An kalinigan mahalagang marhay sa mga insekto para makalayog sinda, makasakat, asin madeterminaran an nangyayari sa palibot ninda. Halimbawa, kun maati an antena nin sirum nababawasan an kakayahan niya sa nabigasyon, komunikasyon, asin pamarong. Kaya “nungka kang makakahiling nin maating insekto,” an sabi kan zoologist na si Alexander Hackmann. “May paagi sinda para linigan an hawak ninda.”

 Pag-isipan: Pinag-adalan ni Hackmann asin kan saiyang mga katrabaho an mekanismong ginagamit nin sarong klase nin carpenter ant (Camponotus rufifemur) para linigan an antena kaini. Nadiskubre ninda na hinahali kan sirum an mga ati sa antena kaini—darakula man iyan o saradit—paagi sa pagtiko sa bitis kaini tanganing magserbing clamp dangan pagbutong sa antena mantang naka-clamp iyan sa bitis niya. An durudakulang barahibo sa clamp hinahali an darakulang ati. An medyo saradit na ati hinahali kan pinong hugay na may mga pag-ultanan na kasingdakula kan mga barahibo sa antena kan sirum. Dangan an pinakasaradit na ati—na kasingsadit kan 1/80 kan diyametro kan buhok nin tawo—hinahali nin mas pinong hugay.

 Hilingon an sarong carpenter ant mantang linilinigan an saiyang antena

 Naniniwala si Hackmann asin an saiyang team na an mekanismong ginagamit kan mga sirum para magdanay na malinig an antena kan mga ini puwedeng iaplikar sa industriya. Halimbawa, an kaagid kaiyan na mga pamamaagi magigin kapaki-pakinabang sa pagpadanay nin kalinigan sa paggibo nin saraditon asin maselan na mga electronic component saka semiconductor, na diyan maski sadit na kontaminasyon puwedeng magresulta nin mga depekto.

 Ano sa hiling mo? Resulta daw nin ebolusyon an episiyenteng panglinig kan carpenter ant sa saiyang antena? O may nagdisenyo kaiyan?