“An ekonomiya kan kinaban namemeligro na naman,” an patanid kan presidente kan World Bank Group sa sarong report kan Hunyo 2022. “Sa pagkakataon na ini, napapaatubang iyan sa grabeng pagmahal kan mga barakalon asin kakulangan nin panggastos kan mga tawo.”

 “Marikas na luminangkaw an presyo kan krudo asin mga kakanon, na nakaapektar na marhay sa mga nakaistar sa mga tios na nasyon,” an sabi kan International Monetary Fund.

 Tinatabangan kita kan Bibliya na masabutan kun taano ta nakakaeksperyensiya kita nin arog kaining mga problema sa ekonomiya, kun paano ta makakayanan an mga iyan, asin kun ano an permanenteng solusyon na makakatao sa sato nin paglaom.

•   Inaapod kan Bibliya an panahon na kinabubuhayan niyato na “huring mga aldaw.”—2 Timoteo 3:1.

•   Sinabi ni Jesus na magkakaigwa nin “makatatakot na mga tanawon,” o makatatakot na mga pangyayari, sa panahon na ini. (Lucas 21:11) Dahilan nin pagkatakot an grabeng pagmahal kan mga barakalon. Nahahadit an mga tawo sa saindang puturo asin kun paano ninda masusuportaran an saindang pamilya.

•   Ihinula kan libro nin Kapahayagan na malangkaw an mga presyo kan kakanon sa panahon na ini. “Nakadangog ako nin garo tingog . . . na nagsabi, ‘Sarong takad na trigo sana an mababakal kan sarong aldaw na tandan; tolong takad na sebada sana an mababakal kan sarong aldaw na tandan.’”—Kapahayagan 6:6, An Marahay na Bareta Biblia.

 Para mas makanuod pa manungod sa “huring mga aldaw” asin sa propesiya na nasa libro nin Kapahayagan, hilingon an video na An Kinaban Nagbago Puon kan 1914 asin basahon an artikulo na “An Apat na Parakabayo—Siisay Sinda?”

•   “Matugdok sinda nin mga harong asin maistar sa mga iyan, asin magibo sinda nin mga ubasan asin kakakanon an bunga kan mga iyan. Dai sinda matugdok na iba an maistar, ni matanom sinda na iba an makakan.”—Isaias 65:21, 22.

•   “Magkakaigwa nin abundang tipasi sa ibabaw kan daga; masurobra iyan sa alituktok kan kabukidan.”—Salmo 72:16.

•   “‘Huli sa pang-aapi sa mga nasasakitan, huli sa agrangay kan mga dukha, matindog ako tanganing humiro,’ an sabi ni Jehova.”—Salmo 12:5. a

 Sa dai na mahahaloy, tatapuson kan Diyos an bakong patas na sitwasyon sa ekonomiya, bako lang sa sarong nasyon kundi sa bilog na kinaban. Para maaraman kun paano, basahon an artikulo na “Posible Daw an Patas na Sistema nin Ekonomiya?”

 Pero dawa sa ngunyan, puwede kang matabangan kan Bibliya na makayanan an paglangkaw kan mga presyo. Sa paanong paagi? Igwa iyan nin praktikal na mga sadol kun paano magigin madunong sa pagkapot nin kuwarta. (Talinhaga 23:4, 5; Eclesiastes 7:12) Para mas makanuod pa, basahon an artikulong “Ingatan ang Kabuhayan Mo” saka “Paano Ka Makakapag-adjust Kapag Nabawasan ang Iyong Kita?”