Aba ku maofeshi yakalamba aya Nte sha kwa Yehova nababika sana amano ku fyo ubulwele bwa korona (ubo baleita ukuti COVID-19) bulesalangana. Na kabili balekutika ku balashi pa kuti baletweba ifyo tulingile ukucita. Twalishiba ukuti Baibolo yalisobela ukuti, mu nshiku sha kulekelesha mukaba ifikuko. (Luka 21:11) Nga ca kuti kwaisa ubulwele ubupya, tulingile ukucitapo fimo pa kuti tuicingilile e lyo na pa kuti tucingilile na bantu bambi.—Amapinda 22:3.

Bamo nalimo mulefwaya ukwishiba ifyo bamunyinefwe na bankashi bali mu ncende umuli ubu bulwele. Ubu bulwele bwa COVID-19 nabulenga imisambo ne filonganino mu Italy, mu Japan, mu South Korea, na mu fyalo fimbi fyaluleko fimo. Ku ca kumwenako, tabalesuminisha abantu ukuya mu kutandala pa ma bethel nelyo ukuya mu kulaalapo. E lyo mu fyalo fimo, amabuteko nayalesha abantu abengi ukulongana pamo, ici nacilenga aba pa misambo muli ifyo fyalo bemike ukulongana kwa muputule. Na kabili nacilenga aba bwananyina baluleko inshila sha kubililamo imbila nsuma e lyo ne milonganine mu ncende shimo shimo. Te mulandu na mafya ayo aba bwananyina bakwete, nabatwalilila ukuikosha mu fya kwa Lesa kabili balekoseleshako na bambi.—Yuda 20, 21.

Nga kwaba amalwele nge fi, aba bwananyina basanga ukuti ifyebo fimo ifyo twalalandapo filabomba bwino. Ifi fyebo kuti fyamwafwa pamo no lupwa lwenu nga ca kuti ku ncende mwikalila kwaima icikuko.

• Mwilaba no Mwenso Sana. Nangu ca kuti tulingile ukuba abalola ilyo kuli icikuko, kabili tulingile no kucitapo fimo pa kuti tuicingilile, ifyo tulepingulapo ukucita filingile ukulingana ne fishinka tusangile. Tatulingile ukucita ifintu pa mulandu fye wa kuti tuli no mwenso.—Amapinda 14:15; Esaya 30:15.

• Mulekonka Ifyo aba mu Buteko Balemweba. Aba mu buteko kuti balesha abantu ukulacita fimo pa kuti babacingilile ku bulwele. Mufwile ukwishiba ifyo aba mu buteko balefwaya mulecita kabili mulingile no kulafikonka.—Abena Roma 13:1.

• Muleba no Busaka. Calicindama ukulasamba iminwe libili libili ukubomfya sopo, nelyo ukulasuba ku minwe umuti umuba ubwalwa uo beta ukuti hand sanitizer. Tulingile no kulawamya libili libili incende apo twikata sana mu mayanda yesu e lyo na mu Ng’anda ya Bufumu. Na kabili abasambilila sana pa fya bumi, balanda ukuti ukuposhanya mu minwe kuti kwalenga ubu ubulwele bwasalangana bwangu. Akabungwe akalolekesha pa fya bumi mwi sonde lyonse aka World Health Organisation nako nakalemba ifyebo pa fyo twingaicingilila kuli ubu ubulwele bwa Koronavirus. Kuti mwafisanga pa webusaiti yabo pa cipande citila advice for the public.

• Muleba no Kutemwa. Kwena bonse twalishiba ukuti calicindama ukulasangwa lyonse ku kulongana e lyo no kulabombako umulimo wa kubila imbila nsuma. Nomba nga ca kuti namulwala kuti cawama mwaikala fye ku ng’anda pa kuti tamwambukisheko bambi ubu ubulwele. Ukucita ifi kuti kwalanga ukuti twalitemwa bamunyinefwe kabili tulafwaya ukubacingilila, no kucingilila na bena mupalamano abashili ba Nte.—Mateo 22:39.

• Mulekonka Ifyo Aba Bwananyina mu Cilonganino Balemweba. Mu ncende umwa kuti ubu ubulwele bwalifika kale, aba kwi ofeshi lya musambo kuti balanda ukuti tuleke ukulongana pa nshita iinono. Kuti baimika ukulongana kukalamba e lyo no kulongana ukuli konse uko icilonganino cingapekanya. Ifi fine e fyo bacita na mu ncende umo ubu ubulwele bwa COVID-19 bwakosa sana. Ku ca kumwenako, mu ncende shimo isha mu Italy, mu Japan, na mu South Korea balyalulako ifintu. Baeluda nalimo kuti bapingulapo ukutila balekopa fye ukulongana uko aba bwananyina bengalatambila mu mayanda yabo. Kabili aba bwananyina pa kubila imbila nsuma kuti balebomfya fye amafoni, ukulemba amameseji, kalata ya pa intaneti e lyo na makalata.

Pe samba pali impapulo shimo shimo ishingamwafwa ukuicingilila nga ca kuti kwaba amalwele.

• “Ifyo Mwingaicingilila ku Malwele” Loleni! Na. 6 2016, amabula 4-6

• “Ifyo Mwingacita Pa Kuti Mukwate Ubumi Ubusuma” Loleni! June 2015, amabula 2-7

• “Kuti Mwaba no Bumi Ubusuma: Icalenga 4—Cingilileni Ubumi Bwenu Loleni April 2011, ibula 7