Binago kan Biblia an Saindang Buhay

ANO an nakatabang sa sarong babae sa Pilipinas na makatalingkas sa pagigin parainom asin magrahay an saiyang buhay pampamilya? Taano ta nagin mapagpatoninong na parabalangibog kan maogmang bareta an sarong mahilig sa karate na taga Australia? Basahon an estorya ninda.

“An mga Pagbabago Dai Nangyari nin Magdamlag Sana.”—CARMEN ALEGRE

TAON NIN PAGKAMUNDAG: 1949

GINIKANAN NA NASYON: PILIPINAS

DATING PARAINOM

AN BUHAY KO KAIDTO: Namundag ako sa San Fernando, sarong banwaan sa probinsia nin Camarines Sur. Pero, haros sa bilog kong buhay, nag-istar ako sa Antipolo, Rizal. Kan mag-abot ako sa Antipolo—na yaon sa mabukid, madoot, saka makahoy na lugar—iyan sarong toninong asin sadit na banwaan. Bihira akong makahiling nin naglalakaw sa luwas kun banggi na. Pero ngonyan, an Antipolo saro nang dakula asin matawong siudad.

Kan nasa Antipolo na ako, namidbid ko si Benjamin, asin pag-abot nin panahon ikinasal kami. Naaraman ko na an buhay may agom mas masakit palan kisa sa inaasahan ko. Sa paghihingoa kong makadulag sa mga problema, nagin parainom ako. Nagin masakit akong pakiibanan, na risang-risa sa pagtratar ko sa sakong agom asin mga aki. Haros mayo akong pagpupugol sa sadiri o pasensia. Dai ako nagpapahiling nin paggalang sa agom ko. Kaya, bakong maogma an pamilya mi.

KUN PAANO BINAGO KAN BIBLIA AN BUHAY KO: An hipag kong si Editha, na sarong Saksi ni Jehova, nagsuherir na kami ni Benjamin makipag-adal sa Biblia sa mga Saksi. Nag-oyon kami, na nag-aasang makakatabang iyan na magrahay an samong buhay bilang pamilya.

Sa pag-adal sa Biblia, dakol kaming nanodan na magagayon na katotoohan. An mga tataramon sa Kapahayagan 21:4 espesyalmenteng nakapahiro sa puso ko. Mapadapit sa mga maistar sa maabot na paraisong daga sa pamamahala kan Kahadean nin Dios, an bersikulong iyan nagsasabi na ‘papahidon nin Dios an gabos na luha sa saindang mga mata, asin an kagadanan mawawara na; dai na noarin man magkakaigwa nin pagmondo, ni pagtangis, ni kolog.’ Gusto kong makaiba sa mga mag-aako kan mga bendisyon na iyan.

Narealisar ko na kaipuhan kong gumibo nin dakulang mga pagbabago sa sakong saboot asin ugale. An mga pagbabago dai nangyari nin magdamlag sana, pero sa kahurihurihi nakatalingkas ako sa pagigin parainom. Nanodan ko man na magin maboot asin mapasensia sa pagtratar sa pamilya. Apuera dian, nanodan kong igalang an sakong agom asin makikooperar  sa saiya mantang pinangengenotan nia an pamilya mi.

Kan nag-aatender na kami ni Benjamin sa mga pagtiripon kan Mga Saksi ni Jehova, naghanga kaming marhay sa nahiling mi. Mayo sa sainda nin sugal, pagburat, asin diskriminasyon. Tinatratar ninda an lambang saro nin may dignidad asin paggalang. Kombensido kami na nanompongan mi na an tunay na relihion.—Juan 13:34, 35.

KUN PAANO AKO NAKINABANG: An samong buhay bilang pamilya talagang nagrahay. Maogma na an pag-ibanan mi ni Benjamin, asin ikinakaogma mi an pagtotokdo sa iba dapit sa Biblia. Nag-aadal na man sa Biblia an duwa ming aking lalaki pati an agom ninda. Naglalaom kami na pag-abot nin panahon makakaibanan mi sinda sa paglilingkod ki Jehova. Ini talaga an pinakamarahay na paagi nin pamumuhay.

