Imbes na awtomatikong ipreso an mga Saksi ni Jehova na nagsasayumang magserbi sa militar huli sa konsiyensiya, urog na naghahanap nin mga paagi an mga huwes sa South Korea para matabangan sinda sa saindang sitwasyon. May mga huwes na kinokonsiderar an pinakamotibo kan mga lalaking ini—an paninindugan kan saindang konsiyensiya na basado sa maka-Kasuratan na mga prinsipyo na dai kulgan an iba. * Kaya sa pagkonsiderar sa pundamental na deretso sa katalingkasan na magdesisyon basado sa konsiyensiya, may mga korte na nagdesisyon na an hoben na mga lalaking ini dai nagkasala nin pagdulag sa pagserbi sa militar. Puon Mayo 2015, an mga huwes sa korte sa pagbista nagpaluwas na nin 66 na hatol na “daing sala” apabor sa mga Saksi na nagsayuma huli sa konsiyensiya—pambihirang pagdakul iyan kumpara sa 4 sanang hatol na arog kaiyan sa nakaaging mga dekada.

Kan Pebrero 1, 2018, may pambihirang marhay na nangyari. Sinuportaran kan sarong korte de apelasyon sa Busan an saro sa mga desisyon na ini na “daing sala,” na binabaliwala an paninindugan kan Korte Suprema asin kan Konstitusyonal na Korte dapit sa isyung ini. Pambihirang marhay an desisyon na ini huli sa duwang partikular na dahilan—konserbatibo an Distrito nin Busan, asin an huwes na nanginginot kan kasong ini, si Jong-du Choi, nagpaluwas na dati nin desisyon na nagkasala an sarong nagsayuma huli sa konsiyensiya.

An panel na kompuwesto nin tulong huwes nagpokus sa konstitusyonal na obligasyon kan South Korea na magsunod sa inuyunan kan nasyon na internasyonal na mga ley—sa kasong ini, an International Covenant on Civil and Political Rights (Covenant) na minimidbid an deretsong magsayuma huli sa konsiyensiya. Ipinaliwanag kan korte na “an pagpadusa paagi sa pagpreso sa mga nagsasayuma huli sa konsiyensiya sarungat sa artikulo 18 kan Covenant, kun siring, . . . angay sanang sabuton na an pagsayuma na magserbi sa militar huli sa konsiyensiya sarong ‘makatanusan na basehan’” sa pagsayumang maglaog sa militar. Napabaretang marhay an desisyon na ini asin dakul na nagsusubaybay an naniniwalang magigin marahay an epekto kaini sa kaisipan kan mga abogado sa nasyon.

Kaidto, may average na 500-600 na hoben na lalaki kada taon an sinesentensiyahan kan mga huwes na mapreso huli sa isyung ini, pero ngunyan dakul na huwes an pig-aatraso an pagbista. An bilang kan mga dai pa nadedesisyunan na kaso labi nang 700 ngunyan, asin padagos pa iyan na nagdadakul mantang hinahalat kan mga huwes an magigin desisyon kan Konstitusyonal na Korte. Kan Disyembre 31, 2017, igwa na sana nin 267 lalaking Saksi na nakapreso—an pinakahababang bilang sa nakalihis na sampulong taon.

Dedeterminaran kan Konstitusyonal na Korte kun baga dapat na iaplikar sa mga nagsasayuma huli sa konsiyensiya an kondisyon sa Military Service Act na padusahan an mga nagsasayumang magsuldados o kun protektado sinda kan konstitusyonal na deretso sa katalingkasan na magdesisyon basado sa konsiyensiya kauyon kan internasyonal na mga pamantayan. Dakul sa South Korea an naglalaom sa Korte na makahanap nin solusyon na magtataong dignidad sa hoben na mga lalaki na andam na magsagibo nin alternatibong paglilingkod na dai kontra sa saindang konsiyensiya asin na kapaki-pakinabang sa komunidad.

Kun magdesisyon an Korte apabor sa mga nagsasayuma huli sa konsiyensiya, magigin kauyon an South Korea sa desisyon kan UN Human Rights Committee sa ginatos na indibidwal na kaso. Nangapudan an Committee na ipundo na kan South Korea an pagpreso sa mga nagsasayuma huli sa konsiyensiya asin na igalang an saindang pundamental na deretso sa katalingkasan na magdesisyon basado sa konsiyensiya.