Sinasabi kan Bibliya na kabutan nin Diyos na an mga tawo “maglikay sa seksuwal na imoralidad.” (1 Tesalonica 4:3) Sa Bibliya, kaiba sa terminong “seksuwal na imoralidad” an pagsambay, homoseksuwal na mga gibo, asin pag-sex nin sarong lalaki asin babayi na bakong kasal.

•  Taano ta mahalaga sa Diyos kun baga kasal o bako an sarong lalaki asin babayi na nag-iibanan?

•  Kumusta man an pag-live-in nguna nin lalaki asin babayi bago magpakasal para matesting kun baga bagay talaga sinda sa kada saro?

•  Paano magigin makusog an relasyon nin mag-agom?

•   An areglo nin pag-aguman hali sa Diyos. Pinunan niya iyan kan darahon niya an inot na babayi sa inot na lalaki para ikasal. (Genesis 2:22-24) Bako niyang katuyuhan na an sarong lalaki asin babayi mag-live-in, o mag-ibanan na bakong kasal.

•   Aram nin Diyos kun ano an pinakaikakarahay kan mga tawo. Ginibo niya an pag-aguman na magin permanenteng pag-ibanan nin sarong lalaki asin babayi para sa ikakarahay asin proteksiyon kan gabos na miyembro kan pamilya. Pag-isipan an sarong simpleng ilustrasyon. Kun paanong ipinapahiling kan manwal hali sa manufacturer kun paano bibilugon nin tama an sarong kabinet, sinasabi man sato kan mga instruksiyon nin Diyos kun paano kita magkakaigwa nin maugmang pamilya. An mga pamantayan nin Diyos pirming kapaki-pakinabang sa mga nagsusunod diyan.—Isaias 48:17, 18.

•   An pag-sex nin duwang tawong bakong kasal puwedeng magkaigwa nin maraot na mga konsekwensiya. Halimbawa, puwede iyan magresulta sa dai ginustong pagbados, mga hilang na ikinakaulakit paagi sa pakikipag-sex, asin grabeng kapurisawan.

•   Tinawan nin Diyos an mga lalaki asin mga babayi kan kakayahan na magpadakul paagi sa sex. Para sa Diyos, sagrado an buhay, asin an kakayahan na magpadakul sarong mahalagang marhay na regalo. Gusto nin Diyos na igalang ta an regalong iyan paagi sa pagtaong onra sa areglo nin pag-aguman.—Hebreo 13:4.

 An sekreto para magkaigwa nin maugma asin mapangganang buhay may agom bako an pagkaigwa nguna nin “trial period” na sa panahon na iyan libreng sumuway an siisay man sa duwang nag-iibanan. Imbes, para magdanay na makusog an relasyon ninda, kaipuhan na may commitment sinda sa kada saro asin nagtitinabangan para maresolberan an mga problema. a Kun may commitment, nagkukusog an pag-ibanan kan mag-agom.—Mateo 19:6.

 Mayong perpektong relasyon nin mag-agom. Dawa arog kaiyan, puwedeng magkaigwa an mga mag-agom nin maugma asin mapangganang pag-ibanan paagi sa pagsabuhay kan sadol kan Bibliya. Uni an nagkapirang halimbawa:

•   Inuton an mga pangangaipo kan saimong agom kisa kan saimo.—1 Corinto 7:3-5; Filipos 2:3, 4.

•   Kamutan asin igalang an lambang saro.—Efeso 5:25, 33.

•   Mag-isip nguna bago magtaram.—Talinhaga 12:18.

•   Magin mapasensiya asin madaling magpatawad.—Colosas 3:13, 14.