An kasalan iyo an ano man na paggawi, pagmati, o kaisipan na kontra sa mga pamantayan nin Diyos. Kaiba diyan an pagbalga sa mga pagbuot nin Diyos paagi sa paggibo nin sala, o bakong matanos, sa paghiling nin Diyos. (1 Juan 3:4; 5:17) May sinasabi man sa Bibliya na kasalan nin dai paggibo—buot sabihon, dai paggibo kan tama.—Santiago 4:17.

 Sa orihinal na mga lengguwahe kan Bibliya, an tataramon para sa kasalan nangangahulugan na “sumalto sa marka,” o sa target. Halimbawa, sarong grupo nin mga suldados sa suanoy na Israel an ekspertong marhay sa paglagpitaw nin mga gapo mala ngani ta sinda “dai lamang nagsasalto.” An mga tataramon na iyan, kun literal na itatradusir, puwedeng basahon na “dai lamang nagkakasala.” (Hukom 20:16) Kaya an paggibo nin kasalan iyo an pagsalto sa marka kan perpektong mga pamantayan nin Diyos.

 Bilang an Kaglalang, may deretso an Diyos na magtao nin mga pamantayan para sa mga tawo. (Kapahayagan 4:11) Maninimbag kita saiya sa mga ginigibo niyato.—Roma 14:12.

Posible daw na dai lamang kita magkasala?

 Dai. Sinasabi kan Bibliya na “an gabos nagkasala saka dai nakaabot sa kamurawayan nin Diyos.” (Roma 3:23; 1 Hadi 8:46; Eclesiastes 7:20; 1 Juan 1:8) Taano?

 An inot na mga tawo, si Adan saka si Eva, mayong kasalan kan primero. Linalang kaya sinda na perpekto, uyon sa ladawan nin Diyos. (Genesis 1:27) Pero, naiwara ninda an saindang pagigin perpekto kan suwayon ninda an Diyos. (Genesis 3:5, 6, 17-19) Kan magkaaki sinda, naipasa ninda an kasalan asin an pagigin bakong perpekto bilang namamanang mga depekto. (Roma 5:12) Arog kan sinabi ni Hading David kan Israel, “ipinangaki ako na may sála.”—Salmo 51:5.

May mga kasalan daw na mas magabat kisa sa iba?

 Igwa. Halimbawa, sinasabi kan Bibliya na an mga tawo kan suanoy na Sodoma “marauton asin makasalanon” na an mga kasalan “magabaton.” (Genesis 13:13; 18:20) Pag-isipan an tulong bagay na nagdedeterminar kun gurano kagrabe o kagabat an kasalan.

1.   Gabat. Pinapatanidan kita kan Bibliya na likayan an magabat na mga kasalan na arog kan seksuwal na imoralidad, idolatriya, paghabon, pagburat, pangingikil, paggadan, asin espiritismo. (1 Corinto 6:9-11; Kapahayagan 21:8) May sinasabi man an Bibliya na mga kasalan na dai pinag-isipan asin dai tinutuyo, halimbawa, mga tataramon o paggawi na nakakakulog sa iba. (Talinhaga 12:18; Efeso 4:31, 32) Dawa arog kaiyan, dinadagka kita kan Bibliya na dai pagbaliwalaon an ano man na kasalan, huling puwede iyan na magin dahilan na makagibo kita nin mas magabat na mga kasalan.—Mateo 5:27, 28.

2.   Motibo. May mga kasalan na nagigibo dahil sa kawaran nin aram sa mga kahagadan nin Diyos. (Gibo 17:30; 1 Timoteo 1:13) Dai man kinukunsinti an arog kaiyan na mga kasalan, pero ipinapahiling kan Bibliya na iba iyan sa mga kasalan na kalabot an tuyong pagbalga sa mga pagbuot nin Diyos. (Bilang 15:30, 31) An tuyong mga kasalan hali sa “maraot na puso.”—Jeremias 16:12.

3.   Kun pirang beses. Sa Bibliya, magkaiba man an kasalan na nagibo nin minsan asin an pauruutrong paggibo nin kasalan sa laog nin halawig na panahon. (1 Juan 3:4-8) An mga “padagos [na] tuyong nagsasagibo nin kasalan,” dawa aram na ninda an tama, huhukuman nin Diyos.—Hebreo 10:26, 27.

 An mga nakagibo nin magabat na kasalan puwedeng makonsiyensiyang marhay huli sa gabat kan kasalan ninda. Halimbawa, si Hading David nagsurat: “An mga sála ko lampas na sa sakong payo; siring sa magabat na pasan, magabaton na iyan para makaya ko.” (Salmo 38:4) Alagad ini an paglaom na itinatao kan Bibliya: “Bayaan kan maraot na tawo an saiyang dalan asin kan paragibo nin maraot an saiyang mga kaisipan; magbalik siya ki Jehova, na mahihirak sa saiya, sa satuyang Diyos, huling bulaos siyang magpapatawad.”—Isaias 55:7.