Siisay an mga Mapalangit?
An simbag kan Bibliya
Nagpili an Diyos nin limitadong bilang nin maimbod na mga Kristiyano, na pagkagadan ninda, bubuhayon liwat para mag-istar sa langit. (1 Pedro 1:3, 4) Pag napili na sinda, dapat na padagos nindang pagdanayon na makusog an saindang Kristiyanong pagtubod asin pagdanayon an malinig na paggawi tanganing dai sinda madiskuwalipikar na mag-ako kan saindang langitnon na mana.—Efeso 5:5; Filipos 3:12-14.
Ano an gigibuhon sa langit kan mga mapasiring diyan?
Maglilingkod sinda kaiba ni Jesus bilang mga hadi asin saserdote sa laog nin 1,000 taon. (Kapahayagan 5:9, 10; 20:6) Sinda an makompuwesto sa “bagong mga langit,” o langitnon na gobyerno, na mamamahala sa “bagong daga,” o sosyedad nin mga tawo. An langitnon na mga tagapamahalang iyan matabang na maibalik an katawuhan sa matanos na mga kamugtakan na iyo an orihinal na katuyuhan nin Diyos.—Isaias 65:17; 2 Pedro 3:13.
Pira an mga bubuhayon liwat pasiring sa langit?
Ipinaparisa kan Bibliya na 144,000 katawo an bubuhayon liwat para mag-istar sa langit. (Kapahayagan 7:4) Sa bisyon na isinurat sa Kapahayagan 14:1-3, nahiling ni apostol Juan “an Kordero na nakatindog sa Bukid nin Sion, asin kaibanan niya an 144,000.” Sa bisyon, “an Kordero” nagrerepresentar sa binuhay liwat na si Jesus. (Juan 1:29; 1 Pedro 1:19) An “Bukid nin Sion” nagrerepresentar sa ilinangkaw na posisyon ni Jesus asin kan 144,000 na mamamahala kaiba niya sa langit.—Salmo 2:6; Hebreo 12:22.
An “mga inapod asin mga pinili” na mamahala kaiba ni Cristo sa Kahadian inaapod na “sadit na aripumpon.” (Kapahayagan 17:14; Lucas 12:32) Ipinapahiling kaiyan na dikit sana sinda kumpara sa kumpletong bilang kan mga karnero ni Jesus.—Juan 10:16.
Mga salang ideya manungod sa mga mapalangit
Salang ideya: An gabos na marahay na tawo mapalangit.
An totoo: Nanunuga an Diyos na tatawan niya nin buhay na daing katapusan digdi sa daga an kadaklan na marahay na tawo.—Salmo 37:11, 29, 34.
Sinabi ni Jesus: “Mayo nin tawong nagsakat sa langit.” (Juan 3:13) Kaya ipinahiling niya na an marahay na mga tawo na nagadan bago siya, arog ni Abraham, Moises, Job, asin David, dai nagpasiring sa langit. (Gibo 2:29, 34) Imbes, igwa sinda kan paglaom na buhayon liwat para mag-istar digdi sa daga.—Job 14:13-15.
An pagkabuhay liwat para mag-istar sa langit inaapod na “inot na pagkabuhay liwat.” (Kapahayagan 20:6) Ipinaparisa kaiyan na magkakaigwa nin saro pang pagkabuhay liwat. Asin gigibuhon iyan digdi sa daga.
Itinutukdo kan Bibliya na sa irarom kan pamamahala kan Kahadian nin Diyos, “an kagadanan mawawara na.” (Kapahayagan 21:3, 4) An panugang ini siguradong nanunungod sa daga, huling nungkang nagkaigwa nin kagadanan sa langit.
Salang ideya: An lambang tawo an mapili kun baga an makakamtan niya buhay sa langit o sa daga.