“An Pagmate Ko Mayong Makakadaog sa Sako.”—MICHAEL BLUNSDEN

TAON NIN PAGKAMUNDAG: 1967

GINIKANAN NA NASYON: AUSTRALIA

DATING MAHILIG SA KARATE

AN BUHAY KO KAIDTO: Nagdakula ako sa Albury, sarong magayon asin maoswag na siudad sa New South Wales. Arog kan kadaklan na siudad, may krimen man dian. Pero sa pangkagabsan, midbid an Albury na sarong lugar na ligtas istaran.

Nagdakula ako na may komportableng pamumuhay. Dawa ngani nagdiborsio an mga magurang ko kan siete anyos ako, sinegurado ninda na kami kan sakong tugang na lalaki asin duwang tugang na babae dai noarin man magkukulang nin ano man. Nagkaigwa ako nin marahay na edukasyon, na nakapag-eskuela sa nangengenot na pribadong eskuelahan sa samong lugar. Gusto kan sakong ama na magkaigwa ako nin karera sa negosyo pagkatapos kong mag-eskuela. Pero, mas interesado ako sa isport, na dian nagin matibay ako sa pagbisikleta asin karate. Nakakua ako nin trabaho sa sarong pahirahayan nin auto, na nagtao sako nin mas dakol na panahon tanganing makapagkonsentrar sa kinahihiligan kong isport.

Ipinag-orgolyo ko an pagkaigwa nin pusog na hawak. Kun beses, an pagmate ko mayong makakadaog sa sako. Madali kong magagamit an sakong kosog tanganing mang-aprobetsar sa iba. Pero, huling aram kan nagtotokdo sa sako sa karate na pinaglalabanan kong dai gamiton sa salang paagi an sakong kosog, itinokdo nia sa sako na magin estrikto kun dapit sa disiplina asin sa moralidad. Pirme niang idinodoon an importansia nin pagsunod asin kaimbodan.

KUN PAANO BINAGO KAN BIBLIA AN BUHAY KO: Kan magpoon akong mag-adal sa Biblia, nanodan ko na ikinakaongis ni Jehova an kadahasan. (Salmo 11:5) Kan enot, nagrason ako na an karate bako man kadahasan kundi sarong isport na isinasagibo sa ligtas na paagi. Para sa sako, an itinotokdo kaiyan na marahay na mga karakteristiko asin halangkaw na mga pamantayan kaoyon na marhay kan sa Biblia. Matiagang marhay an mag-agom na Saksi na nagtokdo sa sako. Dai ninda ako noarin man sinabihan na bayaan an karate;  basta padagos sana ninda akong tinokdoan kan katotoohan sa Biblia.

Mantang nagtatalubo an kaaraman ko sa Biblia asin an pakikikatood ko ki Jehova, nagbago an pagmansay ko sa mga bagay-bagay. Napahiro akong marhay kan maaraman ko an dapit sa halimbawa na itinao kan Aki ni Jehova na si Jesus. Dawa ngani makapangyarihan na marhay si Jesus, nungka siang naggamit nin pisikal na kadahasan. An mga tataramon nia sa Mateo 26:52 may dakulang epekto nanggad sa sako: “An gabos na minalapnot nin minasbad, sa minasbad magagadan.”

Mantang orog akong nakakanood manongod ki Jehova, orog man na nagtatalubo an pagkamoot asin paggalang ko sa saiya. Nakakapukaw nanggad sa boot na isipon na an satong madonong asin makapangyarihan na Kaglalang puedeng magmakolog sa sako personalmente. Napahiro ako kan maaraman ko na dawa mapamondo ko si Jehova o dawa nasasakitan akong marhay asin gusto ko nang sumuko, dai nia ako noarin man babayaan basta padagos akong naghihingoa. Naranga akong marhay kan panuga nia: ‘Ako si Jehova na saimong Dios, na nagkakapot kan saimong toong kamot asin nagsasabi saimo: Dai ka matakot, susurogon taka.’ (Isaias 41:13) Kan marealisar ko na pinahilingan ako kan siring na pagkamoot, habo ko nang mawara iyan.

