May ginigibong mahalagang gibuhon an mga Saksi ni Jehova para tabangan an mga tawo sa labing 200 na kadagaan. Pero mga 35 sana sa mga kadagaan na iyan an nakakaresibi nin lokal na mga donasyon na igo para mataparan an mga gastos ninda. Paano man sa mga lugar na daing gayong kakayahan na magdonar?

 Inaanalisar kan Namamahalang Grupo kan Mga Saksi ni Jehova an espirituwal na mga pangangaipo saka mga aktibidad kan mga kapwa ninda Saksi sa bilog na kinaban. Maingat na binabadyet an mga pondo asin ginagamit sa tamang paagi. Kun sobra sa kinakaipuhan an maresibing pondo nin sarong sangay, itatao an sobra kaiyan sa mga kadagaan na kulang an pondo. Sinusunod kan areglong ini an halimbawa kan inot na mga Kristiyano, na tinabangan an lambang saro paagi sa “pagpantay-pantay.” (2 Corinto 8:14) Ginamit ninda an sobra para tabangan an ibang mga Kristiyano na kinukulang.

 Ano an namatian kan satong mga tugang na nakaresibi nin pondo hali sa ibang mga sangay? Halimbawa, sa Tanzania na diyan labing kabanga kan populasyon an pinagkakanigo sa sarong aldaw an mayo pang duwang dolyar, ginamit an pondong iyan sa pag-renovate kan Kingdom Hall kan Mafinga Congregation. Isinurat kan kongregasyon: “Pagkatapos kan pag-renovate, nagdakul na marhay an attendance mi! Nagpapasalamat talaga kami sa organisasyon nin Jehova saka sa pambilog na kinaban na kasararuan nin magturugang sa pagkabukas-palad ninda, na nagpagin posible, na magkaigwa kami kan magayon na lugar na ini nin pagsamba.”

 May mga tugang kita sa Sri Lanka na nakaeksperyensiya nin kakulangan nin kakanon dahil sa pandemyang COVID-19. Kaiba diyan si Imara Fernando asin an aki niyang lalaking si Enosh. Pero dahil sa mga donasyon hali sa ibang mga kadagaan, nakaresibi sinda kan kinakaipuhan na ayuda. Sa sarong kard na ginibo ninda, isinurat ninda: “Nagpapasalamat kami sa mga tugang na nagpahiling samo nin pagkamuot sa masakit na mga panahon na ini. Maugma talaga kami na parte kami kan pamilyang ini, saka padagos kaming namimibi ki Jehova na tabangan an gabos na tugang ta sa mga huring aldaw na ini.”

 Sain man nakaistar an satong mga tugang, napapahiro sinda na itao kun ano an igwa sinda. Halimbawa, naggibo si Enosh nin sarong sadit na donation box para makapagdonar man siya asin makatabang sa mga pamilyang nangangaipo. Nagpahiling man nin arog kaiyan na pagkabukas-palad si Guadalupe Álvarez. Nakaistar siya sa sarong estado kan Mexico na pipira sana an nakakaresibi nin minimum na suweldo o nin ano man na regular na ganansiya. Pero, nagdodonar siya kan makakaya niya. Isinurat niya: “Nagpapasalamat ako ki Jehova sa karahayan saka sa maimbod na pagkamuot niya. Aram ko na an mga donasyon ko kaiba kan sa mga iba pa, magigin kapaki-pakinabang sa mga tugang na nangangaipo.”

 Nauugma man an mga sangang opisina na magpadara nin kuwarta sa mga lugar na nangangaipo. “Sa laog nin dakul na taon, kinaipuhan an pinansiyal na suporta kan ibang mga nasyon para sa gibuhon sa samong nasyon,” an sabi ni Anthony Carvalho, na naglilingkod sa Komite kan Sangay sa Brazil. “An tabang na ini nagresulta sa pambihirang pag-uswag. Ngunyan, nagbago na an kamugtakan mi sa pinansiyal, asin igwa kami kan pribilehiyong magtabang sa iba. Interesadong marhay an mga tugang digdi sa paghuhulit na ginigibo sa bilog na kinaban asin naghahanap sinda nin mga paagi kun paano ninda magigibo ngunyan an papel ninda bilang mapagsakripisyong mga disipulo ni Jesus.”

 Ano an pinakamarahay na paagi na masusuportaran kan mga Saksi ni Jehova an mga tugang nindang nangangaipo? Bako paagi sa direktang pagpadara nin kuwarta sa mga sangang opisina sa ibang nasyon, kundi paagi sa pagdonar sa pambilog na kinaban na gibuhon. Magigibo ini paagi sa pagdonar sa kahon nin kontribusyon sa kongregasyon na may nakasurat na “Worldwide Work” o sa donate.dan124.com. Pinapahalagahan na marhay an mga donasyon na iyan.