Baibolo tayalanda mu kulungatika pa fye shiku, pa kulanshanya ifye shiku pa intaneti, ne fya musango yu. Lelo yalilanda ifyo Lesa omfwa pa filenga abantu abashaupa nelyo ukuupwa ukufwaya ukucita ubulalelale, nelyo ukulamona ukwampana kwa mwaume no mwanakashi mu nshila yalubana. Umfweni ifyo Baibolo yalanda:

•   “E ico, ipayeni ifilundwa fya mubili wenu umumonekela imibele yabipa, e kutila ubulalelale, ukukowela, insuuna.” (Abena Kolose 3:5) Ukutamba ifye shiku takulenga umuntu ukushikatala, lelo kumulenga fye ukufwaya ukucita ubulalelale. Kulenga umuntu ukukanaba uwasanguluka kuli Lesa.

•   “Onse uwatwalilila ukulolekesha umwanakashi no kumukumbwa, ninshi nacita kale ubucende nankwe mu mutima wakwe.” (Mateo 5:28) Ukutamba ifye shiku kulalenga umuntu akwata insuuna iingalenga alufyanya.

•   “Ubulalelale no kukowela kwa musango onse nelyo ukufwaisha ukukwata ifingi te kwesha no kulafilumbula apo muli.” (Abena Efese 5:3) Tatufwile ukulalanda pa malyashi ya bulalelale nge lyashi lya kusekesha, kabili ukutamba nelyo ukubelenga pa fya musango yu kwena kwalicilanapo ukubipa.

•   “Imicitile ya muntu umubembu yalishibikwa bwino bwino, ni yi, ubulalelale, ukukowela, . . . ne fyapala ifi. Ndemusokela libela pali ifi fintu, filya namusokele kale, ukuti abalecita ifyaba ifi tabakengile mu bufumu bwa kwa Lesa.” (Abena Galatia 5:​19-21) Lesa amona abatamba ifye shiku nelyo abatumishanya ifikope fye shiku pa kompyuta nelyo pa foni ukuti balikowela icine cine. Nga tulecita ifya musango yu, te kuti Lesa aletupaala.