“Kan aki pa ako, aroaldaw akong kinukulgan ni Kuya, pisikal saka berbal. Kan may agom na ako, iyan man an piggigibo sako kan panugangan kong babayi. Uripon an trato sako kan mga panugangan ko. Naiisip ko pirmi na maghugot.”​—Madhu, a India.

 “An kadahasan sa kababayihan lakop sa kinaban,” an mismong sabi kan World Health Organization. Sa saindang pagkarkulo, haros saro sa tulong babayi an nakaeksperyensiya sa buhay ninda nin pisikal o seksuwal na pang-aabuso.

 Kun nangyari na iyan saimo, tibaad mamati mo na dawa sain ka magduman makakaeksperyensiya ka nin berbal, pisikal o seksuwal na pang-aabuso. Huli sa arog kaiyan na kadahasan saka pagmaltrato dahil sa pagigin babayi, puwedeng maisip mo na an pagmansay kan kadaklan ‘Bakong importante an mga babayi.’ Pero mahalaga daw talaga sa Diyos an mga babayi?

 Teksto: “Linalang [sinda nin Diyos] na lalaki asin babayi.”​—Genesis 1:27.

 Buot sabihon: Linalang nin Diyos an mga lalaki asin an mga babayi. Para saiya, pareho sindang maninigo na tawan nin pagpapahalaga. Saro pa, inaasahan niya sa agom na lalaki na “mamutan an saiyang agom na babayi siring kan pagkamuot niya sa saiyang sadiri,” bako na piriton ining serbihan siya asin kontrulon, lalo na an pagtaram nin makulog o pagmaltrato. (Efeso 5:33; Colosas 3:19) Malinaw nanggad na importante sa Diyos an kapakanan kan mga babayi.

 “Kan aki pa ako, seksuwal akong inabuso kan mga kaparyente ko. Kan 17 anyos ako, tinakot ako kan boss ko na sisisantehon ako kun dai ako makikipag-sex saiya. Kan magin adulto na ako, minimenos ako kan agom ko, kan mga magurang ko, saka kan mga pagtaraid mi. Pero namidbid ko si Jehova, b an satong Kaglalang. May pagpapahalaga siya sa mga babayi. Kaya sigurado ako na namumutan niya ako saka mahalaga ako sa saiya.”​—Maria, Argentina.

 Teksto: “Igwa nin amigo na nagdadanay na mas dayupot pa kisa sa sarong tugang.”​—Talinhaga 18:24.

 Buot sabihon: An sarong tunay na amigo maalalay sa saimo. Kun sa hiling mo matatabangan ka, sabihon an namamati mo sa saro na pinagkakatiwalaan mo.

 “Sa laog nin 20 taon, mayo akong sinabihan na minolestiya ako. Dahil diyan, nagdakula akong bakong maugma, haraditon, saka mayong paglaom. Pero kan nasabi ko an inagihan ko sa saro na handang magdangog, talagang naginhawahan ako.”​—Elif, Türkiye.

 Teksto: ‘Ipasa nindo sa Diyos an gabos nindong kahaditan, huli ta nagmamakulog siya sa saindo.’—1 Pedro 5:7.

 Buot sabihon: Pag namimibi ka, talagang nagdadangog an Diyos. (Salmo 55:22; 65:2) Huling nagmamalasakit siya saimo, matatabangan ka niya na masabutan kun gurano ka kahalaga.

 “Kan mamidbid ko si Jehova, duman ako nakamati nin kaginhawahan sa grabeng kulog na namamatian ko. Ngunyan, nasasabi ko na sa Diyos an gabos na namamati ko paagi sa pamibi. Garo siya sarong amigo na talagang nasasabutan an pagmati ko.”​—Ana, Belize.

 Teksto: ‘Matao si Jehova nin hustisya sa mga mayo nang ama asin sa mga inaapi, tanganing dai na sinda nuarin man magigibong takuton kan tawong mortal sa daga.’​—Salmo 10:​17, 18.

 Buot sabihon: Madali nang tapuson nin Diyos an gabos na inhustisya, kaiba na an grabeng pagmaltrato asin pang-aabuso sa mga babayi.

 “Garo sarong nakakaginhawang bulong sako kan maaraman ko na madali nang tapuson ni Jehova an mga nangyayaring pagmaltrato sa mga babayi saka sa mga aking babayi. Nagtao iyan sako nin katuninungan nin isip.”​—Roberta, Mexico.

 Para sa dagdag na detalye sa kun paano nagtatao an Bibliya nin paglaom, kun taano ta makakapagtiwala ka sa mga panuga kaiyan, asin kun paanong an mga Saksi ni Jehova nag-aalok ngunyan nin tabang na hali sa Bibliya, mag-request na bisitahon ka. Mayo man iyan nin bayad.

 I-download an bersiyon kan artikulong ini na puwedeng i-print.