Uyon sa report kan U.S. Centers for Disease Control and Prevention, mga kabanga kan gabos na ininterbiyu na edad 15 sagkod 19 an nakipag-oral sex na. “Kun makikipag-ulay ka sa mga tin-edyer [manungod sa oral sex], sasabihon ninda na okey lang iyan,” an sabi ni Sharlene Azam, an awtor kan librong Oral Sex Is the New Goodnight Kiss. “Sa katunayan, dai ninda iyan ibinibilang na sex.”

•  Ano sa hiling mo?

•  Ano an totoo?

•  Taano ta mahalaga iyan?

 Simbagon nin iyo o dai an minasunod na hapot.

1.   Puwede daw magbados an sarong babayi pag nakipag-oral sex siya?

   1.   Iyo

   2.   Dai

2.   Puwede daw makaraot sa salud an oral sex?

   1.   Iyo

   2.   Dai

3.   Maibibilang daw talagang sex an oral sex?

   1.   Iyo

   2.   Dai

 Ikumparar an simbag mo sa minasunod na impormasyon.

1.   Puwede daw magbados an sarong babayi pag nakipag-oral sex siya?

    Simbag: Dai. Iyan an dahilan kaya pighuhuna kan dakul na tawo na mayong maraot sa oral sex.

2.   Puwede daw makaraot sa salud an oral sex?

    Simbag: Iyo. An tawong nakikipag-oral sex puwedeng magkaigwa nin hepatitis (A o B), genital warts, gonorrhea, herpes, HIV, asin syphilis.

3.   Maibibilang daw talagang sex an oral sex?

    Simbag: Iyo. An ano man na gibo na kalabot an ikinabuhay kan ibang tawo—kaiba na an normal na pakikidurog, oral sex, anal sex, asin pag-masturbate sa iba—pakikipag-sex na iyan.

 Pag-isipan an nagkapirang teksto sa Bibliya na konektado sa oral sex.

 An sinasabi kan Bibliya: “Ini . . . an kabutan nin Diyos, na kamo . . . maglikay sa seksuwal na imoralidad.”—1 Tesalonica 4:3.

 An orihinal na lengguwaheng itrinadusir na “seksuwal na imoralidad” nanunungod sa gabos na porma nin seksuwal na gibo sa bakong agom, kaiba diyan an normal na pakikidurog, oral sex, anal sex, asin pag-masturbate sa iba. An sarong tawo na nagsasagibo nin seksuwal na imoralidad puwedeng magsapar nin magabat na mga konsekwensiya, asin an pinakanakakamundo diyan iyo an pagkaraot kan relasyon sa Diyos.—1 Pedro 3:12.

 An sinasabi kan Bibliya: “An siisay man na nagsasagibo nin seksuwal na imoralidad nagkakasala sa sadiri niyang hawak.”—1 Corinto 6:18.

 An oral sex puwedeng magkaigwa nin maraot na epekto sa pisikal asin espirituwal. Puwede man iyan makaapektar na marhay sa emosyon. “Bako lang sa normal na pakikipag-sex namamatian an pagmating ginamit ka lang, an pagbasol, o an pagmating dai kang kalaban-laban,” an sabi kan librong Talking Sex With Your Kids. “An gabos na negatibong emosyon na tibaad mamatian nin saro sa normal na pakikipag-sex sa salang sitwasyon puwede man na mamatian sa ano man na klase nin pakikipag-sex sa salang sitwasyon. Pag sinabing sex, sex iyan.”

 An sinasabi kan Bibliya: “Ako, si Jehova, an saimong Diyos, an Saro na nagtutukdo sa saimo tanganing makinabang ka.”—Isaias 48:17.

 Naniniwala ka daw na talagang nakikinabang ka sa mga pagbuot nin Diyos manungod sa sex? O iniisip mo daw na nakakalimitar iyan saimo? Para matabangan kang masimbag an mga hapot na iyan, isip-isipon an sarong highway na may naka-post na mga speed limit, signal nin trapiko, asin mga stop sign. Para saimo, an mga sign saka signal daw na iyan restriksiyon o proteksiyon? Ano an mangyayari kun babaliwalaon mo—saka kan ibang mga drayber—an mga iyan?

 Arog man kaiyan pag-abot sa mga pamantayan nin Diyos. Kun babaliwalaon mo iyan, siguradong aanihon mo an itinanom mo. (Galacia 6:7) “Mantang mas binabaliwala mo an mga paniniwala saka pamantayan mo asin naggigibo nin mga bagay na sa hiling mo bakong tama, mas mababawasan an respeto mo sa sadiri,” an sabi kan librong Sex Smart. Sa kabaliktaran, kun namumuhay ka kauyon kan mga pamantayan nin Diyos, maipapahiling mo na malinig ka sa moral. Urog pa diyan, mapapagdanay mong malinig an saimong konsiyensiya.—1 Pedro 3:16.