Aram ko na an pagbaya sa karate iyo an pinakamasakit na magigibo ko. Pero aram ko man na maoogma kaiyan si Jehova, asin kombensido ako na sulit na isakripisyo an ano man na bagay tanganing mapaglingkodan sia. Sa hiling ko, an lubos na nakakombensir sa sako iyo an nabasa kong sinabi ni Jesus sa Mateo 6:24: ‘Dai nin siisay man na makakapaglingkod sa duwang kagurangnan.’ Narealisar ko na imposibleng mapaglingkodan nin lubos si Jehova kun magpapadagos ako sa karate, huling siertong an matatawan ko giraray nin prioridad iyo an karate. Panahon na tanganing pumili kun siisay an paglilingkodan ko.

Bakong madaling bayaan an karate. Nasakitan ako huli sa laen-laen na emosyon. Nakamate ako nin kagayagayahan sa pakaaram na napapaogma ko si Jehova. Alagad, nakamate man ako na garo trinaydor ko an nagtotokdo sa sako sa karate. Sa mga nasa martial arts, an pagtraydor parate nindang ibinibilang na daing kapatawadan na kasalan. Gugustohon pa ngani kan iba na maghugot imbes na atubangon an kasusupgan.

Huli sa grabeng supog, dai ko ikinapaliwanag sa nagtotokdo sa sako sa karate kun taano ta mahale ako. Imbes, basta na sana ako huminale asin dai na sa ano man na paagi nakikomunikar sa saiya asin sa iba pang kairiba ko. Aram kong tama an ginibo kong pagbaya sa karate. Pero, nakonsensia man ako huling pinalampas ko an oportunidad na sabihon sa iba an bago kong mga tinutubod. Sa pagmate ko, napamondo ko na si Jehova bago pa man ako maglingkod sa saiya. An gabos na ini nagpapasakit nanggad sa sako. Dakol na beses kong prinobaran na mamibi ki Jehova alagad nagpaparahibi man sana ako huli sa kakologan nin boot.

Siertong may nahiling na marahay si Jehova sa sako, huling pinahiro nia an mga tugang sa kongregasyon na suportaran ako. Kahangahanga an saindang pagkamoot, pagranga, asin pakikikatood. Naranga man ako kan estorya sa Biblia dapit ki David asin Bat-seba. Dawa ngani may seryosong mga pagkakasala si David, pinatawad sia ni Jehova kan sia sinserong magsolsol. Kan horophoropon ko an estoryang iyan, natabangan akong magkaigwa nin tamang pagmansay sa mga pagkukulang ko.

KUN PAANO AKO NAKINABANG: Bago ako mag-adal sa Biblia, mayong gayo akong pakiaram sa iba—manongod lang sa sako an iniintindi ko. Alagad sa tabang ni Jehova asin kan sakong magayon na agom na pitong taon ko nang kaibanan, orog ko pang napatalubo an empatiya. Sarong bendisyon na magkaigwa kami nin mga tinotokdoan sa Biblia, kaiba na an nagkapirang nasa makamomondong kamugtakan. Naoogma ako kun nahihiling kong napapahiro an iba sa pagkamoot ni Jehova, asin an kaogmahan na iyan orog nanggad kisa sa puedeng mamatean nin sarong kampeon sa karate.

[Blurb sa pahina 14]

“Nakakapukaw nanggad sa boot na isipon na an satong madonong asin makapangyarihan na Kaglalang puedeng magmakolog sa sako personalmente”

 [Kahon/Ritrato sa pahina 15]

“Salamat sa Magayonon na Seryeng Ini!”

Nagustohan mo daw an mga eksperyensia sa sinundan na artikulo? Duwa sana iyan sa labing 50 eksperyensia na ipinublikar sa The Watchtower poon kan Agosto 2008. Nagin paborito kan samong mga parabasa an seryeng “Binago kan Biblia an Saindang Buhay.” Taano ta gustong-gusto iyan kan dakol?

Manlaenlaen an kamugtakan kan mga indibiduwal na itinatampok sa mga artikulong ini. Bago namidbid an Dios na Jehova, an nagkapira nagin mapanggana man pero mayo nin tunay na katuyohan an buhay. An iba may mga masakit na pinaglabanan, arog nin pagigin aranggoton o pag-abuso sa droga o inomon na de alkohol. Igwa man nin mga nagdakulang midbid si Jehova alagad may panahon na binayaan ninda sia. Ipinapahiling kan gabos na eksperyensiang iyan na magigibo nin saro na magbago tanganing mapaogma an Dios. Asin an paggibo kaiyan pirmeng nagtatao nin mga pakinabang. Ano an epekto kan mga eksperyensiang ini sa samong mga parabasa?