An totoo: An Diyos an nagdedeterminar kun sairisay na maimbod na mga Kristiyano an magkakamit kan “premyong pag-apod nin Diyos para sa langitnon na buhay.” (Filipos 3:14) An personal na pagmawot o ambisyon nin saro mayong epekto sa kun baga pipilion siya o dai.—Mateo 20:20-23.
Salang ideya: An buhay na daing katapusan sa daga sarong mas hababang klase nin paglaom, na itinatao sana sa mga bakong maninigong magpasiring sa langit.
An totoo: An mga magkakamit nin buhay na daing katapusan sa daga inapod nin Diyos na “sakuyang banwaan,” “sakuyang mga pinili,” asin “mga binendisyunan ni Jehova.” (Isaias 65:21-23) Magkakaigwa sinda kan pribilehiyong utubon an orihinal na katuyuhan nin Diyos para sa katawuhan—an mabuhay nin perpekto asin daing katapusan sa dagang paraiso.—Genesis 1:28; Salmo 115:16; Isaias 45:18.
Salang ideya: An bilang na 144,000 na sinambit sa Kapahayagan simboliko, bakong literal.
An totoo: Dawa igwa nin simbolikong mga bilang, o numero, sa Kapahayagan, an nagkapira sa mga iyan literal an kahulugan. Halimbawa, may sinambit iyan na “12 pangaran kan 12 apostol kan Kordero.” (Kapahayagan 21:14) Pag-isipan an patunay kun taano ta an bilang na 144,000 literal man.
Sinambit kan Kapahayagan 7:4 “an bilang kan mga tinatakan [o, kumpirmadong mabuhay sa langit], 144,000.” Kun hihilingon an konteksto kan bersikulong ini, may ikaduwang grupo na pigkumparar sa nainot: “sarong dakulang kadaklan, na dai kayang bilangon nin siisay man na tawo.” An mga kabilang sa dakulang kadaklan ilinigtas man nin Diyos. (Kapahayagan 7:9, 10) Kun an bilang na 144,000 simboliko, na nanunungod sa sarong grupo na mayong bilang, mawawaran nin saysay an pagkakalain kan duwang grupo. a
Apuwera kaiyan, an 144,000 ilinadawan na “binakal . . . hali sa katawuhan bilang mga inot na bunga.” (Kapahayagan 14:4) An mga tataramon na “mga inot na bunga” nanunungod sa sarong sadit asin piling kabtang kan grupo. Angay sanang ilinaladawan kaiyan an mga makakaibanan ni Cristo sa langit para pamahalaan an mayong depinidong bilang nin mga tawo digdi sa daga.—Kapahayagan 5:10.
a Kaagid kaiyan, isinurat ni Professor Robert L. Thomas manungod sa bilang na 144,000 na sinambit sa Kapahayagan 7:4: “Depinidong bilang iyan bakong arog kan bilang na sinambit sa 7:9. Kun sasabuton iyan na simboliko, mayo nang numero sa libro na puwedeng sabuton na literal.”—Revelation 1-7: An Exegetical Commentary, pahina 474.
Puwede Mo Man Magustuhan
MAHALAGANG MGA TUKDO KAN BIBLIYA
Ano an Kahadian nin Diyos?
Sa bilog na ministeryo ni Jesus, mas ipinakipag-ulay niya an dapit sa Kahadian nin Diyos kisa sa iba pang tema. Dakul na taon nang ipinapamibi kan mga tawo na lugod dumatong na an Kahadian na iyan.
PALIWANAG SA MGA BERSIKULO SA BIBLIYA
Paliwanag sa Kapahayagan 21:1—“An Sarong Bagong Langit Asin an Sarong Bagong Daga”
Paano makakatabang sa sato an Bibliya para mas masabutan ta an kahulugan kan bersikulong ini?
TUKDO KAN BIBLIYA
Purbaran an Samong Pag-adal sa Bibliya
Akuon an daing bayad na interactive na pag-adal sa Bibliya na may personal na matukdo saimo.