Pa 2 December, mu 2014, icilye icikalamba ica Supreme Court of the Russian Federation catile ifiba pa webusaiti ya Nte sha kwa Yehova iya www.dan124.com kuti fyalenga abantu baimina ubuteko. Abakwata amaka pali Intaneti mu Russia na besala webusaiti, kabili umuntu nga aleebako bambi abekala muli ici calo pali iyi webusaiti no kubeba ukuti baleyapo ninshi napanga umulandu wa kukakilwapo. Icalo ca Russia e calo fye ceka mwi sonde lyonse icaisala jw.org.

Inte sha kwa Yehova mu Russia tabaishibe ukuti mu 2013 abalashi ba buteko mu musumba wa Tver mu bumfisolo balitendeke ukweba icilye ukuti besale webusaiti. Shicilye wa mu Musumba wa Tver alilembeele icilye ca Tsentralniy District Court ukuti bakesale jw.org pantu impapulo shimo isha Inte sha kwa Yehova ishaba pali iyi webusaiti ni shilya isho babikile pa mpapulo ishingalenga abantu baimina ubuteko isho babinda ku cilye. * Pa 7 August, mu 2013, icilye calisuminishe ifyo shicilye alandile ukwabula no kwishibisha Inte sha kwa Yehova kabili bapingwile ukuti jw.org kuti yalenga abantu baimina ubuteko.

Inte sha kwa Yehova baumfwile fye pa mulabasa wa calo ukuti nabesala webusaiti yabo pa numa ya mweshi umo ukutula apo baisalile. Ilyo baishibe ifyacitiike, balitwele umulandu ku cilye pa kuti baluule ubupingushi kabili baliitemenwe ukufumyapo impapulo isho balelandapo ukutila kuti shalenga abantu mu Russia baimina ubuteko. Pa 22 January, mu 2014, icilye ca Tver Regional Court calyalwile ubupingushi kabili catile icilye tacakwete ifishinka pa kwisala jw.org no kuti calingile ukwishibisha abene ba webusaiti pa kuti nabo balubululeko umulandu.

Ba S. G. Kekhlerov, inkonkani kuli shicilye mukalamba (Deputy Prosecutor General) tabatemenwe ifyo icilye capingwile, e ico batwele umulandu ku cilye icikalamba ica Supreme Court of the Russian Federation. Inte sha kwa Yehova tababebele bwino bwino ukuti kukaba ukulubulula. Lelo, pa 2 December mu 2014, icilye calitwalilile ukulanda pa mulandu nangu ca kuti Inte sha kwa Yehova na balebemininako tabalimo mu cilye.

Icilye icikalamba calisumiine ukuti ba Nte balifumishepo impapulo isho balandilepo mu mulandu balubulwile mu cilye mu August 2013, lelo calandile ukwabula ifishinka ifili fyonse ifyalelangilila ukuti isho impapulo kuti bashibikapo na kabili pa webusaiti. E ico icilye capingwile ukuti ifyo icilye ca kubalilapo capingwile fyali fye bwino, kabili catile jw.org kuti yalenga abantu baimina ubuteko. * Inte sha kwa Yehova balefwaya ukuti balubulule na kabili umulandu mu cilye, lelo icilye calikeene ukukutika ku mulandu. Na kabili balitwala uyu mulandu kuli Ceyamani wa cilye icikalamba, kabili balelolela ukulubulula.

Inte sha kwa Yehova batile Icilye Icikalamba capingwile umulandu ukwabula ukukwata ifishinka ifyakumanina pantu pa jw.org iya mu Russia tapaba impapulo isho batila kuti shalenga abantu baimina ubuteko. Ishi impapulo bashifumishepo mu lusuba mu 2013. Pa mulandu ne fyo icilye capingwile, abalashi ba buteko mu Russia nabeba abalolekesha pali Intaneti ukwisala jw.org mu Russia. Ici nacilenga ukuti abantu belabelenga Baibolo yaba pa webusaiti mu ndimi ukucila pali 130 ne mpapulo ishilanda pa fya mu Baibolo mu ndimi ukucila pali 700. Umuntu uuli onse mu Russia uuleebako bambi pali iyi webusaiti nomba kuti bamukaka pa kulakoselesha abantu ukulabelenga impapulo isho batila kuti shalenga baimina ubuteko. Ifi baisala webusaiti, Inte sha kwa Yehova ukucila pali 170,000, tabakalabelenga ifyebo ifingalenga bakosa mu fya kwa Lesa kabili ifyo babomfya pa kupepa cila bushiku.

Ifi Icilye Icikalamba cipingwile calalenga abalashi ba buteko bwa Russia baleshe imilimo Inte sha kwa Yehova babomba. Ifi abalashi ba buteko baiminina fye pa kukanabomfya bwino ifunde lya kulesha ifingalenga abantu ukwimina ubuteko, ubuntungwa bwa kupepa mu Russia bukalacepelako fye. Inte sha kwa Yehova balesubila ukuti abalashi ababa no mulinganya bakacindika insambu sha bantu isha kupepa kabili bakapingula bwino umulandu ukulingana ne fyo icalo ca Russia casumina ku mafunde ya fyalo pamo ne fyaba mu lupapulo lwa calo.