Ee, ifyo Baibolo ilanda filatulanga bwino bwino ukuti Lesa e ko aba. Itukoselesha ukucetekela Lesa na ‘maka yesu aya kupelulula’ na ‘mano ya kwiluka,’ te kusumina fye ifyo aba mu mipepele basambilisha. (Abena Roma 12:1; 1 Yohane 5:20) Moneni ifyo Baibolo yalandapo ifingatwafwa ukusumina ukuti e ko aba:

•   Cimo icilanga ukuti kwaliba Kabumba, ni fintu umuulu ne calo umwaba ifya mweo fyateyanishiwa bwino. Baibolo itila: “Ca cine, ing’anda yonse muntu akuula, lelo uwapangile ifintu fyonse ni Lesa.” (AbaHebere 3:4) Aya mashiwi yalyanguka ukumfwa kabili abengi abasambilila balimona ukuti ya cine sana. *

•   Fwe bantunse tulafwaya ukwishiba ico twabela pano calo ukufuma fye pa kufyalwa. Nangu twingakwata ifintu fimbi ifyo tukabila mu bumi, tatuleka ukufwaya ukwishiba ico twabela pano calo. Uku ukufwaya e ko Baibolo ita ati “ukukabila ifya kwa Lesa.” Abakabila ifya kwa Lesa balafwaya ukwishiba Lesa no kulamupepa. (Mateo 5:3; Ukusokolola 4:11) Ukufwaya ukwishiba ifya kwa Lesa takulangilila fye ukuti Lesa e ko aba, lelo kulangilila no kuti ni Kabumba uwaba no kutemwa kabili uufwaya twamwishiba.​—Mateo 4:4.

•   Amasesemo ya mu Baibolo ayasobelwe ninshi kushele imyaka iingi ukuti yafikilishiwe, yafikilishiwe pa nshita ilya ine yasobelwe ukucitikilapo. Apo fyonse fye ifyasobelwe fyalicitike, tatutwishika ukuti aya masesemo yafumine kuli Lesa.​—2 Petro 1:​21.

•   Abalembele Baibolo balishibe ifya sayansi ukucila na bantu bambi abaliko pa nshita bali pa calo. Ku ca kumwenako, kale abantu abengi baishibe ati icalo caikele pa cinama icikulu kwati ni nsofu, nangu kapoli nelyo ing’ombe iilume. Lelo Baibolo itila Lesa “akobeka ne sonde apashaba kantu.” (Yobo 26:7) Baibolo yalilondolola bwino no kuti icalo caba “icabulungana.” (Esaya 40:22) Abantu abengi batila ico Baibolo ilondolwela bwino ifintu ni co Lesa umwine e wale-eba abantu ifya kulemba.

•   Baibolo ilasuka amepusho ayengi ayakosa aya kuti umuntu nga teshibe ifyasuko kuti alamona kwati Lesa takwaba. Ifipusho fimo ni fi: Nga ca kuti Lesa alitutemwa e lyo wa maka sana, cinshi ashafumishapo ububifi na macushi? Mulandu nshi imipepele ilengela abantu ukucita ifyabipa mu nshita ya kubafwa ukulacita ifisuma?​—Tito 1:16.