Komportable an buhay ni Madian asin Marcela sa Medellín, Colombia. Halangkaw an suweldo ni Madian sa trabaho niya, kaya nakaistar sinda sa sarong magayon na apartment. Pero may sarong pangyayari na nagin dahilan na pag-isipan ninda an saindang mga priyoridad bilang mga lingkod kan Diyos na Jehova. “Kan 2006, nag-atender kami sa ‘Papagdanayon na Simple an Saindong Mata’ na espesyal na asembleya. Idinuon sa kadaklan sa mga pahayag na kaipuhan tang pasimplehon an satong buhay para mas makapaglingkod nin lubos sa Diyos,” an sabi ninda. “Kan papuli na kami haling asembleya, napag-isip-isip mi na an kabaliktaran mismo an ginigibo mi. Bakal sana kaming bakal kaya dakulaon na an samong utang.”

 Dahil sa nakakapahirong pangyayaring iyan, nagdesisyon si Madian asin Marcela na punan na pasimplehon an saindang buhay. “Pinunan ming bawasan an samong mga gastos,” an sabi ninda. “Naglipat kami sa mas sadit na apartment, ipinabakal mi su awto mi, saka nagbakal nin motorsiklo.” Dugang pa, dai na sinda nagmo-mall para dai sinda matentaran na magbakal nin mga gamit. Mas parati na sindang nakikipag-ulay sa mga kataraid ninda manungod sa Bibliya. Asin nakiiba-iba sinda sa mga amigo saka amiga ninda na maigot na naglilingkod sa Diyos na Jehova bilang mga espesyal payunir. a

 Dai nahaloy, nagdesisyon si Madian saka Marcela na pahiwason pa an saindang ministeryo paagi sa pagbalyo sa sarong sadit na kongregasyon na nangangaipo nin tabang, sa sarong puwerang lugar. Tanganing magibo iyan, nag-resign si Madian sa saiyang trabaho. Dai masabutan kan saiyang superbisor kun taano ta ma-resign siya. Kaya nagpaliwanag si Madian paagi sa paghapot: “Naggaganar ka po nin dakul na kuwarta, pero maugma daw po kamo?” Inadmitir kan superbisor na bako siyang maugma, huling dakulon siyang problema na dai niya masolusyunan. Dangan sinabi ni Madian saiya: “Kaya an kaugmahan po dai man talaga nakadepende sa kun gurano kadakula kan ginaganar mo, kundi sa kun ano an nakakapaugma sa saimo. An pagtukdo sa mga tawo manungod sa Diyos iyo po an nakakapaugma samo ni agom, asin gusto mi na magin mas maugma pa paagi sa pagtao nin mas dakul na panahon sa gibuhon na iyan.”

 Nagin tunay na kontento asin maugma si Madian asin Marcela huling hininguwa nindang mag-abot nin espirituwal na mga pasuhan. Sa nag-aging 13 taon, naglingkod sinda sa mga kongregasyon na dakula an pangangaipo, sa norteng-sulnupan na parte kan Colombia. Asin ngunyan, naglilingkod sinda bilang mga espesyal payunir.