Sa paglihis nin panahon, may mga mag-agom na dai na gayong nagpapahiling nin pagpadangat sa lambang saro. Kun arog kaini an nangyayari sa saindong relasyon, dapat daw na ikahadit mo iyan?

•  Kun ano an dapat mong maaraman

•  Kun ano an puwede mong gibuhon

An pagpadangat mahalagang marhay para magkaigwa nin makusog na relasyon an mag-agom. Kun paanong an regular na suplay nin kakanon asin tubig mahalagang marhay tanganing magdanay na makusog asin marahay an satong hawak, an dagos-dagos na pagpahiling nin kapadangatan nakakarahay asin nakakapakusog sa relasyon nin mag-agom. Dawa dakul na taon nang kasal, kaipuhan na pirming mamatian kan agom na lalaki asin kan agom na babayi na namumutan siyang marhay asin inaataman kan saiyang agom.

An tunay na pagkamuot bakong makasadiri. Iniinot kaiyan an kaugmahan kan saiyang agom. Kaya imbes na magpahiling nin pagpadangat pag gusto sana niya, an sarong makonsiderasyon na agom hihilingon o ririsahon kun nangangaipo nin pagpadangat an saiyang agom asin hihinguwahon niyang maitao iyan.

Sa pangkagabsan, an mga agom na babayi mas nangangaipong pahilingan nin pagpadangat kisa sa mga agom na lalaki. Tibaad namumutan man na marhay nin sarong agom na lalaki an saiyang agom. Pero kun ipinapahiling sana niya an saiyang pagpadangat pagmata sa aga asin bago maturog sa banggi o bago an seksuwal na relasyon, tibaad magduda an saiyang agom kun baga talagang namumutan niya ini. Mas marahay nanggad na parating magpahiling nin pagpadangat sa bilog na aldaw.

Ipahiling an pagpadangat paagi sa mga tataramon. An simpleng mga tataramon arog nin “I love you” o “Mahalaga kang marhay sako” puwedeng magpamati sa saimong agom na padaba mo siya.

Prinsipyo sa Bibliya: “Sa kapanuan kan puso nagtataram an nguso.”—Mateo 12:34.

Tip: Bako sana sa tataramon puwede mong ipahiling an saimong pagpadangat. Puwede mo iyan isurat—sa papel, e-mail, o text.

Ipahiling an pagpadangat paagi sa gibo. An pagkugos, paghadok, o an simpleng pagkapot kan saiyang kamot puwedeng magpahiling na talagang sinsero ka sa saimong “I love you.” An tunay na pagpadangat puwede man ipamati paagi sa paghapiyap, mamumuton na hiling, o paminsan-minsan na pagregalo. Puwede ka man gumibo nin mga bagay na makakatabang sa saimong agom na babayi—tibaad an pagdara kan saiyang bag, pagbukas nin pinto, paghugas nin mga plato, paglaba, o pagluto. Para sa dakul, bako sana ini praktikal na tabang—pagpahiling ini nin kapadangatan!

Prinsipyo sa Bibliya: “Dapat kitang mamuot, [bako sanang] paagi sa tataramon o paagi sa dila, kundi paagi sa gibo asin katotoohan.”—1 Juan 3:18.

Tip: Magin makonsiderasyon sa saimong agom kapareho kaidto kan nagdi-date pa sana kamo.

Magtao nin panahon sa lambang saro. An pagtao nin panahon na kamo sanang duwa an magkaibanan nakakapakusog sa saindong relasyon asin nakakaasigurar sa saimong agom na nauugma kang makaibanan siya. Siyempre, tibaad magin dipisil na magibo iyan lalo na kun may mga aki kamo o dakul kamong bagay na kinakaipuhan asikasuhon kada aldaw. Puwede kamong magplano nin simpleng mga bagay arog nin regular na paglakaw-lakaw​—na kamo sanang duwa.

Prinsipyo sa Bibliya: ‘Siyertuhon nindo kun ano an mas importanteng mga bagay.’​—Filipos 1:10.

Tip: May mga mag-agom na sibot pero nagtatagama nin panahon para sa regular na pag-date sa banggi o sa weekend tanganing magkaibanan sinda.

Midbidon an saimong agom. An lambang tawo igwa nin lain na pangangaipo sa pagpadangat. Pag-ulayan nindong duwa kun anong pagpadangat an gusto kan lambang saro saindo asin kun baga dapat iyan dagdagan pa. Dangan, pagmaigutan na itao an pangangaipong iyan. Tandaan na an pagpadangat mahalagang marhay para magkaigwa nin makusog na relasyon an mag-agom.

Prinsipyo sa Bibliya: “An pagkamuot . . . dai nag-iisip kan sadiri sanang kapakanan.”​—1 Corinto 13:4, 5.

Tip: Imbes na obligaron an saimong agom na pahilingan ka nin kapadangatan, haputon an sadiri, ‘Ano an puwede kong gibuhon tanganing magin mas mapagpadangat sako an sakong agom?’