrato na itinao sa saimo. Pero magpoon ka gamit an tamang retrato, asin ikakalaag mo na nin tama an kada pidaso.

Gusto mo daw na manodan an katotoohan manongod sa Dios? Iniimbitaran mi kamo na kontakon an Mga Saksi ni Jehova sa lugar nindo o sumurat sa angay na adres na yaon sa pahina 4 kan magasin na ini para sa daing bayad na pag-adal sa Biblia.

[Blurb sa pahina 9]

‘Baloon nindo kun ano an marahay, asin maaako, patin sangkap na kabotan nin Dios.’—ROMA 12:2