Gabos na tawo may pangaran. Bako daw na rasonable sanang may pangaran man an Diyos? Kun gusto mong magin amigo an sarong tawo, mahalagang marhay na maaraman mo an pangaran niya asin gamiton iyan. Arog man kaiyan kun gusto niyatong magin amigo an Diyos.

 Sa Bibliya, an Diyos nagsabi: ‘Ako si Jehova. Iyan an sakuyang ngaran.’ (Isaias 42:8) Dawa igwa siya nin dakul na titulo, arog kan ‘Diyos na Makakamhan sa Gabos,’ “Kahuruhalangkawing Kagurangnan,” asin “Kaglalang,” tinawan niya nin pribilehiyo an saiyang mga parasamba na apudon siya sa saiyang personal na pangaran.—Genesis 17:1; Gibo 4:24; 1 Pedro 4:19.

 Mababasa sa dakul na traduksiyon nin Bibliya an personal na pangaran nin Diyos sa Exodo 6:3. Sinasabi kaini: ‘Nagpahiling ako ki Abraham, ki Isaac asin ki Jacob [bilang] an Diyos na Makakamhan sa Gabos, alagad ta sa ngaran kong Jehova dai ako sainda nagpamidbid.’

 An Jehovah (sa Bicol Jehova) ginatos na taon nang ginagamit sa lengguwaheng Ingles bilang an pangaran nin Diyos. Maski ngani mas gustong gamiton kan dakul na iskolar an ispeling na “Yahweh,” an Jehova iyo an pinakamidbid na porma kan pangaran nin Diyos. An inot na kabtang kan Bibliya isinurat bako sa Ingles, kundi sa Hebreo, sarong lengguwahe na pawala an pagbasa. Sa lengguwaheng iyan, an pangaran nin Diyos isinusurat gamit an apat na katanog (consonant), יהוה. An apat na letrang Hebreo—may transliterasyon na YHWH—midbid bilang an Tetragrammaton.