Ipinaliwanag nin sarong parabasa kun paano nakatabang sa nagkapirang presong babae an artikulo sa isyu na Pebrero 1, 2009.

▪ “Nasasabotan kan dakol sa mga preso an pagmate kan mga indibiduwal na itinampok sa artikulo,” an sabi nia. “Epektibong marhay an mga retrato ninda ‘kaidto’ asin ‘ngonyan,’ kaiba an mga impormasyon manongod sa dating buhay ninda. Dakol na preso an may arog kaiyan na buhay. Pagkabasa kan mga eksperyensiang ini, duwang preso an nagpoon na mag-adal kan Biblia.”—C. W.

An mga eksperyensia na itinampok sa seryeng ini talagang nakapukaw sa boot nin nagkapira. Halimbawa, yaon sa isyu na Abril 1, 2011 an eksperyensia ni Guadalupe Villarreal, na tinalikodan an pagigin homoseksuwal tanganing mapaglingkodan si Jehova. Mangnoha an duwa sana sa dakol na surat hale sa samong mga parabasa bilang reaksion ninda sa eksperyensia nia.

▪ “An eksperyensia ni Guadalupe talagang nakapahiro sa sako. Nakakaogma nanggad na mahiling kun paano an pagkamoot ki Jehova asin sa Tataramon nia lubos na nakakapabago sa sarong tawo!”—L. F.

▪ “Kaidto, hinihingoa kong ipakipag-olay sa gabos an pagtubod ko, dawa sa mga homoseksuwal. Pero, kaining nakaagi pa sana, narisa ko na binabaliwala ko an siring na mga tawo o linilikayan pa ngani sinda. An artikulong ini an talagang kaipuhan ko. Natabangan ako kaini na mansayon an siring na mga tawo arog kan pagmansay sa sainda ni Jehova—bilang potensial na mga parasamba nia.”—M. K.

An saro pang nakapukaw na marhay sa boot nin dakol na parabasa iyo an eksperyensia ni Victoria Tong na yaon sa isyu na Agosto 1, 2011. Inestorya ni Victoria an bako nanggad marahay na pagpadakula sa saiya. Inadmitir nia na nadepisilan siang makombensir na namomotan sia ni Jehova, dawa ngani pirang taon na siang naglilingkod sa saiya. Asin isinaysay nia kun ano an luway-luway na nakatabang sa saiya na akoon na namomotan sia ni Jehova. Mangnoha an sinabi nin nagkapirang parabasa manongod sa estorya nia.

▪ “Nakataros sa puso ko an eksperyensia ni Victoria. Dakol akong inagihan na trahedya. Pirme kong pinaglalabanan an pagigin negatibo—dawa pirang taon na akong bautisadong Saksi. Pero, nakatabang sa sako an eksperyensia ni Victoria na orog pang maghingoa tanganing mahiling ko kun ano an nahihiling sa sako ni Jehova.”—M. M.

▪ “Kan aki pa ako, pinaglabanan ko an pagigin adikto sa pornograpiya. Kasuarin pa sana, nabangkag giraray ako dian. Nagpatabang ako sa Kristianong mga elder, asin luway-luway kong napapangganahan an problema kong iyan. Sinierto sa sako kan mga elder na namomotan ako nin Dios asin may pagkaherak sia sa sako. Pero, kun minsan, nakakamate pa man giraray ako na mayo akong halaga, na garo baga imposibleng mamotan ako ni Jehova. Talagang nakatabang sa sako an eksperyensia ni Victoria. Ngonyan, narealisar ko na kun iniisip kong imposibleng mapatawad ako nin Dios, garo man sana sinasabi ko na bakong igo an atang kan saiyang Aki tanganing tahoban an mga kasalan ko. Ginunting asin sinaray ko an artikulong ini tanganing mabasa ko asin mahorophorop kun nakakamate ako na mayo akong halaga. Salamat sa magayonon na seryeng ini!”—L. K.