Nakakaeksperyensiya an mga tawo sa iba-ibang parte kan kinaban nin grabeng init nin panahon asin iba pang mga kalamidad na dara kaiyan. Mangnuhon an minasunod na mga report:

•   “Naireport an pinakamainit na Hunyo sa kasaysayan puon kan magrekord nin temperatura kan kinaban, na nagpuon 174 taon na an nakaagi.”—National Oceanic and Atmospheric Administration, U.S. Department of Commerce, Hulyo 13, 2023.

•   “An Italy, Spain, France, Germany asin Poland gabos nakakaeksperyensiya nin grabeng init nin panahon kun sain an temperatura kan aire linalauman na maabot nin 48°C sa mga isla nin Sicily asin Sardinia – posibleng an pinakamainit na temperatura na nairekord sa Europa.”—European Space Agency, Hulyo 13, 2023.

•   “Mantang padagos na nag-iinit an planeta, linalauman na magigin mas makukusog saka mas parati an mga pag-uran na maresulta sa grabeng mga pagbaha.”—Stefan Uhlenbrook, direktor kan hydrology, water asin cryosphere sa World Meteorological Organization, Hulyo 17, 2023.

 Nahahadit ka daw sa nagdadakul na mga report na ini manungod sa maraot na mga kamugtakan nin panahon? Pag-isipan an sinasabi kan Bibliya manungod sa mahalagang bagay na ini.

 Iyo. An grabeng init sa iba-ibang lugar sa kinaban asin an iba pang maraot na kamugtakan nin panahon kauyon kan mga pangyayari na ihinula kan Bibliya na mangyayari sa panahon ta. Halimbawa, ihinula ni Jesus na makakahiling kita nin “makatatakot na mga tanawon.” (Lucas 21:11) Dahil sa pag-init kan temperatura sa iba-ibang lugar sa kinaban, dakul an natatakot na mararaot na kan mga tawo an daga.

 Dai. Linalang nin Diyos an daga para magin satong permanenteng istaran; dai niya itutugot na rauton ini kan mga tawo. (Salmo 115:16; Eclesiastes 1:4) An totoo, nanunuga siya na ‘lalaglagon niya idtong mga nagraraot kan daga.’—Kapahayagan 11:18.

 Ipinapahiling kan Bibliya na kayang protektaran nin Diyos an daga tanganing dai maraot an kapalibutan kaini.

•   “Pinakalma [nin Diyos] an alipuros; an mga alon kan dagat minakulpa.” (Salmo 107:29) May kapangyarihan an Diyos na kontrulon an mga puwersa sa kapalibutan. Kaya niyang solusyunan an mga problema sa kapalibutan na nagigin dahilan nin maraot na mga kamugtakan nin panahon na nagpapasakit ngunyan sa mga tawo.

•   “Inaataman mo an daga, ginigibo mo iyan na magin abunda sa bunga asin matabang marhay.” (Salmo 65:9) Paagi sa pagbendisyon nin Diyos, magigin paraiso an daga.

 Para sa dagdag na impormasyon manungod sa panuga kan Bibliya na papakarhayon an kapalibutan, hilingon an artikulong “Siisay an Makakapagligtas kan Daga?”