Kan Marso 2020, kan ideklarar kan World Health Organization na saro nang pandemya an COVID-19, dai hunaon kan dakul na pakalihis nin labing sarong taon apektado pa man giraray kan virus na ini an bilog na kinaban. Minilyon na mga tawo, kaiba na an ibang mga Saksi ni Jehova, an nagsakit sa pisikal, emosyonal, asin pinansiyal dahil sa epekto kan pandemya. Paano inorganisar kan mga Saksi ni Jehova an pagtao nin mga ayuda sa masakit na panahon na ini?

 Sa panginginot kan Coordinators’ Committee kan Namamahalang Grupo kan Mga Saksi ni Jehova, nagbilog nin labing 950 Disaster Relief Committee (DRC) sa bilog na kinaban para tumabang sa mga tugang sa panahon kan COVID-19. Sa nagkapirang sitwasyon, iinareglar ninda na matabangan kan mga tugang an saindang mga kapagtubod, asin sa iba man na sitwasyon, nag-ako an mga Saksi nin tabang hali sa gobyerno. Nag-organisar man an mga DRC nin pagtao nin ayuda sa dakul na mga tugang.

 Sarong halimbawa kaiyan an sitwasyon sa Paraguay. Ibinareta sa sarong diyaryo na dahil sa epekto kan pandemya sa ekonomiya, “dakul na mga taga Paraguay an mayo na nin igong kakanon sa saindang mga harong.” Pero an DRC sa Paraguay nakapuon nang magtao nin ayuda na igo para sa duwang semana—igwang kakanon, mga panglinig, asin mga gamit para sa personal hygiene na igo sa sarong pamilya na may apat na miyembro. An kantidad kan kada pack nin ayuda mga 30 dolyar (U.S.).

 Paano iniingatan kan mga nagboboluntaryo an saindang sadiri saka an iba na dai maulakitan kan COVID-19? Nagsusulot sinda nin mask saka nagsusunod sa physical distancing. Sinisigurado man ninda na an mga kompanya na nagsusuplay nin kakanon malinig an mga pasilidad asin istriktong nagsusunod sa mga safety protocol. Kaiba digdi an pagsigurado na an gabos na nagpepreparar kan pack nakasulot nin personal protective equipment asin malinig saka na-disinfect an saindang mga awto saka an lugar na pigsasarayan kan mga ayuda. Sinusunod man kan mga naghahatod kan mga ayuda an physical distancing mantang itinatao ninda iyan sa mga tugang.

 Pag-abot kan Enero 2021, labi nang 25 milyon na dolyar (U.S.) an naaprubaran kan Coordinators’ Committee na gamiton para sa pag-ayuda sa panahon kan COVID-19 na pandemya. Maingat na ginamit kan mga sangang opisina saka kan mga DRC an mga donasyon na ini, asin hininguwa ninda na mabakal sa baratong presyo an mga kaipuhan. Halimbawa, sa Chile, gusto kan mga brother na nag-oorganisar kan pag-ayuda na magbakal nin 750 kilo nin lentehas. Pero sa laog sana nin sarong bulan, nadoble an presyo kaiyan! Duwang oras pagkatapos nindang magtugot na bakalon an mga lentehas sa mas halangkaw na presyo, sinabi sainda kan paratinda na may parabakal na nag-uli kan binakal kaining mga lentehas. Kaya imbes na ipabakal iyan sa mas halangkaw na presyo na napagkasunduan ninda, ipinabakal niya sa satong mga tugang an inuling mga lentehas sa dating presyo kaiyan sa nakaaging bulan!

 Pero kan kukuanon na kan mga brother an mga lentehas, habo nang ipabakal iyan sa sainda kan paratinda, asin sinahutan sinda kaini na bakong patas an ginigibo nindang pagtao nin mga kakanon, arog kan ibang mga organisasyon. Pagkatapos nin halipot na silensiyong pamibi, sinabi kan saro sa mga brother sa paratinda na sinurbey na an kada kongregasyon tangani na maaraman kun sairisay an talagang nangangaipo. Ipinaliwanag man kan mga brother na huling iba-iba an pinaghalian kan mga tatawan nin ayuda, iba-iba man an laog kan kada pack nin ayuda depende sa kun ano an pinakakaipuhan kan pamilyang tatawan kaiyan. Inasigurar man ninda sa paratinda na an kuwartang ginagamit sa pagtao nin mga ayuda para sa mga Saksi ni Jehova hali sa mga donasyon asin an mga nagtatabang sa pagtao nin ayuda mga boluntaryo man. Napahanga siya. Kaya dai niya lang binawasan an presyo kan mga lentehas kundi nagdonar man siya nin 400 na kilo kaiyan sa sunod nindang pagbakal.

 Si Lusu, sarong may edad nang balo, nakaistar sa Liberia kaiba kan lima niyang kapamilya. Sarong aga, mantang namamahaw asin pinag-uulayan an teksto para sa aldaw, narisa kan siyete anyos na makuapo ni Lusu na mayo na sindang kakanon. Naghapot ini, “Ano na po an kakakanon ta?” Sinabi saiya ni Lusu na namibi na siya asin nagtitiwala siya na itatao ni Jehova an mga pangangaipo ninda. Kan hapon man sanang idto, inapudan si Lusu kan mga elder para kuanon an mga ayuda para sainda. Inistorya niya: “Sinabi kan makuapo ko na aram niya na ngunyan na dinadangog asin sinisimbag ni Jehova an mga pamibi dahil sinimbag ni Jehova an pamibi ko.”

 Sarong babayi sa Democratic Republic of Congo an nakaistar sa kataid nin sarong pamilyang Saksi. Kan mahiling niya na an pamilya tinawan nin kakanon kan mga kapagtubod kaini, sinabi niya, “Pagkatapos kan pandemya, magigin Saksi ni Jehova na man kita ta pigmamalasakitan ninda an saindang mga tugang sa masakit na panahon na ini.” Hinapot siya kan agom niya, “Ma-Saksi ka dahil sana sa sarong sakong bagas?” Nagsimbag siya, “Siyempre dai, pero an sako nin bagas na idto pruweba nin tunay na pagkamuot.”

 An mga Saksi ni Jehova nakakatao tulos nin tabang sa satong mga tugang sa panahon na ini nin pandemya huli sa saindong bukas-palad na mga donasyon. Salamat sa mga donasyon na itinao nindo gamit an mga paagi nin pagdonar na yaon sa donate.dan124.com.