Narisa mo daw na garo masakiton nang maaraman kun ano an totoo saka bako? An mga tawo ngunyan mas nagpapadara sa saindang emosyon saka pinaniniwalaan kisa sa kun ano talaga an totoo. Halimbawa, popular na marhay sa panahon ngunyan an ekspresyon na “post-truth,” na nabilog para iladawan an sitwasyon na iyan. a Iyan mismo an nangyayari sa bilog na kinaban ngunyan, kun sain dakul an nagtutubod na mayo man talagang katotoohan.

 Dai na bago an arog kaiyan na kaisipan. Mga 2,000 na taon na an nakalihis, an Romanong gobernador na si Poncio Pilato may pagdudang hinapot si Jesus: “Ano an katotoohan?” (Juan 18:38) Dai na hinalat ni Pilato an simbag, pero importante an ihinapot niya. An Bibliya may itinataong simbag na makakatabang saimo na maaraman an katotoohan dawa yaon ka sa kinaban na ini na an mga tawo nariribong sa kun ano an totoo asin bako.

Igwa daw talagang katotoohan?

 Iyo. Ginagamit kan Bibliya an tataramon na “katotoohan” para ipanungod sa mga bagay na talagang totoo asin sa mga bagay na tama sigun sa pamantayan sa moral. Itinutukdo kan Bibliya na an Diyos na Jehova b an Gikanan nin lubos na katotoohan, na inaapod siyang “an Diyos nin katotoohan.” (Salmo 31:5) Mababasa sa Bibliya an mga katotoohan hali sa Diyos, asin ikinukumparar iyan sa liwanag huling nagseserbi iyan na giya sa ribaraw na kinaban ngunyan.—Salmo 43:3; Juan 17:17.

Paano mo maaaraman an katotoohan?

 Habo nin Diyos na basta ta lang akuon an katotoohan sa Bibliya. Gusto niya na siyasaton ta iyan gamit an satong kakayahan na mangatanusan imbes na magpadara sa satong mga emosyon. (Roma 12:1) Gusto niya na mamidbid asin kamutan ta siya nin ‘bilog na isip,’ asin dinadagka niya kita na patunayan na totoo an mga nanunudan ta sa Bibliya.—Mateo 22:37, 38; Gibo 17:11.

Kiisay hali an kaputikan?

 Sinasabi kan Bibliya na an kaputikan nagpuon sa kaiwal nin Diyos, si Satanas na Diyablo, na inaapod kan Bibliya na “an ama kan kaputikan.” (Juan 8:44) Nagsabi siya nin kaputikan sa inot na mga tawo manungod sa Diyos. (Genesis 3:1-6, 13, 17-19; 5:5) Puon kaidto, padagos na nagpapalakop si Satanas nin mga kaputikan asin itinatago kun ano an totoo manungod sa Diyos.—Kapahayagan 12:9.

Taano ta dakul an nagpuputik ngunyan?

 Sa panahon ta ngunyan, na inaapod kan Bibliya na “huring mga aldaw,” mas naglakop sa kinaban an maraot na impluwensiya ni Satanas. Ordinaryo na sana sa mga tawo na magputik para dayaon an iba asin makinabang sinda. (2 Timoteo 3:1, 13) An kaputikan hiling-hiling man sa kadaklan na mga relihiyon ngunyan. Arog kan ihinula kan Bibliya na mangyayari sa satong panahon, “papalibutan [kan mga tawo] an saindang sadiri nin mga paratukdo na makitik kan saindang mga talinga,” asin “mapundo sinda sa pagdangog sa katotoohan.”—2 Timoteo 4:3, 4.

Taano ta importante an katotoohan?

 Kaipuhan nin katotoohan para magtiwala an mga tawo sa kada saro. Kun mayo nin pagtitiwala, mararaot an relasyon nin mag-aramigo saka pagkasararo kan mga tawo. Sinasabi kan Bibliya na gusto nin Diyos na an satong pagsamba nakabasar sa katotoohan. Mababasa ta: “An mga nagsasamba sa [Diyos] dapat na sumamba sa espiritu asin katotoohan.” (Juan 4:24) Para matabangan ka kan mga katotoohan sa Bibliya na maaraman an mga kaputikan na itinutukdo kan mga relihiyon asin dai ka na makontrol kan mga kaputikan na iyan, basahon an serye nin mga artikulo na may temang “Bakit Nahihirapan ang Ilan na Mahalin ang Diyos?”

Taano ta gusto nin Diyos na maaraman ko an katotoohan?

 Gusto nin Diyos na maligtas ka, asin kaipuhan mong manudan an katotoohan para mangyari iyan. (1 Timoteo 2:4) Kun manunudan mo an pamantayan nin Diyos sa kun ano an tama asin sala saka mamumuhay kauyon kaiyan, magkakaigwa ka nin dayupot na relasyon sa saiya. (Salmo 15:1, 2) Para tabangan an mga tawo na maaraman an katotoohan, isinugo nin Diyos si Jesus digdi sa daga. Gusto nin Diyos na sunudon ta an mga katukduan ni Jesus.—Mateo 17:5; Juan 18:37.

Hahalion daw nin Diyos an mga kaputikan?

 Iyo. Naaanggot an Diyos sa mga tawo na nagpuputik asin dinadaya an iba para sa kapakinabangan ninda. Nangangako siya na lalaglagon niya an mga tawo na padagos na nagpuputik asin habong magbago. (Salmo 5:6) Pag ginibo na iyan nin Diyos, mauutob man an panuga niya na: “An mga ngabil na pirming nagsasabi nin totoo magdadanay sagkod lamang.”—Talinhaga 12:19.