Ihinula kan Bibliya na “an nasyon makikilaban sa nasyon” asin na magkakaigwa nin mga kalamidad sa “pagtatapos kan sistema nin mga bagay.” (Mateo 24:3, 7) An propetikong mga tataramon na ini nahiling niyatong nauutob kan 2023 na taon nin paglilingkod. a Pero sa ibong kan nangyayaring mga giyera asin mga kalamidad sa haros 100 na kadagaan, inaarog kan mga Saksi ni Jehova an pagkamuot ni Jehova. Paano?

 Kan 2023 na taon nin paglilingkod, an satong mga tugang naapektaran nin labing 200 na natural na mga kalamidad o mga kalamidad na kagigibuhan nin tawo. Sa kabilugan, an legal na mga korporasyon na ginagamit kan Mga Saksi ni Jehova nakagastos nin labing diyes milyon na dolyar b hali sa pondong idinonar sa pambilog na kinaban na gibuhon para magtao nin ayuda. Apuwera pa ini sa personal na ginastos kan mga tugang para tabangan an mga nangangaipo sa saindang lugar. Aramon kun paano ginamit an saindong mga donasyon para tabangan an mga biktima kan duwa sana sa dakul na kalamidad na nakaapektar sa satong mga tugang.

 An nagkapirang rehiyon sa Nigeria, sa pana-panahon nakakaeksperyensiya nin pagbaha. Pero, su pagbaha kan Oktubre 2022 iyo an pinakagrabeng naeksperyensiyahan kan nasyon sa nag-aging sampulong taon. Labing 676,000 na ektarya nin kaumahan an nadestroso, asin labing duwang milyon katawo an nag-ebakwar. Tulos na nagbilog an sangang opisina sa Nigeria nin mga Disaster Relief Committee para mag-organisar nin mga pag-ayuda asin tabangan sa espirituwal an mga tugang.

•   7,505 mga parahayag an nag-ebakwar

•   860 harong an naraot o nagaba

•   90 mga Kingdom Hall asin sarong Assembly Hall an binaha

 Labing 250,000 na dolyar an nagastos sa pag-ayuda, kaiba an:

•   Mga pagkakan arog nin bagas, beans, saka noodles

•   Mga gamit sa harong arog nin mga kutson asin muskitero o kubong

•   Paghirahay o pagtugdok giraray kan mga harong na naraot

 Paano sinigurado kan satong mga tugang na nagamit sa madunong na paagi an mga donasyon? An sarong paagi iyo an maingat na pag-ebalwar sa kada edipisyo para maaraman kun puwede iyan hirahayon. Kun an sarong edipisyo kaipuhan nang salidahan, itinutugdok iyan na may simpleng disenyo na komun sa lugar na iyan.

 Talagang nagpapasalamat an satong mga tugang na nag-ako nin tabang. Sarong sister an nagsabi: “Binagong marhay kan baha an buhay mi huling rinaot kaiyan an samong mga uma saka nawaran kami nin harong. Naggian su pagmati mi kan mag-abot an mga tugang kan mismong aldaw man sanang idto para tabangan kami saka tawan nin ligtas na madadagusan. Dakulang pagpapasalamat mi pa kan maresibi mi an mga kakanon na ipinadara kan sangang opisina. Napahanga kami kan mahiling mi mismo an kautuban kan Juan 13:34, 35 sa samong buhay. . . . Igwa talaga nin tunay na pagkamuot. Ako saka an sakong bilog na pamilya, bilog na pusong nagpapasalamat sa mga tugang na nagtabang samo kan panahon na kaipuhan mi talaga nin tabang.”

 Narisa kan iba sa komunidad an satong gibuhon na pag-ayuda. Sarong kapitan sa komunidad kan Sabagreia, Bayelsa State, an nagkomento: “Kadakul nin organisasyon o relihiyon sa kinaban, pero Mga Saksi ni Jehova sana an naggibo nin arog kaini. . . . An [saindong] organisasyon an saro sa pinakamarahay sa kinaban.”

 Kan Pebrero 2023, labing 400 na kasulo an nagkawsa nin grabeng destroso sa Chile. Labing 430,000 na ektarya nin daga, kaiba an importanteng mga imprastraktura na pinagkukuanan nin kabuhayan sa Chile, an naraot. Mga 8,000 katawo an nag-ebakwar. Pagkatapos tulos kan kalamidad, an sangang opisina nag-organisar nin gibuhon na pag-ayuda.

•   222 na mga parahayag an nag-ebakwar

•   20 harong an nagaba

 Labing 200,000 na dolyar an nagastos sa pag-ayuda, kaiba an:

•   Kakanon asin tubig

•   Gasolina, mga gamit sa paglinig, asin mga bulong

•   Pagtugdok giraray kan naraot na mga harong

 Sarong pamilya an nabigla kan maaraman nindang nawara an gabos na pagsadiri ninda, kaiba an saindang harong saka negosyo. Dahil diyan, nawaran sinda nin pagbuhay. Kan inot na mga aldaw, makulugon na marhay sa buot kan pamilya na mahiling an bakanteng lote kun sain dating nakatugdok an saindang harong. Pero kan mahiling nindang pigtutugdok giraray an saindang harong, nagpuon na magmaray an pagmati ninda. Nakatabang man sainda an grabeng pagkamuot asin pagpadangat sa sainda kan mga boluntaryo. Napakusog na marhay an pamilya dahil sa eksperyensiyang ini, kaya sinda man nagboluntaryo asin nagtabang sa pagtugdok giraray kan harong kan saro pang tugang.

 Dakul sa satong mga tugang an napahanga sa gibuhon na pag-ayuda. Sarong brother an nagsabi: “Kahanga-hangang marhay an probisyon ni Jehova na pagkaigwa nin mga Disaster Relief Committee. Sarong aldaw pagkatapos kan trahedya, yaon na tulos sinda para maitao an mga kaipuhan. Nakakapakusog pag nakakabasa nin manungod sa mga pag-ayuda na ginigibo sa iba-ibang parte sa kinaban. Pero ibang-iba palan pag nangyari na mismo iyan saimo. Mas papahalagahan mo an organisasyon; mas mahihiling mo kun paano inaarog kan mga tugang an mga kuwalidad ni Jehova; asin mas mamamati mo na talagang iniisip ninda an materyal, espirituwal, saka emosyonal na mga pangangaipo mi. Namati mi mismo an pagkamuot ni Jehova.”

 Mantang madali nang matapos an sistemang ini, padagos tang mahihiling an pagdakul nin mga kalamidad. (Lucas 21:10, 11) Dawa arog kaiyan, paagi sa Kristiyanong kongregasyon, mapapatunayan ta man na kaibanan ta an satong mamumuton na Hadi, si Cristo Jesus, “sa gabos na aldaw sagkod sa pagtatapos kan sistema nin mga bagay.” (Mateo 28:20) An saindong bukas-palad na mga donasyon sa pambilog na kinaban na gibuhon paagi sa donate.dan124.com asin sa iba pang mga paagi, kaiba an saindong itinataong panahon asin kusog, nagpapahiling na sinusuportaran nindo an Kahadian asin an mamumuton na Hadi kaiyan. Salamat sa saindong padagos na pagigin bukas-palad.