Ifibusa kuti fyalenga twaba ne nsansa no kutunguluka mu bumi. Ifibusa ifisuma filafwaya ifintu filetuwamina kabili filalenga twaba abantu abasuma.—Amapinda 27:17.

 Na lyo line, Baibolo ilalanda pa co cacindamina ukulasala bwino ifibusa. Ilatweba ifyabipa ififuma mu kwangala na babipa. (Amapinda 13:20; 1 Abena Korinti 15:33) Ifibusa fyabipa kuti fyalenga umuntu afilwa ukusala bwino pa fintu nelyo kuti aonaula imibele yakwe iisuma.

Ifili muli cino cipande

•  Cinshi cilenga umuntu aba cibusa umusuma?

•  Bantu nshi abalembwa mu Baibolo abali ifibusa ifisuma abo twingapashanya?

•  Bushe umuntu kuti aba cibusa wa kwa Lesa?

•  Ifikomo fya mu Baibolo ifilanda pa fibusa

 Baibolo isambilisha ukuti pa kuti abantu babe ifibusa ifisuma, tabafwile fye ukutemwa ifintu fimo fine. Ku ca kumwenako, Amalumbo 119:63 patila “Abanandi ni abo abamutiina, * na bakonka ifipope fyenu.” Uwalembeleko Baibolo alembele ukuti, asalile ifibusa abatiina Lesa kabili abalekonka amafunde yakwe ayalungama.

 Na kabili Baibolo ilalanda pa mibele iyo cibusa musuma alingile ukukwata. Ku ca kumwenako:

•   “Ukutemwa kwa kwa cibusa wa cishinka takupwa, kabili uyu cibusa ni munyina uufyalwa ilyo kuli ubucushi.”—Amapinda 17:17.

•   “Kwaba bacibusa abafwaya ukuyonaula abene, lelo kwaba icibusa icilambatila ukucila munonko mwafyalwa nankwe.”—Amapinda 18:24.

 Ifi fikomo fisambilisha ukuti cibusa musuma afwile ukuba uwa cishinka, uwa cikuuku, kapekape kabili alingile ukuba no kutemwa. Cibusa musuma ni ulya uwingatwafwa ulyo tuli na mafya. Na kabili cibusa musuma alatusoka nga amona ukuti ifyo tulecita nelyo ifyo tulefwaya ukucita kuti fyatuletela amafya.—Amapinda 27:6, 9.

 Baibolo yalilanda pa bantu abali ifibusa sana nangu balipusene umushinku, inkulilo, intambi nelyo ififulo bakwete mu bwikashi. Lekeni tulande pa bali ifibusa sana abo Baibolo yalandapo.

•   Ruti na Naomi. Ruti ali mupongoshi wa kwa Naomi, kanshi Naomi ali mukalamba sana pali Ruti. Na kabili, Ruti na Naomi bakuliile ukwapusa. Na lyo line, bali fibusa sana kabili balitemwanene nga nshi.—Ruth 1:16.

•   Davidi na Yonatani. Nangu ca kuti Yonatani alicilile Davidi imyaka 30, Baibolo itila “umutima wa kwa Yonatani waikatene no mutima wa kwa Davidi.”—1 Samwele 18:1.

•   Yesu na basambi bakwe. Yesu alikwete amaka pa basambi bakwe pantu alebasambilisha kabili balemwita ukuti shikulu. (Yohane 13:13) Na lyo line talebamona ukuti tabalingile ukuba ifibusa fyakwe. Yesu ali sana ifibusa na balekonka ifyo alesambilisha. Atile: “Lelo nakulamwita ati abanandi, pantu fyonse ifyo naumfwa kuli Tata nalimwishibisha.”—Yohane 15:14, 15.

 Ee, abantunse kuti baba ifibusa na Lesa. Baibolo itila: “Abalungama e baba bacibusa bakwe.” (Amapinda 3:32) Aya mashiwi yalolele mu kuti ababa ifibusa fya kwa Lesa bantu abesha na maka ukucita fisuma, aba cishinka, aba mucinshi, kabili abakonka amafunde ya kwa Lesa ayalanda pa mibele iisuma. Ku ca kumwenako, Baibolo ilanda ukuti Abrahamu umwaume uwali ne cishinka ali cibusa wa kwa Lesa.—2 Imilandu 20:7; Esaya 41:8; Yakobo 2:23.