Ilyo Lesa abumbile umwaume no mwanakashi wa kubalilapo alibofishe. Alibofishe pa kuti bapange ulupwa no kutemwana sana.—Ukutendeka 1:27, 28; 2:18.

 Lesa afwaya abaupana ukuba ne nsansa. (Amapinda 5:18) Baibolo yalilanda pa fyo icupo cifwile ukuba, na pa mashinte ya mafunde ayengafwa abaupana ukuba ne nsansa mu cupo.

Ifili muli cino cipande

•  Finshi Lesa alanda ukuti icupo cifwile ukuba shani?

•  Finshi Baibolo yalanda pa kupatukana na pa kulekana?

•  Bushe pa kuti Lesa amone umwaume no mwanakashi ukuti balyupana, kano fye balembesha icupo ukulingana ne funde lya calo?

•  Ukulingana na Baibolo, milimo nshi umulume no mukashi bakwata?

•  Bushe Lesa afwaya abaupana muno nshiku balekwata abana?

•  Bushe Baibolo kuti yangafwa shani mu cupo candi?

•  Amalembo ya mu Baibolo ifilanda pa cupo

 Ukufuma fye pa kutendeka, Lesa apangile icupo pa kuti umwaume no mwanakashi bengaba pamo. (Ukutendeka 2:24) Lesa tasuminisha impali, abaume ukulaala na baume banabo nelyo abanakashi ukulaala na banakashi banabo, nelyo umwaume no mwanakashi ukulaikala pamo ukwabula ukuupana ukulingana ne funde. (1 Abena Korinti 6:9; 1 Abena Tesalonika 4:3) Yesu asambilishe abasambi bakwe ukulamona icupo nge fyo Lesa amona.—Marko 10:6-8.

 Lesa amona ukuti abantu nga baupana, tabalingile ukulekana. Umwaume no mwanakashi nga baupana, balalapa ukuti bakulaba aba cishinka ku bena mwabo kabili bakulaikala pamo mpaka ne mfwa. Lesa afwaya ukuti balecita ifyo bapangana pa kuupana.—Marko 10:9.

 Kuti kwaba inshita ilyo umulume ashingaba pamo no mwina mwakwe, ku ca kumwenako umulume nelyo umukashi kuti atandalila ulupwa pa mulandu wa kuti kuli ifipamfishe ifyo alingile ukwafwa ulupwa. Na lyo line, Baibolo taikoselesha abaupana ukupaatukana pa mulandu fye wa kuti mu cupo muli amafya. Lelo ikoselesha abaupana ukulanshanya pa kuti bapwishe ubwafya bakwete.—1 Abena Korinti 7:10.

 Ubucende e cintu fye cimo ico Baibolo yalandapo icingalenga icupo ukupwa. (Mateo 19:9) Kanshi nga ca kuti umulume no mukashi bapingulapo ukupaatukana nelyo ukulekana pa milandu iishili ya bucende, bonse babili tabalingile ukutendeka ukwishishanya, nangu ukuupa nelyo ukuupwa ku muntu umbi.—Mateo 5:32; 1 Abena Korinti 7:11.

 Lesa afwaya Abena Kristu balekonka amafunde ya buteko ayalanda pa cupo. (Tito 3:1) Nga ca kuti umwaume no mwanakashi kuti balembesha icupo cabo ku buteko, ninshi balelanga ukuti balicindika ubuteko kabili balakonka na mafunde ya kwa Lesa ayalanda ukuti icupo cilingile ukubelelela. *

•   Ifyo bonse bafwile ukulacita. Abaupana bafwile ukulacindikana no kutemwana. (Abena Efese 5:33) Bafwile ukulanga ukutemwa pa kupanga icupo kabili tabalingile ukucita fyonse ifingalenga bafilwa ukuba aba cishinka ku bena mwabo. (1 Abena Korinti 7:3; AbaHebere 13:4) Nga ca kuti balikwata abana, mulimo wa mulume no mukashi ukukusha abana babo.—Amapinda 6:20.

   Baibolo tayalandapo sana pa fyo abaupana balingile ukwakana incito iya kusangilamo imikalile ne ya pa ng’anda. Abene e balingile ukulanshanya ifingabomba bwino mu lupwa lwabo.

•   Umulimo umulume akwata. Baibolo itila “umulume e mutwe wa mukashi.” (Abena Efese 5:23) Umulume mutwe e kutila e ulingile ukutungulula ulupwa no kusala ifintu ifingalenga abakashi na bana ukunonkelamo.

   Umulume alingile ukushininkisha ukuti alesakamana aba mu lupwa mu fyo bakabila cila bushiku, ifyo baleumfwa e lyo na mu fya kwa Lesa. (1 Timote 5:8) Kabili alalanga ukuti alitemwa imibele ya mwina mwakwe ne milimo abomba ilyo alebombela pamo nankwe, e lyo no kutontonkanya pa fyo umwina mwakwe alemona ifintu, ne fyo engomfwa nga apingula fimo. (Amapinda 31:11, 28) Baibolo itila umulume afwile ukulanga ukuti aliba no kutemwa ilyo aletungulula ulupwa.—Abena Kolose 3:19.

•   Umulimo umukashi akwata. Baibolo itila “umukashi na o abe na katiina ku mulume wakwe.” (Abena Efese 5:33) Lesa alatemwa nga ca kuti umukashi alecindika umulimo apeela umwina mwakwe.

   Umulimo akwata wa kwafwilisha umulume wakwe, ukumwafwa ukulapingula bwino pa fintu no kumutungilila apo e mutwe wakwe. (Ukutendeka 2:18) Baibolo ilalanda ifisuma pa mukashi uubomba umulimo alingile ukubomba mu cupo.—Amapinda 31:10.

 Awe. Ku kale, Lesa aleeba bakapepa bakwe bamo ukukwata abana. (Ukutendeka 1:28; 9:1) Lelo Abena Kristu tababeba ukuti e fyo bafwile fye ukucita. Yesu taebele abasambi bakwe ukuti balingile fye ukukwata abana. Kabili nangu fye basambi ba kwa Yesu mu nshita ya batumwa, tabalelanda ukuti abaupana bafwile fye ukukwata abana. Abaupana abene kuti bapingulapo nampo nga kukwata abana nelyo iyo.

 Mu Baibolo mwaliba amashinte ya mafunde ayengafwa abaleupana ukuba ne nsansa mu cupo. Amashinte ya mafunde kuti ya-afwa abaupana ukukanacita ifingalenga baba na mafya ne fingabafwa ukushiba ifya kucita nga baba na amafya.

 Amashinte ya mafunde kuti ya-afwa abaupana ukwishiba ifyo . . .

•   bengalalanga ukutemwa kwa cine.—1 Abena Korinti 13:4-7; Abena Kolose 3:14.

•   bengacita nga bapusana.—1 Abena Korinti 10:24.

•   bengalakutika bwino ilyo umo alelanda.—Yakobo 1:19.

•   bengalalanga umucinshi ku bena mwabo.—Abena Roma 12:10.

•   bengalabelelana uluse.—1 Petro 4:8.

•   bengaba aba cishinka ku bena mwabo.—Marko 10:9.

•   bengalatekanishisha abena mwabo.—Abena Efese 4:2, 3.

•   bengalabombela pamo.—Lukala Milandu 4:9.

•   bengalalanga ukuti icupo cabo calicindama.—Ulwimbo lwa Nyimbo 8:7.